14
Osia imnabi mina Isireli
1 E yokomi mina Isireli, bukukwaimilavausi baisa Guyau mi Yaubada. Mi sula eivigakaimi kusilibeibeusi e kukwapusisi. 2 Bukukwaimilavausi baisa Guyau, e bukunigadasi baisa matauna baisa makawala, kawami, “Bukuligaiwa komwaidona ma mitugagasi, e bukulagi ma nigadasi. E mapaila bakayakawolaimsi makawala lakakatotilasi. 3 Gala gagabila mina Asiria bikatumovaimasi, e wosala kabilia gala bipeulasi paila bikolaimasi. E gala avai tuta tuvaila bakalukwaisi ma tokolusi kidamwa minasina ma Yaubadasi. Mwa Guyau! Tuta komwaidona yoku kunokapisi matausina gala isim toulesi.”
Guyau ikatotila mina Isireli igau bisibwabwailasi
4 Guyau ikaibiga, kawala,
“Bogwa bakaimali ulo tomota baisa yeigu.
Bayebwaili matausina deli nanogu komwaidona,
paila bogwa leiwokuva ulo gibuluwa baisa matausina.
5 Mina Isireli bilumkolaisi ulo pilasi
makawala kuna oviloupakala.
Matausina bilalasi makala kai lalela,
e bitotusi peula
makawala kaila Lebanoni.
6 Bogwa bilumkolaisi si momova kwaivau makawala sisila kai itamkikitasi,
e kasi gigisa tominibwaita makala makaisina olibe saina kaimminabwaita.
Matausina kasi simasimina goli
makawala lalela kweisila mapilana Lebanoni.
7 E bakoli matausina makawala omitibogwa.
Matausina bisibwabwailasi makawala bagula kala luvabwaila
e biunigeyaisi makawala matamsina waini kaiuwasi.
E bulogasi bikaligiaki baisa ovalu watanawa makawala wainila Lebanoni bulogala.
8 Mina Isireli gala goli avai tuta tuvaila bikavaginasi baisa tokolu.
Bogwa bamapu si nigada e bayamati matausina.
Bavakanunuvi matausina makawala kaitala kai kaiyuviyowa.
Ka, yeigu wala uulela kasi mitakwai komwaidona.”
Kabovigimkovila
9 Ibodi matausina isim si kabitam bikatetasi ginigini makwaina isisu baisa. Guyau la kidakeda duwosisia, e tomitukwaibwaila ibububunasi makawala makwaisina. Mitaga tomitugaga isilibeibeusi e ikapusisi paila uula ipakaisi makwaisina.