10
Tapwaroru baisa tokolu, kaina baisa Yaubada mokwita
1 Tauwau, yokomi mina Isireli, ka kulagaisi kami biga Guyau bilivala. 2 Ikaibiga kawala,
“Gala bukuyeikulaisi si kedakeda ituwoli boda mabudosina;
taga bikaikai ninami avai vavagi kwemitawasi bikaloubusi walakaiwa,
ilagoli kaina tuwoli boda mabudosina bibulukukoli.
3 Tomota matausina si tapwaroru gala isim dimlela.
Bilukubalaisi kaitala kai olawodila,
e toleilai bikau la kaiyoudila e bilaleiya makaina,
4 deli bikatububuli tokolu metoya siliba deli goula.
E ikatupitukwaisi okaiwawa
paila bikikuloti taga bikapusisi.
5 Ka minasina tokolu makawala minasina kabovitukokola obigulela mareni;
minasina gala ibodi bibigatonasi e gala ibodi biloulasi
mapaila matausina bilupalupasi wala.
Mapaila gala ibodi bukukukolaisi minasina
gala wala gagabila biyogagaimi,
e deli gala wala avaka kami bwaina bisakaimi.”
6 Mwa Guyau, gala wala taitala makawala yoku;
yoku goli Topeuligaga,
deli yagam igaveka deli saina igapeula.
7 Availa ibodi bipaiki paila bitemmalaim yoku si guyau boda ituwoli ituwoli
ikwani wala kam taimamila bikanuvagasi.
Gala wala taitala makawala yoku
oluwalaisi komwaidona si tokabitam boda ituwoli ituwoli,
kaina oluwalaisi komwaidona si gweguya. 10.7 YG 15.4
8 Komwaidosi wala toninagowa deli toninitaboda.
Ammakawala minasina tokolu bivitulokaisi matausina avaka?
9 Si tokolu minasina eikatububulaisi siliba metoya Sipeini
e deli goula metoya Upasa,
baisa komwaidona togini tokolu si paisewa;
ivisikomasi kasi kakapula kala vau bweyani deli dairarugu
miyasina tobasisi karekwa eikimidagaisi kala bisibasi.
10 Mitaga Guyau yoku wala Yaubada mokwitatoula,
yoku Yaubada tomomova;
tuvaila Guyau tosivagasi.
Avai tuta bukugibuluwa valu watanawa biyega
e boda ituwoli ituwoli gala ibodi bivakulokolasi.
11 (Yokomi tomota ibodi bukulukwaisi matausina kidamwa yaubada minasina tokolu gala kala tobubula valu watanawa deli labuma, minasina goli bikatudidaimisi. E gala tuvaila bisisuaisi ambaisa ambaisa ovalu watanawa.)
Wosila kala yakaula Yaubada
12 Guyau ibubuli valu watanawa metoya ola peula;
metoya ola kabitam ibubuli watanawa komwaidona
deli ikatuvakai labuma komwaidona.
13 Metoya ola karaiwaga sopi walakaiwa ikawoulasi,
e lowalowa imai metoya omdula valu watanawa.
Matauna ivigaki kavikavila bikavila metoya wa kuna
deli iwitali yagila metoya ola bwaima.
14 Metoya bubuli makwaisina kasi gigisa, tomota kasi lumkola
makawala mina ninagowa deli mina gugolia wala.
Matausina eibububulasi tokolu iiyomsilaisi wala titoulesi
paila uula si yaubada minasina leibubulaisi
nasisasopa deli gala isim si momova.
15 Minasina ibodi wala bitakaluwou paila gala isim dimlesi.
E avai tuta Guyau bima paila bivagi avaka nanola
baisa minasina, bogwa goli bimtuli.
16 Ka, matauna Yekobe la Yaubada gala makawala minasina tokolu.
Matauna goli ibubuli vavagi komwaidona,
deli matoulela goli leinagi Isireli paila la tomota tatoula.
Ka, matauwena Guyau Topeuligaga.
Tutala katupipi igau makateki
17 Mina Yerusalem, yokomi bogwa ivaulaimi ivapataimi! Kukougugulaisi mi guguwa. 18 Guyau bogwa bikogalaimi metoya valu mapilana; matauna biyovikidadaimi wala tatoula bivinakwaimi e gala taitala bisisu kesa. Guyau bogwa eilivala.
19 Mapaila mina Isireli ikawotasi kawasi,
“Oooi! Bogwa einokumagaidasi!
Kada kalibwagasi gala wala bibwainasi.
Tadokaisi baisa vavagi vigimakava wala!
20 Da buliyoyovasi bogwa eikodidaimisi;
yuwoyoula miyasina ikikuloti bogwa eitatunaisi.
Litudoiasi komwaidona bogwa wala eibutugeyaisi;
gala wala availa isisuaisi kesa paila bikaliivauwaisi da buliyoyovasi;
e gala wala availa bipapi bitaboda.”
21 E avitakauloki kawagu, “Kama tokugwasi saina mina ninagowa;
matausina gala wala inigadaisi Guyau paila la vakeda.
Baisa uula matausina eimamasi,
e ma tomotasi bogwa wala eibutigigaiyaisi.
22 Ka, kulagaisi kala kauta valu bogwa eikaloubusi!
Boda mapilana opiliyavata bogwa eisinuvagelasi;
la tokabilia bogwa bivigakaisi viluwela Yuda bimila viloupakala,
ugiwagi bivigakaisi si valu.”
23 Mwa Guyau, bogwa wala lanikoli gala availa ibodi bikaraiwogi la kabodoulaguva titoulela;
gala taitala tomota ibodi bikaraiwogi titoulela la momova.
24 Mwa Guyau kukiduwosisii m tomota;
avai tuta bukugibuluwa, taga sainem bukuyomiyuyaimasi
kaina bukumipukwaimasi.
paila avaka bikaloubusi baisa yakamaisi baisa kala vigimkovila.
25 Kuwovili m gibuluwa bilokaia baisa boda makwaisina
gala ititapwarorusi baisa yoku
deli tomota matausina eikoulovaimsi.
Matausina ikatumataisi m tomota;
mokwitatoula wala iyomiyuyaimasi
e ma valusi idadaimisi isisu vilouwokuva wala.