1 “Oto biŋ tonec êndêŋ gôlôac dabuŋ Epeseŋa nêŋ aŋela.

“Ŋac taŋ lêma anôŋa kêkam utitalata 7 ma kêsêlêŋ gêmoa jakaiŋ gold 7 ŋasawa naŋ, kêsôm biŋ tonec gebe 2 Aê kajala nêm koleŋ to gôim taôm su ma gôc gêŋwapac totêmtac kêpa sugeŋ. Aê kajala gebe aôm godec lau sec gebe sêmoa sêwiŋ aôm atom. Aôm kôsaê êsêac, taŋ sê tauŋ gebe aposolo, mago êsêac aposolo atom naŋ, e kôjala êsêac gebe dansaŋtêna. 3 Aôm gôc gêŋwapac, taŋ kêtap aôm sa kêtu ŋoc ŋaêŋa naŋ, totêmtac kêpa sugeŋ, ma têkwam gêbac atom. 4 Tageŋ nêm biŋ teŋ tec gêc. Aôm gôwi nêm têmtac gêwiŋ ŋamataŋa siŋ. 5 Amboac tonaŋ taêm ênam gêŋ, taŋ gôwi siŋ su naŋ, e ônam taôm ôkwi ma ônam kôm, taŋ gôjam gêdêŋ ŋamataŋa naŋ êtiam. Embe ônam taôm ôkwi atom, oc jandêŋ aôm jawac ma jatiŋ nêm jakaiŋ su aŋga ŋamala. 6 Mago tonec tec gôgôm jagêdêŋ gebe têmtac gedec Nikolainê launêŋ kôm, taŋ aê têtac gedec amboac tonaŋgeŋ naŋ. 7 Ŋac taŋ nê taŋasuŋ gêc naŋ, êŋô biŋ, tec Ŋalau kêsôm gêdêŋ gôlôac dabuŋ nec, gebe Teŋ embe êku ŋacjo tulu, oc jakêŋ eŋ êniŋ ka daŋgôŋ mateŋ jaliŋa, taŋ kêkô Anôtônê paradis naŋ ŋanô.

8 “Ma oto biŋ tonec êndêŋ gôlôac dabuŋ Smurnaŋa nêŋ aŋela.

“Ŋac ŋamata to ŋamu, taŋ gêmac êndu e mata jali kêsa naŋ, kêsôm biŋ tonec gebe. 9 Aê kajala gebe gôŋgôŋ jageo to ŋalêlôm sawa. Mago aôm ŋac tolêlômgoc. Aê kajala êsêac, taŋ sê tauŋ gebe Juda naŋ, sêsôm biŋ alôb-alôb kêpi aôm. Mago êsêac Juda atom, êsêac aŋga Sadaŋnê lôm. 10 Ôtêc ŋandaŋ, taŋ oc ôc naŋ atom. Gôlicgac me, Sadaŋ oc êkêŋ amacnêm ŋagêdô sêsêp kapoacwalô, gebe ênsaê amac ma oc aŋgôŋ naeo êtôm bêc 10. Ôc ŋaŋêŋgeŋ e ômac êndu, go jakêŋ daŋgôŋ mateŋ jali ŋasunsuŋ êndêŋ aôm. 11 Ŋac taŋ nê taŋasuŋ gêc naŋ, êŋô biŋ, tec Ŋalau kêsôm gêdêŋ gôlôac dêbu ŋ nec, gebe Teŋ embe êku ŋacjo tulu, oc gêmacanô kêtu luagêcŋa êkêŋ ŋandaŋ êndêŋ eŋ atom.

12 “Ma oto biŋ tonec êndêŋ gôlôac dabuŋ Pergamonŋa nêŋ aŋela.

“Ŋac taŋ gêôc siŋ teŋ sêuc ŋamata makeŋ-makeŋ naŋ kasôm biŋ tonec. 13 Aê kajala gamêŋ, taŋ gôŋgôŋ naŋ, Sadaŋnê lêpôŋ kêkô tônê. Mago aôm kôkam aêŋoc ŋaê tôŋ ma gôsa kôkêŋ gêwiŋ aêŋa auc atom. Gêdêŋ taŋ sêjac ŋoc ŋac-gêwa-biŋ-sa-ŋaŋêŋwaga Antipas êndu aŋga amacnêm gamêŋ, taŋ Sadaŋ gêŋgôŋ naŋ, aôm gôsa aê auc atom amboac tonaŋgeŋ. 14 Tageŋ nêm biŋ ŋagêdô tec gêc. Lau ŋagêdô sêkam Balamnê mêtê tôŋ sêmoa Pergamon sêwiŋ aôm. Balam tonaŋ kêdôŋ Balak gebe êwa lakô lau Israel, gebe sêniŋ da gwamŋa to sêŋgôm mockaiŋ. 15 Lau ŋagêdô sêkam Nikolainê launêŋ mêtê tôŋ sêmoa sêwiŋ aôm amboac tonaŋgeŋ. 16 Amboac tonaŋ ônam taôm ôkwi. Embe masi, oc jandêŋ aôm jawac sebeŋ ma janac êsêac ŋa siŋ, taŋ kêsa aocsuŋ naŋ. 17 Ŋac taŋ nê taŋasuŋ gêc naŋ, êŋô bi ŋ, tec Ŋalau kêsôm gêdêŋ gôlôac dabuŋ nec, gebe Teŋ embe êku ŋacjo tulu, oc jakêŋ mana, taŋ kêsiŋ tau gêc naŋ, ma jakêŋ poc sêpsêp teŋ êndêŋ eŋ êwiŋ. Aê kato ŋaê wakuc teŋ kêsêp poc tau, ŋac teŋ kêjala atom, ŋac-kêkôcpoc-waga taugeŋ kêjala.

18 “Ma oto biŋ tonec êndêŋ gôlôac dabuŋ Tuatiraŋa nêŋ aŋela.

“Anôtônê Latu, taŋ mataanô kêtôm jawaô ma akaiŋ amboac ki joŋjoŋ naŋ, kêsôm biŋ tonec. 19 Aê kajala nêm koleŋ to têmtac gêwiŋ ma kôkêŋ gêwiŋ ma gôjam sakiŋ to gôc gêŋwapac totêmtac kêpa sugeŋ. Aê kajala gebe galoc gôjam koleŋ kapôêŋ kêlêlêc gêmuŋŋa su. 20 Tageŋ nêm biŋ teŋ tec gêc. Aôm gôlôc gêdêŋ Jesebel, taŋ gê tau gebe propeteo teŋ ma kêdôŋ to kêlênsôŋ ŋoc sakiŋwaga gebe sêŋgôm mockaiŋ to sêniŋ da gwamŋa. 21 Aê kakêŋ ŋasawa gêdêŋ eŋ gebe ênam tau ôkwi, mago gedec, eŋ gebe ênam tau ôkwi aŋga nê lêŋ mockaiŋoŋa atom. 22 Ôlic acgom, aê oc jambaliŋ eŋ siŋ ênsac nê mê togêmacgeŋ, ma êsêac, taŋ sêgôm mockaiŋ gêdêŋ eŋ naŋ, embe sênam tauŋ ôkwi aŋga gêŋ, taŋ sêgôm sêwiŋ eŋ naŋ atom, oc jambaliŋ êsêac siŋ sêmoa naeo ŋanô. 23 Ma aê janseŋ ênê latuio to ŋac samob su sênaŋa, go gôlôac dabuŋ samob sêjala gebe aê ŋac, taŋ kabêlêm ŋamalacnêŋ ŋalêlôm e gabi lêtêŋ, ma jakêŋ ŋagêjô êndêŋ amac êndêŋ-êndêŋgeŋ êjô nêm kôm, taŋ ajam. 24 Mago amac lau Tuatiraŋa ŋagêdô akôc mêtê sec tonaŋ sa atom ma akip biŋ, taŋ sêsam gebe ‘Sadaŋnê biŋ ŋalômŋa’ naŋ, sa atom. Tec jasôm êndêŋ amac gebe Aê oc jau gêŋwapac teŋ ênsac amac êwiŋ atom. 25 Mago gêŋ, taŋ akôc kêtu nêm gêŋ su naŋ, amêŋgôm ŋajaŋageŋ e aê jawac. 26 Teŋ embe êku ŋacjo tulu ma ênam ŋoc kôm e ênac dabi ŋ,