22
1 Gore onaame ne ora epe aa kone sua adaa bi gialimi-daare gomere mone oyae adaapu imi aanu page rabuaniaye.
2 Adaa Aa-me amo page naara onaa page luabu nipumi warisa.
3 Epe kone sua redepone-rupa piri aame waeanu nipu madaa epea rabu nipumi pakeaaya.
Go yapare epe-rupa napimi aanuri nimu pimi-para waeanu epea rabu nimumi go kedaa mua mea ritimi.
4 Neme nena bi rabuaniawa ne Adaa Aa-na rolo-para pirali-daare ne mone oyaenu page adaapu sua epe-rupa pirali.
5 Aa malopawa ma-oyaya yaere wae pora pamua pea.
Aa meda nipu epe-rupa aapena niminaaliare waea pape pora pakeaya.
6 Nena nogo naakinu epe pora ratina agaa maana mogeape.
Goa paliri nipu go pora rataama pua nipu pua ogae yalia.
7 Mone imi aanumi naraame ome aanu nimumi kogono kaloa surubeme.
Aa medaloma yago meme-nuri mo yago meme aanuna kogono pama kogono pu saeme.
8 Gore aa medame pupitagi noa aa medaloma madaa wae yae nipu madaa epalia rabu nipumi pa aa meda-para wala waea meda mada napalia.
9 Adaa Aame mo pa piri aanu rabameme onaare oyae waru kata.
Gore akolo ya? Naraa piri aanu rabamua oyae kateme-daa pea.
10 Waea pi aakone aanu luabu ratu talimi rabu mo aa nimuna pemeanu rayo dia yalia.
11 Aa medame epe agaa loa Gote-na ini agaa madaa epe-rupa aayare gore mo aa mudu king-na adami aa piralia.
12 Adaa Aa-me epe makuae kone luabu waru suruboa mo yaa agaa ne aanuna yaa agaa luabu rabuaniaya.
13 Kiaa rakepene aa nipuna ada-para pama pirua nipumi gupa ta.
Ni amaa palua rabu raa mena laiyonme porania ni tu nalia ta.
14 Ona yolape kone saliri naaku-rupa lopo talia.
Gore Adaa Aa ratu onaa madaa yawaliare go naakupara mada lopalimi.
15 Nogo naakimiri maeyae aanu adaapu peme.
Goa palimi pare neme mo nogo naakinu nimu aipuyame tua mana te-daare go palimide waeanu luabu mada gimalimi.
16 Aa medame naraanuna oyae mulalo waea palia-dare go page mo amo ne aanu oyae ode kateadare go paliame nipu aa naraa piralia.
Epe kone i aa-me agaa 30-pela redepona tua isa.
(Pro 22.17–24.34)
17 Abiare epe kone imi aanuna epe makuaeyae-para epe redepone yae luabuna agaa lagiano waru pagalepa.
18 Gore neme go agaa pagoa nena kone-para rubialia raburi neme mo onaa medaloma lakeloa mogeape.
Goa paliri nena lo robaa raana rubialia.
19 Nena bipa pagainalo go agaa apo lagialo-daa.
Goa pua neme Adaa Aa madaa puri paboa kone waru rulainalo pea.
20 Neme go agaa 30-pela epe redepona tisudere ora epe kone gua makuae yae meainalo gisude.
21 Goa pea-ga neme ora agaa luabu waru makuaaina.
Goa pua aa medalomame ne-para ora redepo ne agaa pua asapa teme-daare mada pua meali-ya?
1
22 Neme go aa naraanu pa ora naraanu yade kone nasape. Goa pua neme nimuna oyaenu page pa yoloa nameape.
Goa pua nimu koso talo epalimi rabu nimuna koso maoyaawa namabebolape.
23 Gore akolo ya? Adaa Aa-me nimu adabaawa surubalialo lalo.
Go page aa medame naraa aanu-para wae palimi-dare Adaa Aa-me nimu-na waea mada abutea.
2
24 Neme ratu repara yawo agaa pa yola piriri pi aanu raapu na ada mu aape.
25 Nimuna pemea ne mada palia rabu orope go waeanu-mi ne ma-oyalia.
3
26 Gore aa medame rudu mua nipuna bipa mada na-abutea-daare neme abulalua pi nalape.
27 Neme mo-rudu abutoa loa mada naabute-daare nena oyae luabu-para pati reke page madaa epa mealimi.
4
28 Nena akuanumi abade su robo isimi-rupare wala meda neme yola monea nasape.
5
29 Gore aa medame epe kogono paliare nipu aa muduna kogono aa mada piralia.
Go piaene aa-re pama bi na-i aa medana kogono mada napalia.