BIŊ KILISI GEOC LASÊ GÊDÊŊ JOAŊŊA
Biŋ Kilisi Geoc Lasê Gêdêŋ Joaŋŋa nec ŋac tau keto gêdêŋ ŋasawa teŋ, taŋ lau sêjanda to sêlêsu lau buŋa kêtu nêŋ sêkêŋ gêwiŋ Jesu Kilisi gebe Apômtau eŋŋa. Joaŋ keto papia tonec ŋamanô tau nec gebe êkêli lau tônê sêkêŋ mateŋ Anôtô to taêŋ êka eŋ totêntac êpa sugeŋ ma gebe êpiŋkap êsêac gebe sêsap eŋ tôŋ ŋaŋêŋgeŋŋa êtôm têm, taŋ sêôc wapac to ŋandaŋ naŋŋa sênsiŋ sugeŋ.
Anôtô geoc nom ŋatêm êsu ŋawêc totau-totau lasê gedêg Joaŋ, tec keto gêjam buku tonec ŋamakeŋ kapôêŋ auc. Gêgôm eŋ kêtu kaiŋ teŋ kêsa, tec gêlic gêŋ ŋakatu kêpi ŋadôŋdôŋgegŋ ma gêŋô biŋ ŋalêwiŋgeŋ, naŋ lau buŋa têm tônêŋa sêjala ŋam gêc awê gêdêŋ êsêac tauŋgeŋ, mago kêsiŋ tau gêc lêlômgeŋ gêdêŋ lau samuc. Ŋacsakiŋ teŋ embe ênam mêtê aêac, oc êndênaŋ biŋ ŋapep. Eŋ êkêŋ ŋasêbu samob sêsô ŋalôtêna tageŋ ŋalabu, naŋ eŋ êsam lasê êsêp ŋasawa, ec êwê aêac êndêŋ tajala biŋŋa. Joaŋ keto buku tonec ŋabiŋ totau-totau kêsô ŋalôtêna ŋalabu gêdêŋ-gêdêŋgeŋ kêtôm tônêgeŋ, tec kêdênaŋ gêŋ, tê katu gêlic to gêŋô-gêŋô nê, kêsi tau gêc awê ŋajam. Lau sêpuc biŋ tonaŋ ŋai ŋam ma sêwa sa naŋ, nêŋ kauc keso-keso tau. Mago buku tau ŋagalôtênasêga tonec gêc awêgeŋ gebe Êtu ŋamu Anôtô oc êkêŋ Apômtau Jesu Kilisi mêŋêku nê ŋacjo pebeŋ tulu tomalageŋ ma Sadaŋ tau êwiŋ amboac tonaŋgeŋ. Êkêŋ êsêac sêsô eŋ ŋaŋbu su, gocgo êkêŋ moasiŋ êndêŋ nê lau sêsêp eŋ tôŋ ŋaŋêŋŋa naêjô gebe êkêŋ êsêac sêwê kaiŋ undambê wakuc to nom wakuc ŋawasi sêwiŋ eŋ.
Ŋadênaŋ
1. Joaŋ gêjac m papia tonec 1:1-8
2. Joaŋ katu kaiŋ teŋ kêsa gêlic gêŋ ŋakatu ŋamataŋa ma biŋ gêdêŋ gôlôac 7ŋa 1:9–3:22
3. Papia toŋapeŋ 7ŋa 4:1–8:1
4. Dauc 7ŋa 8:2–11:19
5. Lêŋuckêm to bôclai luagêc ŋabiŋ 12:1–13:18
6. Katu gêlic gêŋ ŋakatu ŋagêdô 14:1–15:8
7. Anôto têtac ŋandaŋ ŋalaclu 7 16:1-21
8. Babilon kêku sa ma sêku Bôc tau tuluŋa to propete dansaŋ ma Sadaŋ tau 17:1–20:10
9. Anôtô êmêtôc biŋ êtu ŋamu 20:11-15
10. Undambê wakuc to Nom wakuc ma Jerusalem wakuc 21:1–22:5
11. Joaŋ gêjac mata buku tonec 22:6-21
1
Joaŋ gêjac m nê biŋ ma awa gêjac nê lau
1 Biŋ tonec ŋai Jesu Kilisi geoc lasê. Anôtô tau kêkêŋ biŋ tonec gêdêŋ eŋ gebe eŋ êtôc biŋ, taŋ kêdabiŋ gebe mêŋêsa naŋ, êndêŋ nê sakiŋwaga samob. Tec kêsakiŋ nê aŋela geoc biŋ tau lasê gêdêŋ ênê sakiŋwaga aê, Joaŋ. 2 Aê, Joaŋ, galic gêŋ samob tonec, tec kasôm Anôtônê biŋ to Jesu Kilisi nê biŋŋanô tau lasê. 3 Aê aoc êôc ŋac, taŋ êsam biŋ tonec lasê to êsêac, taŋ sêŋô biŋ Kilisi geoc lasêŋa ma sêmansaŋ biŋ samob, taŋ kato gêc papia tonec naŋ, gebe ŋanoc kêdabiŋ.
4 Aê, Joaŋ, ŋoc biŋ êndêŋ gôlôac dabuŋ 7, taŋ sêmoa gamêŋ Asiaŋa. Moasiŋ to biŋmalô êndêŋ amac aŋga ŋac, taŋ gêmoa gêdêŋ andaŋgeŋ ma gêmoa galoc ma oc êmêŋ naŋ nê, ma aŋga Ŋalau 7, taŋ sêmoa ênê lêpôŋ kiŋŋa ŋanêmŋa naŋ nêŋ, 5 to aŋga Jesu Kilisi nê. Eŋ ŋac-gêwa-biŋ-sa-ŋaŋêŋ-waga ma kêtu ŋacmatê sêndi sa nêŋ ŋamêc to gêjam gôliŋ kiŋ nomŋa.
Eŋ têtac gêwiŋ aêac ma kêgaboac aêac su aŋga nêŋ sec ŋa tau nê dec. 6 Eŋ kêkêŋ aêac tatu Tama Anôtô nê gamêŋ to dabuŋwaga. Ŋawasi to ŋajaŋa êndêŋ eŋ teŋgeŋ ma teŋgeŋ. Biŋŋanô.
7 Alic acgom, eŋ oc êmêŋ totaogeŋ.
Lau samob oe sêlic eŋ.
Ma êsêac, taŋ sêguŋ eŋ ôli lasê naŋ, oc sêlic eŋ sêwiŋ.
Lau to-m-to-m aŋga nom têtaŋ êpi eŋ.
Aec, biŋ tau amboac tônê.
Biŋŋanô.
8 Apômtau Anôtô, ŋaniniŋ Ŋatau, taŋ gêmoa gêdêŋ andaŋgeŋ ma gêmoa galoc ma oc êmêŋ naŋ, kêsôm gebe “Aê ŋac ŋamata to ŋamu.”
Joaŋ gêlic Kilisi
9 Amac tewemi aê, Joaŋ. Jesu gêbiŋ aêac tôŋ, tec gawê kaiŋ nêm gêŋwapac to Anôtônê gamêŋ ma gaôc gêŋwapac totêtac kêpa sugeŋ gawiŋ amac. Êsêac sêkêŋ aê gaŋgôŋ nuc, taŋ sêsam gebe Patmos naŋ, kêtu kasôm Anôtônê biŋ lasê to gawa Jesu saŋa. 10 Gêdêŋ Apômtaunê om Ŋalau gêjam aê auc, tec gaŋô awa kapôêŋ teŋ amboac dauc kêtaŋ aŋga aê dêmôêcmuŋa. 11 Ŋaawa tau kêsôm gebe “Gêŋ taŋ ôlic naŋ, oto êsêp buku teŋ ma ôsakiŋ êndêŋ gôlôac dabuŋ 7 tonec, Epese, Smurna, Pergamon, Tuatira, Sardes, Piladelpia ma Laodikea êna.”
12 Go kakac tauc ôkwi gabe jalic awa, taŋ kêsôm biŋ gêdêŋ aê naŋ. Kakac tauc ôkwi e galic jakaiŋ gold 7. 13 Ma ŋac teŋ amboac ŋamalac latuŋi teŋ gêmoa jakaiŋ tonaŋ ŋasawa. Eŋ kêsô ŋakwê baliŋ e jagêdêŋ agêbi ma kêjandiŋ ômbiŋkap gold gêsac bôdagi. 14 Ŋac tau môkêapac to môkêlauŋ sêpôma amboac kateŋ sêpsêp ma amboac tao kwalam, ma mataanô amboac jawaô, 15 ma akaiŋ amboac ki joŋjoŋ, taŋ sêpac e ŋamondec-mondec kêsa naŋ, ma nê awa amboac bu kapôêŋkapôêŋ ŋakicsêa. 16 Ŋac tau lêma anôŋa kêkam utitalata 7, ma siŋ teŋ sêuc ŋamata makeŋ-makeŋ kêsa eŋ awasuŋ, ma eŋ laŋôanô amboac oc ŋawê toŋaclai.
17 Aê galic eŋ e gau tauc jatomatêgeŋ gaêc eŋ akaiŋŋa, go kêkêŋ lêma anôŋa gêsac aê ma kêsôm gebe “Ôtêc taôm atom. Aê ŋac ŋamata to ŋamu. 18 Aê matoc jali. Aê gamac êndu su, mago aôm gôlicgac, aê matoc jali gamoa teŋgeŋ ma teŋgeŋ, ma kakôc gêmacanô to lamboam ŋaki. 19 Amboac tonaŋ oto gêŋ, taŋ gôlic naŋ, sa acgom. Oto gêŋ, taŋ galoc gêc naŋ, to gêŋ taŋ mêŋêsa êtu ŋamu naŋ, amboac tonaŋgeŋ. 20 Utitalata 7, taŋ gêc lemoc anôŋa naŋ, to jakaiŋ gold 7 ŋabiŋ, taŋ gêc lêlômgeŋ naŋ, ŋam tau tonec. Utitalata 7 tonaŋ têtu gôlôac dabuŋ 7 nêŋ aŋela, ma jakaiŋ 7 tonaŋ têtu gôlôac dabuŋ 7 tau. *Ŋaê Asia kêkanôŋ gamêŋ, taŋ sêsam teŋ gebe Asia sauŋ. Alic Tim II. 1:15