10
1 Mina Yudia si Karaiwaga bitadoki kaikobu wala, ikavisaki makwaisina vavagi bwaina igau bimaisi. Gala wala si Karaiwaga bitadoki makwaisina vavagi titoulesi. E taitu taitu sivabidubadu wala tolula ilulasi makawala wala paila matausina totapwaroru. Mitaga vavagi makwaisina gala kwaitala tuta gagabila bikatumigileu matausina mwada bimakaiasi Yaubada. 2 Kidamwa matausina eitapwarorusi makawala ilumkolaisi ninasi kala migileu, gala tuvaila bikaikai ninasi paila si mitugaga, e nani biligaiwaisi lula. 3 Mitaga taitu taitu ilulasi makawala, e lula ikatululuwai tomota paila si mitugaga. 4 Paila buyavisi bulumakau nammwala deli gota gala kwaitala tuta gagabila biligaiwa si mitugaga tomota.
5 Paila baisa uula avai tuta Keriso makateki bima ovalu watanawa ikaibiga baisa Yaubada, kawala,
“Yoku gala magim bigabwaisi lula kaina bisemakavaisi mauna baisa yoku,
mitaga lokukwatubiasi wowogu. 10.5-7 Sam 40.6-8
6 E minasina bisailisi namwaidona bigabwaisi odabala kabolula,
baisa gala biyomwasali nanom.
E gala bukumwasawa paila lula makwaisina mwada mitugaga bikau biligaiwa.
7 E lakaibiga, kawagu, ‘E mwa, Yaubada, yeigula wala!
Bogwa bavagi nanom.
E baisa makawala bogwa iginisi paila yeigu olumoulela Buki Pilabumaboma.’ ”wMapilana mina Isireli si Karaiwaga bukila.
8 Kalubikoya tolula ibokulaisi wala kasi Karaiwaga avai tuta ilulasi makawala, ikugwa Keriso ikaibiga baisa Yaubada, kawala, “Yoku gala magim avaka bigabwaisi lula kaina bisemakavaisi mauna baisa yoku. Kaina minasina bisailisi bigabwaisi odabala kabolula, e deli lula makwaisina mwada mitugaga bikau biligaiwa - baisa gala wala biyomwasali nanom.” 9 E oluvi ikaibiga, kawala, “E mwa, Yaubada, yeigula wala! Bogwa bavagi nanom.” E mapaila Yaubada bogwa eiligaiwa lula kwaibubogwa e isaiki kaimapula lula matauna Keriso. 10 E mapaila Yesu Keriso bogwa ivagi avaka Yaubada nanola. Sivatala wala itugwali wowola tomwaidona makawala lula, e mapaila ikatumigileuwaidasi komwaidodasi metoya mitugaga.
11 Mina Yudia si tolula taitala taitala biuwotetila yam kwaitala kwaitala, e deli bilula makawala sivabidubadu. Mitaga lula makwaisina gala gagabila biligaiwaisi tomota si mitugaga, gala wala kwaitala tuta. 10.11 Sun 29.38 12 Mitaga Keriso ilula sivatala wala e lula kala peula gala biwokuva. E oluvi isili Yaubada ola kakata.xKabosili makwaina isim kala taimamila deli peula.10.12-13 Sam 110.1 13 E baisa itulotula igau avai tuta Yaubada bivigaki bikalisuwoli matausina kala tilaula. 14 E metoya baisa lula kwaitinidesi wala eivigaki bwainawokuva matausina availa availa ikatumigileu, e kasi bwaina gala biwokuva.
15 Paila Baloma Tobumaboma tuvaila isilasola makawala. Ikugwa ikaibiga, kawala,
16 “E baisa makawala bakabutuvau deli matausina,
yam makwaisina oluvi, Guyau ikaibiga.
Ulo karaiwaga basaili oninasi,
e bagini olumoulesi.” 10.16 Yer 31.33
17 E oluvi ikaibiga, kawala, “Gala tuvaila baluluwai si mitugaga deli si bubunela doudoga.” 10.17 Yer 31.34 18 E kidamwa mitugaga deli bubunela doudoga bogwa leiligaiwa, gala tuvaila bilulasi avai vavagi paila mitugaga.
Ibodi bitalilowotusi bitalosi Yaubada omatala
19 Mapaila segwaia tatuvaluwasi bitasuvisi matabudona Bomikikila Sainela e uula Yesu buyavila. 20 Matauna eisuvi e iulovi kala taboda iulaim makadana kadavau, e baisa kadamomova, paila uula Yesu imili tomota. 21 Matauwena da tolulasi toveka goli, ikikaraiwogi mabudona Yaubada la tomota. 22 Yakidasi ninadaisi migileu, deli da dubumaisi gala biyega, deli goli bogwa takakayasi metoya sopi migileu. E mapaila ibodi bitalilowotusi bitalosi Yaubada omatala, paila uula bogwa eikatumigileu ninadaisi kala pupagatu. 10.22 Tol 8.30; Isi 36.25 23 Makwaina da pikwakusi avaka tasilasolasi ibodi bitayosikikitaisi, paila Yaubada eilivala biga katotila e bitadubumaisi kidamwa bogwa bivagi goli. 24 E ibodi bitananamsasi ammakawala bitalulukwaisi sedaiasi taitala baisa taitala, mwada bisalausi yebwaili deli bimitukwaibwailasi. 25 Taga bitalumwelavaisi kada gulogulasi sigugula tapwaroru, makawala goli mimilisi iuvagaisi. Mitaga saina peula bitakatululutaisi taitala baisa taitala, paila bitagisi la Yam GuyauyTuta matutona Yaubada biyakali komwaidosi mina watanawa. ivakatitaikina.
26 Kidamwa Yaubada ivitulokaidasi biga kwekamokwita e bogwa takatetasi mitaga tasaitaulasi wala baisa mitugaga, gala tuvaila bitabanaisi avai lula biligaiwa da mitugagasi. 27 Kaimapula goli bitakokolasi wala igau bitabodasi yakala, e deli kova makovana kovalululu bigabu availa availa tokowolova. 10.27 Ais 26.11 28 Kidamwa taitolu kaina taiyu tomota bigisaisi avai tomota iyogagi mina Yudia si Karaiwaga, e oluvi bisilasolasi avaka eivagi matauna, - e, kasi tokwaraiwaga bikaraiwagasi bikatumataisi. E gala wala binokapisaisi. 10.28 Kak 17.6; 19.15 29 Mitaga ammakawala matauna availa bikaluwou Yaubada Latula? Kaina buyavila Yesu eikatumigileu matauna mitaga idoki gala avaka dimlela? E buyavi makwaina leikamokwita Yaubada la kabutuvau! Kaina matauna bogwa ibani Yaubada la mitakwai paila uula Baloma Tobumaboma, mitaga ibigigagi matauna Baloma? Saina mwaugaga bikaloubusi baisa matauwena. 10.29 Sun 24.8 30 Paila bogwa tanikoli availa matauna eilivala, kawala, “Yeigu goli tokeula lugwa. Bogwa bamapu.” E deli ilivala, kawala, “Guyau biyakali la tomota.” 10.30 Kak 32.35,36 31 Baisa saina kabokokola sainela kidamwa bitabanaisi kada mipukisi metoya baisa matauna Yaubada Tomovagasi.
32 Bukululuwaisi avaka kami lumkola yam makwaisina omitibogwa. Ikugwa Yaubada la lumalama ititapaimi e oluvi mmayuyu bidubadu lokubodasi eiwakolaimi, mitaga kupeulasi wala. 33 Paila mimilisi tuta tomota ibigigagaimi iyogagaimi obukubaku goli. E mimilisi tuta tuvaila magimi bukuliloulasi deli matausina eibodasi kasi bigigaga kasi yogagi makawala. 34 Paila yokomi lokukeulasi kami vilavila mmayuyu deli matausina tokwatupipi. E tutala tomota ilebwaisi mi guguwa ikauwaisi wala, yokomi kupeulokaisi deli mi mwasawa. Paila bogwa kukwatetasi kweminabwaita mi guguwa isisu guguwotoula deli kwekanigaga. 35 Ibodi yokomi bukutuvaluwasi paila igau bimai deli kami mapu kwaiveka. 36 E ibodaimi bukupeulokaisi kidamwa bukuvagaisi Yaubada nanola, deli bukubanaisi avaka la biga katotila. 37 Paila Buki Pilabumaboma kala ginigini isisu,
“E tuta pikekita wala,
e matauna ulo touwata bima.
Gala bitulotula. 10.37-38 Aba 2.3-4
38 Matausina uli tomota mina duwosisia sainela bidubumaisi e bimovasi.
Mitaga availa bivayeita, gala wala bimwamwasila nanogu paila matauna.”
39 E yakidasi gala makawala matausina bivayeitasi e bitamwausi. Mitaga yakidasi tadubumaisi e tabanaisi katumova.
10:5 10.5-7 Sam 40.6-8
w10:7 Mapilana mina Isireli si Karaiwaga bukila.
10:11 10.11 Sun 29.38
x10:12 Kabosili makwaina isim kala taimamila deli peula.
10:12 10.12-13 Sam 110.1
10:16 10.16 Yer 31.33
10:17 10.17 Yer 31.34
10:22 10.22 Tol 8.30; Isi 36.25
y10:25 Tuta matutona Yaubada biyakali komwaidosi mina watanawa.
10:27 10.27 Ais 26.11
10:28 10.28 Kak 17.6; 19.15
10:29 10.29 Sun 24.8
10:30 10.30 Kak 32.35,36
10:37 10.37-38 Aba 2.3-4