15
Si bigatona siviyuwela
(15.1—21.34)
Elipasa
1-2 Mwa Yobi! m biga bigimakava wala,
komwaidona wala bigimakava!
3 Ka, gala taitala tokabitam ibodi bilivali biga mabigasina makawala yoku tuta baisa lokulilivali
kaina bikoli titoulela metoya biga mabigasina gala dimlesi.
4 Kidamwa bukuuvagi wala nanom titoulem, e gala wala availa ibodi bikukoli Yaubada;
kaina binigada baisa matauna.
5 Ka, m mitugaga kuiyomitali wala metoya om biga titoulem;
yoku saina tokabitam bigatona e kuvigikoni mwada bukukolaim metoya om biga titoulem.
6 Ka yeigu gala togia wowogu bakamogaim;
mitaga kam kwamwaga bukubani metoya om biga wala titoulem.
7 Ki, kudoki yoku kusibogwa ovalu watanawa?
Kaina kusibogwa oluviga Yaubada eibubula koya?
8 Ki kudoki bogwa kuligilabi avaka Yaubada la nanamsa leiuvagi?
Kaina kammwaleta wala tokabitam ovalu watanawa?
9 Avai vavagi kunikoli yakamaisi gala kanikolaisi?
10 Ka yakamaisi ma kabitamsi lakasopelasi metoya matausina tommoyabogwa,
matausina goli isibogwasi wala oluviga tamam eikaloubusi.
11 Yaubada magila bivisimolaim mitaga avaka paila kupupaiki?
Yakamaisi kakamatulasi paila Yaubada, e ma bigasi manum deli duwosisia.
12 Mitaga yoku iyowa lopom e kugidimilikaimasi deli m gibuluwa.
13 Yoku kugibuluwi Yaubada e kukwatuvigogu matauna.
14 Ki kudoki avai tau mokwita tomitukwaibwaila?
Kaina kudoki availa ibodi bisisu toduwosisia omatala Yaubada? 15.14-16 Yob 25.4-6
15 Ka, kugisa - Yaubada gala goli bidubumi la anelosi;
paila matausina goli gala imigileusi omatala.
16 Mitaga tomota imomwaisi mitugaga makawala sopi.
Mokwita goli, tomota tomitugaga deli gala wala dimlela.
17 E mwa, Yobi, kunakaigali balukwaim avaka ulo nikoli.
18 Ka, tomota tokabitam eivitulokaigusi avaka kamokwita metoya avaka eisopeilisi metoya baisa tumisia,
e gala avai vavagi kwekium ikatupwanaisi.
19 Osi valu gala wala togilagala isisuaisi
e gala wala availa ibodi bitavili ninasi metoya Yaubada kala dubumi.
20 Tau matauna ilamidadi sala
bilumkoli mmayuyu sainela ola tuta tomomova.
21 Butula kabovitukokola bitilikikiki otaigala,
e idoki wala luvala wowola, mitaga tolibulebu biyosisi matauna.
22 Matauna bikubu la keda e gala wala ibodi bisakauligili kaliga dudubalela,
paila ambaisa wala bilokaia kala kema eitutuli wala matauna bitamati,
23 e mluveka eitulotulasi paila bikomasi wowola.
Matauna bogwa leinikolibogwi la tuta omatala dudubila wala.
24 Kabomwau la peula makawala taitala guyau saina topeuligaga,
eitutuli wala paila biyogagi matauna.
25 Baisa makawala tau matauna kala mipuki bibani
paila uula matauna ikikapaipaia yamala baisa Yaubada
deli ikaluwou Yaubada Topeuligaga.
26-27 Tau matauna nanola walakaiwa deli tokowolova;
matauna deli dabala kala kasai iyosali la vayoula
e ikalubeigoguna bilokaia Yaubada ikabiliasi.
28 Matauna goli eiyouli valu komwaidona
e ivakulotiga bwala makwaisina avai tuta kala tomota eibutusi,
mitaga igau makateki kabilia bikodidaimi valu mavilousina deli goli bolesi.
29 Matauna la kaisisu bikobaluluva mitaga tuta pikekita wala bitamwau;
e gala wala kwaitala la guguwa eiyosi bikanuvagasi.
Deli goli matauna kaikobula bitamwau,
30 e gala wala ibodi bisakauligili kaliga dudubalela.
Matauna makawala kaitala kai makaina sisila kova eivakamati,
deli lalela yagila iyuvisau ilau.
31 Kidamwa la nagowa bikugwai e bidubumi wala mitugaga,
tuta oluvi mitugaga wala bivigaki kala mapu.
32 E igau gala bibudoki la tuta kaliga,
matauna bikikaligabwaga wala e bikaliga makawala sisitala kai masisina bimata e gala tuvaila bimovavau.
33 Matauna makawala tamtala waini matamna kaiuwala kwegigeyata ikaludubali;
kaina makawala kaitala kai olibe makaina lalela eikaludubali.
34 Matausina gala inikolaisi Yaubada, gala wala bidalasi tuvaila,
deli kova bivakadoum si bwala matausina toubuwabu.
35 Paila matausina goli tobubulesi nanamsa gaga deli tovagisi mitugaga;
tuta komwaidona ninasi ivakasau wala sopa.