49
Toninagowa idokaisi guguwa bidubadu mwada kasi katumova
1 Komwaidomi ka, kulagaisi baisa!
Mina watanawa komwaidomi, kulegasi.
2 Kulegasi, yokomi tovakaveka e deli goli tokikekita.
E yokomi isim dimlemi, deli yokomi gala dimlemi, kulegasi.
3 Bakaibigi mimilisi vavagi kala kateta mwau sainela.
Balivali mabigasina bigala kabitam.
4 Magigu bitaninamsaisi mimilisi bigivakalela valu.
Ka, bawai gita e deli goli wosila bakatumiki makwaisina.
5-6 Itoulaigusi tomitugaga,
matausina idokaisi si guguwa bidubadu mwada kasi katumova,
e ikamnumonaisi si veiguwa saina bidugaga.
E matausina agu tilaula itoulaigusi,
e bogwa laboda kabosilagi,
mitaga yeigu gala wala bakokola.
7 Gala gagabila taitala tomota bimapu la momova titoulela metoya ola guguwa.
Gala gagabila bisaiki Yaubada avaka bibodi mapula la momova.
8 Paila taitala tomota la momova mapula saina kwevakaigaga.
Gala gagabila tomota bisaili avai mapu
9 mwada bikaliduboli kala laka,
e bisisuga tomomova wala tuta gala biwokuva.
10 Komwaidodasi tanikolaisi kidamwa tokabitam bikaligasi,
e tuvaila tobubeikam deli toninagowa,
e, komwaidodasi goli bitakaligalabasi.
Da guguwasi komwaidona bitaligaimwaisi,
e tubudoiasi bikeulasi kasi bigukeya.
11 Tokwaliga kasi laka baisa si viloukeya e bisivagasisi baisa.
Baisa goli bisisuaisi tuta gala biwokuva,
kalubikoya goli omitibogwa isim si pwaipwaia.
12 Kaina taitala tomota saina todabala,
mitaga baisa gala wala bikoli la momova matauna.
Paila bogwa bikaliga wala, makawala goli avai mauna avai mauna.
13 Ka, kugisaisi avaka bikaloubusi baisa matausina
availa availa idubumaisi titoulesi wala.
E kugisaisi ammakawala bibodaisi kasi mwau matausina
availa availa ininaki luposi paila si guguwa bidubadu.
14 Paila kasi kamwaga bikaligasi makawala sipi,
e taitala yagala Kaliga matauna kasi toyamata.
Uwosi saina nanakwa bikaligeyai,
paila bogwa bisilavaisi si valu e bilokaiasi Tuma.
E tomitukwaibwaila bitomgwagasi odubasi matausina.
15 Mitaga Yaubada bogwa bikolaigu.
Matauna bikatumovaigu e gala baboda kaliga kala peula.
16 Kidamwa taitala tomota bibani la guguwa bidubadu,
e kaina bikatumkulovi la guguwa bibidubadu -
e taga bukunokubukubusi.
17 Ka, avai tuta bikaliga, gala gagabila guguwa bisoguguwi bilau mapilana Tuma.
Makwaisina gala wala deli bilau tomata osi valu.
18 Ilagoli taitala ininaki lopola paila la momova odabala pwaipwaia,
e deli ibani kala yakaula paila uula toliguguwa bidubadu matauna,
19 ka, avai tuta bikaliga, bogwa bilokaia ambaisa komwaidosi tubula ilobogwasi,
mapilana valu kala dudubila gala biwokuva, bikanigaga wala.
20 Kaina taitala tomota saina todabala, mitaga baisa gala wala bikoli la momova matauna.
Paila bogwa bikaliga wala, makawala goli avai mauna avai mauna.