107
Kala kavisi Yaubada tomitakwai
1 “Bitanokagutokisi baisa Guyau, paila matauna tomitakwai.
La yebwaili gala wala biwokuva, bikanigaga goli.” 107.1 1 Lil 16.34; 2 Lil 5.13; 7.3; Esi 3.11; Sam 100.5; 106.1; 118.1; 136.1; Yer 33.11
2 E komwaidomi availa availa Guyau eikatumovi,
ibodaimi bukutakutusi biga makwaisina e bukuvigakaisi kala yakaula Guyau.
Bogwa eikolaimi metoya kami tilaula.
3 e leimaiyaimi metoya osi valu togilagala,
metoya opilibomatu deli opilikwaibwaga, metoya opiliyavata deli opilibolimila.
4 Mimilisi iwowausi oviloupakala, e gala avai keda ambaisa.
Gala gagabila bibanaisi avai valu kidamwa bimili valusi.
5 Ikamolusi ikadakasi,
e si pikwaku komwaidona iwokuva wala.
6 E oluvi metoya osi tuta mwau idousi baisa Guyau,
e ikoli matausina metoya okasi mmayuyu.
7 Ivakadi matausina wa keda duwosisia,
e iviloubusisi ambaisa gagabila bimili valusi,
8 Mapaila ibodi binokagutokisi baisa Guyau paila la mitakwai,
paila vavagi makwaisina saina kabokatubau avaka eivagi paila matausina.
9 E Guyau ivimom matausina ikadakasi,
e isaiki vavagi bwaina baisa tokamolu e ikomatasi goli.
10 Mimilisiga tomota isigagasi odudubila saina dubilikitakita,
tokatupipi goli, e kasi katupipi iyomiyuyu matausina,
11 paila uula eikosomapwaisi Yaubada Topeuligaga la karaiwaga makwaisina,
e gala wala bilagaisi la katuloluta.
12 Eisomatasi osi paisewa mwau.
Bikapusisi opwaipwaia, e gala availa bipilasi matausina.
13 E oluvi metoya osi tuta mwau idousi baisa Guyau,
e ikoli matausina metoya okasi mmayuyu.
14 Ikatusunupuloi matausina metoya odudubila, saina dubilikitakita,
e kasi katupipi tanumnumta ikatumkumku.
15 Mapaila ibodi binokagutokisi baisa Guyau paila la mitakwai,
paila vavagi makwaisina saina kabokatubau avaka eivagi paila matausina.
16 Ikodidaimi kala lulu bwala barasiwokuva wala
deli ikomtumtu makaisina tanumnumta.
17 Mimilisiga toninagowa eibodaisi mmayuyu mapula si sula,
e tuvaila mapula si mitugaga.
18 Igisaisi kaula iminineiki ninasi
paila bogwa eiyayayasi wa laka.
19 E oluvi metoya osi tuta mwau idousi baisa Guyau,
e ikoli matausina metoya okasi mmayuyu.
20 Iyomovi matausina metoya ola karaiwaga,
e ikaliduboli kasi laka.
21 Mapaila ibodi binokagutokisi baisa Guyau paila la mitakwai,
paila vavagi makwaisina saina kabokatubau avaka eivagi paila matausina.
22 Ibodi bigabwaisi lula bivigakaisi si nokagutoki baisa Yaubada,
e deli wosila mwasawa bikamitulaisi komwaidona avaka eivagi paila matausina.
23 Mimilisiga ikokewasi osi waga ikwaidadinasi
e ititakunasi kʹasi metoya toluguta la paisewa.
24 Igisaisi avaka Guyau gagabila bivagi,
avaka avaka eivagi obolita saina kabokatubau.
25 Karaiwaga e utuyagila itokaia
e kaisai saina ikaipolu.
26 Kaisai ilupi waga ilau walakaiwa,
e iyosilisali ilau watanawa.
Toluguta ibodaisi mwau sainela e iwokuva wala si tuvaluwa.
27 Ikatupupeili deli isilibeibeusi makawala matausina eimomsi kabotutu
e si luguta komwaidona gala avaka dimlela.
28 E oluvi metoya osi tuta mwau idousi baisa Guyau,
e ikoli matausina metoya okasi mmayuyu.
29 Ivigaki utuyagila biniwavila,
deli kaisai iluvitaitaia wala.
30 Toluguta imwasawasi paila niwavila,
e imai matausina biwoulasi okabokota makwaina ambaisa magisi.
31 Mapaila ibodi binokagutokisi baisa Guyau paila la mitakwai,
paila vavagi makwaisina saina kabokatubau avaka eivagi paila matausina.
32 Ibodi bikamitulaisi matauna Tovakaigaga osi siguguladBaisa otutala tapwaroru; kugisi Sam 26.12. tomota
e biyakawolaisi matauna omitasi kaidadala si valu.
33 Guyau ivigaki waya bimada,
e sakala bisimwaisi titayelu.
34 Ivigaki kwabila kubilumalala bimila kubiliyayana wala,
paila uula mapilana valu kala tosisu saina tomitugaga.
35 Ivigaki viloupakala bidavila bimila katuwotu
e ambaisa pwaipwaia obidapakala ivigaki sopi igigibwabula.
36 Itagwala tonamakava bimili valusi mapilana
e ibudaisi si valu paila bisisuaisi baisa,
37 Ibigubagulasi e ivalaisi matamna waini,
e oluvi itayoyuwasi saina kabinai.
38 Guyau imitukwai la tomota e iunigeyaisi litusia bidubadu
e ivigaki si bulutuvalu bibidubadu e gala bibusi kasi bawa.
39 Tutala Yaubada la tomota imamasi deli kasi mmosila
metoya lamadada saina mwau deli mmayuyu,
40 e Yaubada ikaluwou matausina tolamadada
e ivaleili biwowausi wala oviloupakala ambaisa gala isim keda.
41 Mitaga ikoli tonamakava metoya osi ninamwau,
e ivigaki osi kaukweda biunigeyaisi litusia bidubadu makawala si yawa bulutuvalu.
42 Tomitukwaibwaila igisaisi baisa e imwasawasi,
mitaga komwaidosi tomitugaga ikapatu wala udosi.
43 Ibodi tokabitam bininamsaisi vavagi makwaisina,
e ibodi bisimokwitasi Guyau la mitakwai.