14
Oda tutasi kaloubusi yakidasi komwaidodasi tomamama.
Da momovasi gala tuta kaduwonaku e tuta komwaidona tabudobodasi mwau.
Takaitubwasi e taigiyagisi saina nanakwa, makawala lala,
e tatitamwausi makawala kaikobu.
Mwa Yaubada! Ki, ibodi bukugisaigu kaina,
kaina bukusailigu omatam om kwaboyakala paila bukuyakalaigu?
Mina watanawa saina topupagatu,
e galaga avai tuta bitabani vavagi migileu metoya baisa matausina.
Yoku lokunigibogwi kala kaduwonaku si momova baisa ovalu watanawa,
kaina navila tubukona bisisuaisi tommomova.
Yoku bogwa lokukwaraiwogi baisa, e gala wala gagabila bitakatumapu.
Ibodi bukumitilavi e bukuligaiwa mina watanawa.
Kutagwala wala si kaisisu kala mwau biyomwasali matausina - kidamwa goli gagabila.
 
Kidamwa kaitala kai bogwa biteyasi, makaina kala pikwaku isisu wala,
paila makaina igau bitasusilasi e bimovavau.
Ilagoli kailawalila bogwa eiyatomoyasi,
deli uulotoula bogwa eikaliga olumoulela pwaipwaia,
mitaga kidamwa deli sopi, makaina bitasusila makawala kaitala kaitubovau kai.
10 Mitaga kidamwa taitala tau bikaliga, e baisa kala vigimkovila matauna.
Ka! Bikaliga, e ambaisa bitabani matauna tuvaila?
 
11 Makawala waya bisimwaisi titayelu
deli katuwotu bimadasi,
12 e makawala goli tomota bikaligasi, e gala tuvaila bitokaiasi.
Igau tutala labuma bikanigaga e matausina tuvaila bikanigagasi,
e gala bimamatasi,
kaina bikanuvivilasi metoya osi masisi.
 
13 Yeigu adoki mwada bukusipepunaigu wa Tuma,k Baisa si valu tomata.
e basipepuni wala avai tuta kam leiya biwokuva,
e oluvi bukuvitobu m tuta paila bukululuwaigu.
14 Kidamwa taitala bikaliga, ki, ibodi bimovavau?
Mitaga yeigu batulotula paila tuta bwaina,
e batulotula wala avai tuta mwau makwaina biwokuva.
15 E wa tuta matutona yoku bukudou e yeigu batama.
Yoku bimwamwasila nanom baisa yeigu,
paila yeigu goli m tomota.
16 E yoku bukuvitusi komwaidona avaka bauvagi,
mitaga gala bukululuwai avaka ulo mitugaga.
17 Bukukwau makwaisina mitugaga e bukuligaiwa,
deli bukuwinisau komwaidona ulo sula makwaisina bogwa lavagi.
 
18 Igau kala kweluva bima avai tuta koya bikapusisi,
deli raibwaga biluvapelasi bilosi ambaisa.
19 Sopi bikatudubuni dakuna,
deli kuna kunovakaveka bikunuwisau pwaipwaia.
Makawala goli yoku bukukodidaimi tomota si pikwaku paila momova.
20 Yoku kukwalisau taitala tau e kuyabi matauna bila bitamwauvagasi wala.
Tutala ikaliga, e migila bikasigegina wala.
21 Litula ibanaisi kasi taimamila, mitaga gala avai tuta inikoli avaka.
Gala goli bilukibogwaisi matauna avai tuta litula ibodasi mmosila.
22 Ilumkoli wala kala gidageda wowola titoulela,
e deli goli onanola saina mmayuyu sainela.

k14:13 Baisa si valu tomata.