21
1 Adaa Aa-me aa mudu king-na kone maredepo yaaya rabu king aa mudu nipumi Adaa Aa-na raana ratea.
Go rabu nipuna epe konere kuba rupara ipa-rupa popea.
2 Niaana pema yae luabu ora epeta kone ima pare Adaa Aa nipumi niaana ima kone luabu aba rumaa adea.
Goa pua nipumi niaana ima kone raayona re ado-kiritea.
3 Niaame epe redepone kone agu ratua Gote nipuna ini agaa madaa epe-rupa piruamina.
Goa palima-daare niaame opa katema yaenu page rabuaniaaya.
4 Waea peme aanumi aakone sua oro yalo wae pupitagi agu noa waeanu agu pulalo peme.
Oro yalo nimuna pirape yae oyoa wae yae rubini onaa pimi.
5 Kogono peme aanu nimumi epe kone waru sua kogono peme rabu oyaenu waru adaapu imi.
Go yapare kone waru nasua pa aipapulu bebo teme aanu nimu oyae diata yalia rabu wae-rupa pitimi.
6 Aa medame yaa agaa loa nipumi mone yoloa mu-aaliare gore nipu omape pora-para go pu aaya-da.
Go aa-na saliade oyaere moae aipapulu sua wala esepe tade-rupa mada yalia.
7 Waea pi aanu nimumi wala epea meda napeme.
Go peme waeame nimu luabu dia yalimi.
8 Wae kone i aamere wae pora agu ratea.
Go yapare aa medaloma epe kone imi-numiri waea napeme.
9 Aa meda nipuna ada gaa-para pawa pirua ona-nogo naki raapu pawa piralia-daare epe ta.
Pare nipu agaa wae adaapu ne ona raapu piraliare oyalia.
10 Waea pape madaare reaeme omema-rupa mada pea-pulu waea adaapu pape mada aa meda odome naomeme.
11 Epe kone naimi aanumi adenalo mo waea pupitagi ne aanu tu adialimiri mo rudu kone sua pimi aanumi adoa epe kone mealimi.
Goa pua nimuna makuae yae ora adaa yalia.
12 Adaa Aa-na kone ora redepone kone ia. Goa pea-pulu aanumi nimuna ada-para waea peme luabu Adaa Aa nipumi waru adoa makuaaya.
Goa peapulu Adaa Aa-me go aanu nimu luabu maoya-talia.
13 Naraame-ome aanumi nimu rabaminalo yatemede agaa napagali-miri orope ne yatede agaa mada napagalimi.
14 Gore aa medame ne ratu yawaliare neme oyae ode medaloma go aa nipu kalape.
Ne kudiri pua ne naadalimi rabu nipuna ratu mada dia yalia.
15 Gore onaanumi epe pora ratua epe kone sua koso eperupa peme raburi epe-rupa piri onaame adoa raaname omoa pedo palimi.
Mo waea peme onaame goa adoa nimuna lo robaa-para wae kone meme.
16 Aa medame epe kone sape gimoalia
pare nipu omoa paliare aba omoa puaa pimi onaa raapu puaa piralia.
17 Aa medame epe eta noa oro yalo ipa waene noa raaname omo-aaliare nipuna amo dia yalia.
18 Epe aanu madaa keda popolalo palia
pare wala pereketua mo pupitagi no aeme aanu madaa alopawa popalia.
19 Gore aa meda eta oyaenu waru naope-pare awaliare epeanu luabu rabuaaya.
Goamere ona ratu yawo agaa adaapu ne onanuna kone page rabuniaaya.
20 Epe kone su epe pora ratua piri aana ada-para oyae ora epe-rupa pa su-aaya.
Go yapare wae kone su wae pora pameme aanuna oyae diata rabu pa piru-aaeme.
21 Go yapare aa medame aa yago raaname waru omoa epe pora rataliare nipu raana rubia adaa bi kateme-pulu epe-rupa piralia.
22 Yada yame pi aanu epe kone katea rabu ada kagure meda mada pabo tua winipu mealimi.
Aanu nimuna ada kagure pape ora puri pata-pulu nimuna ada kagurena pape mada narasalimi. Mo yada pi aanu yada pula palimi rabu ada kagure pabo tu rubalimi.
23 Gore aa medame nipuna agaa-abulu waru suruboa aaliare go aa nipu madaa kedaa meda mada naepalia.
24 Wae pupitagi ne aakone su aame waea pua aa yagonu-para page wae agaa teme.
Goa pua oro yalo nipuna bi agu minasaatalo pea.
25 Kiaa rakepene aa nipu kogono napi pa oyae meape madaa aaya.
Goa peapulu nipuna raana omea koneme nipu tumaomalia.
26 Kiaa rakepene aame oro yalo oyae pa meape madaa kone su pia.
Pare epe kone i aamere nipuna oyae pa aanu katae.
27 Adaa Aa-me pupitagi neme aanumi kateme opa re raaname na-omea.
Go yapare makirae konena opa epa katemere gore Adaa Aa-me pugu pia kone ia.
28 Gore koso-na yaa agaa tere go aa omalia.
Go yapare aa medana agaa waru regena pagoa go pi aanumi go aana agaa pagape madaa raana waru omoa pagalimi.
29 Waea adaapu peme aanu nimumi epea pema kone sua waea adaapu peme.
Goa pea pare epe redepone kone imi aanu nimuna pora pamuapere epena kone imi.
30 Pinawa ne ora epe kone makua yae i page epe pora kurua oyae luabu sali pare gomere ne mada naraba mealia.
Adaa Aa madaa kone mapirali-dare pora mada pali.
31 Gore mo yada-pi aanu nimuna yada pulalo nimuna ose mena maredepo yaawa maaeme.
Pare Adaa Aa nipumi go yada-na puri nakateare yada nawini palimi.