2
Kabitam mapula
Latugu, kutakutu avaka lavitulokaim e gala avai tuta bukulumwelavi avaka lalukwaim bukuvagi. Kunakaigali avai kabitam e kuvigikoni bitapuloki nanom. E ibodi bukuyokakapisi paila ninitalapula deli bukukwayubabai paila katavatu. Kunevi paila makwaisina makawala kala nevi siliba kaina avai veiguwa kwekatupwana. E kidamwa bukuvagi makawala, bogwa bukubani ammakawala bukukukoli Guyau, e bukupeula kala nikoli Yaubada. E Guyau wala matauna kabitam kala tosaiki, e ninitalapula deli nikoli leimaima metoya baisa wala matauna. Matauna isisaiki pilasi deli kabokwala baisa tomota tomitukwaibwaila deli tokamokwita. Matauna ikoli availa availa matausina iuvagaisi bwaina baisa sesia, deli iyamati availa availa matausina itugwalaisi titoulesi baisa matauna.
Ka, kidamwa bukunakaigalaigu, bogwa bukunikoli avaka ibodi uvagila kala bwaina, deli duwosisia. E bogwa bukunikoli avaka ibodi bukuvagi. 10 E yoku bukukwabitam, m nikoli bivigaki m kwabomwasawa. 11 M kwatavatu deli m nikoli baisa bikolaimsi 12 deli bisilibodaimsi metoya avaka uvagila gaga. E vavagi makwaisina bivalailimsi metoya matausina eiyomatulasi pakula metoya osi bigatona - 13 matausina goli bogwa eisilavaisi bubunela mitukwaibwaila kidamwa bisisuaisi odudubila baisa mitugaga, 14 matausina ibanaisi si kabomwasawa paila biuvagaisi mitugaga deli iyebwailisi avai vavagi gagawokuva wala, 15 tomota matausina gala kabonakusi deli gala wala kasi dubumi.
16 E yokugwa gagabila bukukolaim baisa avaivila namitugaga, minawena ivigikoni kidamwa bitavili nanom metoya ola katudabuma, 17 minawena ilumwelavi wala la biga katotila kwebumaboma, e ivakikili wala la mwala. 18 E kidamwaga bukulokaia ola bwala, yoku bogwa bukuliloula okedala kaliga. Kidamwa bukulokaia makadana, e bogwa bukuvakatitaikina baisa wa Tuma. 19 Ka, matausina availa availa eilokaiasi minana, gala wala avai tuta bikaimilavausi. E matausina gala avai tuta bikaimilavausi baisa okedala momova. 20 Mapaila ibodaim bukusisu olopola mitukwaibwaila e bukuliloula osi deili tomitukwaibwaila. 21 Matausina tomitukwaibwaila - matausina tobubwaila - bisisuaisi baisa oda valusi. 22 Mitaga Yaubada bibisabu tomitugaga deli bilulu tosulosula metoya ovalu, makawala goli kala sabu mnumonu opwaipwaia.