2
Guyau la mipuki baisa Yerusalem
1 Metoya Guyau ola gibuluwa dudubalela
ikuboli viloumwaidona Saiyoni.
E avaka visigala kala gigisa makawala labuma guyugwayula
bogwa leivigaki eimila dubilawawa wala.
E wa yam makwaina eigibuluwa
matauna isilavi la Bwala Kwebumaboma goli.
2 Guyau eikatudidaimi komwaidona mavilousina valu olopola Yuda,
gala wala deli la nokapisi.
Deli ivadidaimi makwaisina bolesi kabilia
mwada valu kala kabokwala.
Matauna iyomsili Yuda kabokaraiwaga
deli goli kala tokwaraiwaga komwaidosi.
3 Metoya ola gidimleiya matauna ikatudidaimi mina Isireli si peula.
Matauna ivigili yamala avai tuta kama tilaulasi leimakaiamasi.
La gidimleiya baisa yakamaisi makawala kovatala kova,
leivakakovi vavagi komwaidona.
4 Matauna leiyamwasaimasi okaiyala makawala goli tilaula yakamaisi.
Matauna ikatumati komwaidosi toulemasi,
matausina goli uulela ma mwasawasi.
E yakamaisi lakasisuaisi olopola Yerusalem
kalumkolaisi tigininila la gibuluwa makawala kova.
5 E Guyau eivigaki Isireli makawala tilaula,
e bogwa eikodidaimi mavilouna.
Makwaisina bolela kabilia deli makwaisina ligisa
ikodidaimi wala imoi iligaim.
Matauna bogwa eiyomiyuyu sainela tomotala Yuda.
6 E ikatudidaimi Bwala Kwebumaboma
makwaina ma kabotapwarorusi;
matauna bogwa eikatubodi makwaisina yam kwebumaboma
deli goli yam Sabate.
E guyoula valu deli tolula ilumkolaisi lutula la gibuluwa.
7 E Guyau bogwa eipaiki la kabogwabu lula
deli eisilavi la Bwala Kwebumaboma.
Matauna eiulisali tilaula bivakubalaisi kalila valu.
Mapaila matausina igovasi govala tomgwaga
ambaisa omitibogwa lakatitapwarorusi deli ma mwasawasi.
8 Guyau bogwa eitobu nanola paila kalila Saiyoni ibodi bidadaimi;
mapaila matauna ivisaikoli makwaisina
paila binikoli ammakawala kala siniveka kodadaimi.
E bolela vatoi makwaisina deli kalila valu
tuta baisa kwedidadaimi wala eikanukwenusi.
9 E kalapisilela bogwa eividuboli wawa,
e youdulela ikatumimisaisi wala.
Valu guyoula deli goli kaidadala valu
bogwa leikatupipaisi leilauwaisi okatupipi.
E Yaubada la Karaiwaga gala wala ivitulokisi,
deli tovitoubobuta gala wala avai kilisala igisaisi metoya baisa Guyau.
10 Tommoyela Yerusalem isikulukululusi wala opwaipwaia gala vitakaula,
e ikumsi koula deli isikamsi si saigala.
E tubovau vivila isikulukululusi wala.
11 Matagu bogwa eisupilaki valam,
e nanogu saina mmayuyugaga sainela.
Bogwa lasomata ninamwau,
paila ulo tomota bogwa eidaminasi.
Gugwadi deli pwapwawa eimitamata wala uwosi olopola valu.
12 Mesinaku bikapulokaisi baisa inisia kawasi,
“Bakam, bamom.”
Magudisina eiuwaki molu olopola valu
makawala matausina availa eikagagumasi;
E oyumasi wala inisia magudisina ikikaligasi goli.
13 O Yerusalem, ulo viloukeya Yerusalem, avai vavagi ibodi balivali?
Ammakawala bavigaki bavisimolaim?
Gala avai tuta availa ilumkoli mmayuyu
makawala yoku lokulumkoli lagaila.
Kam mmayuyu saina vakaigaga makawala goli bolita gala isim katupwaila.
Gala wala ambaisa m pikwaku.
14 Matausina m tovitoubobuta gala wala bivitokaisi tolosila si vitoubobuta, bisipulokaimsi wala;
si katuloluta ikatigamwaisi wala lopom
paila gala avai tuta ikamitulaisi m mitugaga.
Isinapwaimsi wala mwada gala bikaiki wowom paila bukuninavila.
15 Tomota bililoulasi bigigisaimsi deli wala si yousokana.
Matausina ikatugougeunasi deli gigilesi
avai tuta bigisaisi Yerusalem deli wowala eikaupuwopu.
E ililivalasi kawasi,
“Mwada mavilouwenala viloumatabwaila ke?
Deli mina watanawa eiyakawolaisi ke?”
16 Komwaidosi kam tilaula ikatudeuwaimsi
e deli si gibuluwa igigisaimsi wala.
Matausina ikapinumsi kasi gabula deli ikavitauwaisi kudusi
ilulukwaisi kawasi, “Bogwa takatudidaimisi!
Tapupuyaisi wala lagaila bogwa tatomgwagasi!”
17 E avaka Guyau eininamsi bivagi bogwa leivagi makawala.
matauna leikatudoumwaimasi gala wala deli la nokapisi,
makawala goli bogwa eilukwaibogwaimasi.
Ivigaki kama tilaulasi bitomgwagasi
deli goli bimwasawasi paila bogwa kamamasi.
18 O Yerusalem, ibodi wala kam kwali bidousi baisa Guyau!
E yumyam deli bugibogi ibodi mitilagim bititayelu wala
makawala sopi wa waya;
ibodi bukusomata valam deli goli ninamwau!
19 Bogi kwaitala kwaitala ibodi bukusivavila simalaula
e bukudoudou baisa Guyau;
kulupisau m nanamsa komwaidona
e bukukwayubabai baisa matauna kidamwa binokapisi litumwa -
ka, gugwadi molusaula wala eikikimati
ambaisa ambaisa okatugulugwelu keda!
20 Ka, Guyau! Avaka paila lokuyokili mitamaisi.
Nunumoya bogwa eikamkomasi litusia tatousi!
Tolula deli tovitoubobuta ikikatumataisi wala
olumoulela Bwala Kwebumaboma goli!
21 Tubovau deli tommoya makawala goli, ikikaligasi wala olopola valu.
Tubovau tauwau deli vivila, tilaula ikatumataisi metoya osi kema.
Yam makwaina m gibuluwa leikaloubusi
e yoku kukwatudoum matausina gala deli m nokapisi.
22 E kudou agu tilaula imaisi gulitinidesi
imwalaisi kalagila kabilia e ivaulaigusi ivapataigusi.
E gala availa ibodi bisakaula wa yam makwaina lokugibuluwa.
Ikatumataisi litugwa, matausina lavitubwi deli layebwaili.