27
Isakaisi Yesu baisa Pailato
(Mk 15.1; Lk 23.1-2; Yn 18.28-32)
1 Obulubuvisiga komwaidosi tolula kasi tokugwa deli kaidadala valu ikikeiwalasi gulitinidesi mwada bikatumataisi Yesu.
2 E iyuwolaisi Yesu, ivakoulisi e iuyokaisi tokwaraiwaga Pailato.
q Yudasa ikaliga
(VA 1.18-19)
3 Tutala tokwasesila Yudasa igisi bogwa ikamogaisi matauna, ininavila, ikaimili siliba kweluwotolu baisa tolula kasi tokugwa deli kaidadala valu,
4 ikaibiga, kawala, “Lamitugaga paila lakasali tobwaila bikaliga.”
Ikaibigasi, kawasi, “O, desi wala. Baisa yoku wala kam pakula.”
5 Yudasa ilavi siliba wa Bwala Kwebumaboma e isilavi matausina ila. E imwena wa kai ibuligigi kaiyola, ilou ikasinekukwa.
6 Mitaga tolula kasi tokugwa ikauwaisi siliba, ikaibigasi, “Baisa mapula buyavi, e gala ibodi Mosese la Karaiwaga
r kidamwa bitasailisi okabosakaila semakavi.”
7 Ininanamsasi e ikauwaisi siliba igimlokaisi kwabila yagala Tobubula Kulia mwada makubilana bivigakaisi togilagala kasi laka.
8 E mauula tuta baisa idouvilaisi makubilana Kubilela Buyavi.
9 E avaka Yeremaia tovitoubobuta ilivala
s gala isala, ikaibiga, kawala, “Mimilisi mina Isireli mwada bimapwaisi taitala tau, e mapula matauna siliba kweluwotolu. Mapaila ikauwaisi makwaisina,
10 igimolaisi kwabila yagala Tobubula Kulia, makawala Guyau ikaraiwogaigu.”
Pailato ikatupoi Yesu
(Mk 15.2-5; Lk 23.3-5; Yn 18.33-38)
11 E Yesu itotu omatala tokwaraiwaga, e tokwaraiwaga ikatupoi matauna, kawala, “Ki, yoku si giyouveka mina Yudia?”
Yesu iluki matauna, kawala, “Yokula lokukwaibiga.”
t 12 Mitaga tutala tolula kasi tokugwa deli kaidadala valu itabinakaisi matauna, gala imapu kwaitala biga.
13 Mapaila Pailato iluki matauna, kawala, “Ki, gala lokulagi kwaivila vavagi ikamitulaimsi?”
14 Mitaga Yesu gala ivitakauloki matausina, e gala kwaitala kamatula imapu; mapaila tokwaraiwaga saina itutu wowola.
Ikaraiwagasi Yesu bikaliga
(Mk 15.6-15; Lk 23.13-25; Yn 18.39—19.16)
15 Tokwaraiwaga la bubunela otutala Luvapela
u Pakala bitaneku baisa tobobawa avai tomipuki magisi.
16 E wa tuta matutowena isisu taitala tomipuki la sula kwaiveka, yagala Baraba.
17 Mapaila tutala isigugulasi, Pailato iluki matausina, kawala, “Availa magimi bataneku omitami? Kaina Baraba kaina Yesu idokaisi Keriso?”
v 18 Paila inikoli ikasalaisi matauna uula si pogi.
19 E tuvaila, tutala Pailato isili okaboyakala, la kwava iwitali biga baisa matauna, ikaibiga, kawala, “Taga bukuvagi avaka baisa tomitukwaibwaila matauna; paila saina mmayuyu lalumkoli lagaila paila matauna wa mimi.”
20 Tolula kasi tokugwa deli kaidadala valu itainonaisi tobobawa, kidamwa binigadasi bitaneku Baraba, e bikatumataisi Yesu. 21 E tuvaila tokwaraiwaga iluki matausina, kawala, “Kasitaiyu matausina availa magimi bataneku omitami?”
Ikaibigasi, kawasi, “Baraba.”
22 E Pailato iluki matausina, kawala, “Avaka bavigaki Yesu idokaisi Keriso?”
Komwaidosi matausina ikaibigasi, kawasi, “Kukwatukorosi matauna.”
23 Mitaga Pailato ikatupoi, kawala, “Avaka dimlela? Avai mitugaga leivagi?”
Mitaga saina minimani idouwaisi, kawasi, “Kukwatukorosi matauna.”
24 Pailato igisi gala ikalisau matausina, mitaga saina ikaninisisi. Mapaila ikau sopi, iwini yamala
w omitasi tobobawa, ikaibiga, kawala, “Gala agu pakula la kaliga matauna;
x yokomi wala kami pakula.”
25 E tomota komwaidosi ivitakaulokaisi, kawasi, “Desi wala! kama pakulasi la kaliga e litumaiasi kasi pakula.”
26 E itaneku Baraba baisa matausina; ikaraiwaga iwawaiyasi Yesu, oluvi ikasali kidamwa bikatukorosaisi matauna.
Tokwabilia ikatudeuwaisi Yesu
(Mk 15.16-20; Yn 19.2-3)
27 Tokwaraiwaga la tokwabilia ilauwaisi Yesu ola bwala tokwaraiwaga, ikatuyoulisi tokwabilia kasi boda omatala.
28 Ivililaisi kala kwama e ivisikomaisi kakapula yabweyani.
y 29 Ivilaisi doula kala butia isailisi okulula, e kai oyamala kakata. Itapopula kwetutusi, ikavisakaisi omatala, igugovaisi, kawasi, “Wo! si giyouveka mina Yudia.”
30 Igiusailisi matauna, e iyosisi kai ilopetaisi pwanetala.
31 E bogwa ikatudeuwaisi matauna, ivililaisi miyana kakapula e ivisikomaisi kala kwama; e ivakoulisi ivisunupuloiyaisi kidamwa bikatukorosaisi matauna.
Ikatukorosaisi matauna
(Mk 15.21-32; Lk 23.26-43; Yn 19.17-27)
32 Isusunapulasi, ibanaisi taitala guma Sairini
z yagala Saimoni; e iyosisi ikaraiwagasi bikeula Yesu la korosi.
a 33 E bogwa iviloubusisi mapilana baleku idokaisi Goligota (e kidamwa takatumikaisi, baisa Viluwela Pwaneta
b),
34 itagulikaisi waini deli kalula
c mwada bipilasaisi kala mmayuyu. E tutala bogwa imomkoli sitana, ipaiki gala magila bimom.
35 Ikatukorosaisi matauna; e ivilaisi kala kwama ikowobobutasi availa bikau avaka.
d 36 Oluvi isilaisi iyamataisi matauna.
37 Isailisi walakaiwa odabala kala tabinona, kawala, “Matauna Yesu si Giyouveka mina Yudia.”
38 E ikatukorosaisi deli matauna taiyu tolibulebu,
e taitala ola kakata, taitala ola kikiwama.
39 Matausina ililoulasi ititageunasi ibigigagaisi matauna,
40 e ikaibigasi, kawasi, “Ki, yoku bukukodidaimi Bwala Kwebumaboma e yam kwaitolu bukukwaliai? Kukwatumovaim titoulem; kidamwa yoku Yaubada Latula kubusi metoya wa korosi.”
41 Makawala goli tolula kasi tokugwa deli toninitalapula paila Karaiwaga deli kaidadala valu ikatudeuwaisi matauna, kawasi,
42 “Eikatumovi tomota ituwoli mitaga gala gagabila bikatumovi titoulela. Ki, matauna ma giyouvekasi yakamaisi mina Isireli? Kidamwa tuta matutona bibusi titoulela metoya wa korosi bitadubumaisi matauna.
43 Leidubumi Yaubada; ibodi tuta baisa Yaubada bikoli, kidamwa magila matauna; paila leikaibigi, kawala, ‘Yeigu Yaubada Latula.’ ”
44 E matausina tolibulebu goli leikatukorosaisi deli matauna ilulukwaisi matauna makawala.
Yesu ikaliga
(Mk 15.33-41; Lk 23.44-49; Yn 19.28-30)
45 Bogwa itowota kalasia e valu komwaidona idudubila igau ila itobala kalasia.
46 E bogwa itobala kalasia, Yesu kaigala kaigaveka idou obonasi mina Iberu, kawala, “Eli, Eli, lema sabakitani?”
f E baisa, “Ulo Yaubada, ulo Yaubada, avaka dimlela lokusilavaigu?”
47 Mimilisi matausina itotusi baisa, ilagaisi e ikaibigasi, kawasi, “Matauna idoudou baisa Ilaitia.”
g 48 E nanakwa taitala isakaula, ikau toutou, ividagu deli waini pwayuyu, e ibabi wa kai mwada bivimom.
49 Mitaga komwaidosi ikaibigasi, kawasi, “Desi, iga bitagisaisi kaina Ilaitia bima bikoli matauna.”
h 50 E Yesu iwaiweya e itugwali la baloma ikaliga.
51 E ka, Bwala Kwebumaboma kala taboda karekwa
i itavisiki yayu metoya walakaiwa e watanawa. E pwaipwaia ilikuliku, dakuna itavisisi.
52 Laka tuvaila ikapogegasi, e bidubadu totapwaroru tokwaligabogwa itokaiasi imovavausi.
53 E isunapulasi metoya okasi laka. E igau Yesu itokaia imovavau, matausina tokwaligabogwa iviloubusisi Valu Kwebumaboma,
j e iyoulapulasi baisa bidubadu.
54 Tutala kumatoula deli matausina iyamataisi Yesu igisaisi likuliku toyo avaka ikaloubusi, immakiusasi sainela, e ikaibigasi, kawasi, “Mokwitala matauna Yaubada Latula.”
55 E bidubadu vivila tuvaila itotusi kaduwonaku igigisaisi, minasina bogwa leibokulaisi Yesu metoyasi mapilana Galili, leiwotitalaisi matauna.
56 Mimilisi minasina igasi Meri Magidalini
k sola Meri inasi Yemesa deli Yosepa, toyo inasi Sebedi litula.
Yosepa ibaku Yesu
(Mk 15.42-47; Lk 23.50-56; Yn 19.38-42)
57 Isisu taitala tau saina bidubadu la guguwa. Matauna guma Alimatia
l e yagala Yosepa, e itoligalega baisa Yesu goli. Eikoyavi,
m 58 e matauna ilokaia Pailato, inigadi wowola Yesu. E Pailato ikaraiwaga bisakaisi matauna.
59 Yosepa ikau wowola, ikapoliki omwaikapula yamigileu yapupwakau,
60 ibaku ola laka titoulela; makwaina kwaivau e leikeli metoya odakuna;
n e ilopipili kwaitala dakuna kwaiveka owodola laka, e isilavi baisa.
61 Meri Magidalini
o sola Meri ituwoli
p isisuaisi baisa isilaisi owodola laka.
Toyausa iyausasi wa laka
62 Tutala bogwa leiwokuva Yamla Katubaiasa, e eiyam tolula kasi tokugwa toyo Parisi isigugulasi omatala Pailato,
63 e ikaibigasi, kawasi, “Tomoya! Kaluluwaisi tutala matauwena tosasopa isisu tomomova ikaibiga, kawala, ‘Yam kwaitolula batokaia bamovavau.’
64 Mapaila bukukwaraiwaga biyamataisi mokwita laka, igau yam kwaitolula; kaina la toligalega bilosi biveilauwaisi matauna, e bilivalasi baisa tomota, kawasi, ‘Bogwa leitokaia imovavau.’ E sopa makwaina ivabodanim bikalisau makwaina ikugwa.”
q 65 Pailato iluki matausina, kawala, “Kukwauwaisi
r mi toyausa; bogwa kukwatetasi yausa. Kulosi kuyausasi laka bibwaina.”
66 Mapaila ilosi, e ivigakaisi laka bibwaina; itakaibasaisi dakuna makwaina, e ikaraiwogaisi toyausa biyausasi.