24
Avaka paila Yaubada gala inagi tutala kaboyakala;
kaina inagi yamla kasi kabwaila matausina eiwotitalaisi matauna?
 
Tomota isisaibibilasi kaligei paila biyoulisi tuvaila si pwaipwaia;
matausina iveilauwaisi sipi e ilauwaisi isegolaisi deli si yawa.
Matausina tuvaila iveilauwaisi si ase magudisina weilova,
deli kwabuya la bulumakau biyosikikitaisi wala tatoula minana
bimapumkulovi kala wasi, oluvi bikaimalaisi.
Matausina isilibodaisi tonamakava gala bikauwaisi avaka si vavagi tatousi,
deli ikaliyabaisi matausina ilosi wala iwowausi.
 
E mapaila tonamakava binainevisi wala kʹasi oviloupakala,
makawala wala ase nabubolodila,
e gala wala ambaisa tuvaila ibodi bibanaisi kaula paila bivakomasi litusia.
Matausina bititayoyuwasi osi bagula ituwoli tomota,
deli bikikauwaisi kaiuwala waini osi bagula tomitugaga bigulesi waini.
E wa bogi bimasisisi bikanumakavasi wala tomdumwadu;
deli gala wala avai vavagi paila tabodala kasi numla.
Kuna wa koya bikunumati wala matausina,
e bikanapitukwaisi raibwaga mwada bisipepunisi.
 
Tomitugaga ikatulebwaisi magudisina gudikubukwabuya
metoya okasi nunu e ilauwaisi ivigakaisi si ula;
deli ikauwaisi tonamakava litusia e ivigakaisi mapula kasi wasi.
10 E tonamakava bililoulasi tomdumwadu wala gala avaka bikapolaisi uwosi;
matausina deli wala kasi molu bititayoyuwasi witi.
11 Matausina bipulopolasi olibe paila bulami,
deli kaiuwala waini paila waini tovala,
mitaga daka ipakalaki wala kaiyasi.
12 Olopola valu vilouveka matausina isim kasi kalibwaga
deli makateki bikaligasi idoudousi paila pilasi,
mitaga Yaubada gala wala inakaigali si nigada.
13 Mimilisi tomota ipakaisi lumalama;
paila gala itapuloki ninasi avaka lumalama,
kaina gala ibokulaisi ambaisa eivisigili.
14 Tutala ikikivi visiga tokatumata bitokaia wala bisunapula
bikatumati tonamakava,
e wa bogi matauna biveilau.
15 E tokailasi biuwayausa wala momwaila wala bidudubali matala;
matauna bikatuduvidavi wala mwada gala availa bivitoki tolosila.
16 E wa bogi toveilau bikikopwalasi wala bwala,
mitaga avai tuta biyam bisikubwalasi wala gala
magisi availa bigisi matausina.
17 Matausina ikukolaisi yam
mitaga dubilikitakita ituviluwaisi kala loula.
 
(Sopara)m Maigana Sopara gala eiginisi baisa, mitaga tadoki wala eilivala biga mabigasina.
18 Tau matauna tomitugaga sakala bidumyelu bilau,
e la pwaipwaia eiligaim Yaubada bibuloti;
matauna gala tuvaila bila ibigubagula ola bagula bigulesi waini.
19 Makawala sopi bimada metoya yuviyavila waigigi,
e makawala goli tomitugaga bitamwausi metoya ovalu watanawa.
20 Ilagoli inala tatoula gala wala biluluwai matauna;
mwatemwata bisomasi wowola, bitumigeyai makawala kaimilapwasa.
21 Baisa makawala bikaloubusi paila uula iyomiyuyu kwabuya,
deli gala inokapisi minasina kʹaliga.
22 Yaubada metoya ola peula ikatudoum availa availa matausina topapeula.
Tutala Yaubada bivitakaula - e matauna tomitugaga bikaliga.
23 Kidamwa Yaubada bitagwala bikoli matauna,
mitaga tuta komwaidona biiyausi wala matauna.
24 Tomitugaga la kaisisu bikobaluluva tuta pikekita wala,
e oluvi bimwailela makawala mnumonu;
kaina makawala taitu bitakapituni otutala tayoyuwa.
25 Ki, availa ibodi bikamitulaisi kidamwa gala bikaloubusisi makawala?
Availa idoki ulo biga sopawokuva wala?

m24:17 Maigana Sopara gala eiginisi baisa, mitaga tadoki wala eilivala biga mabigasina.