119
Guyau la Karaiwaga
1 Availa availa matausina gala isim pikolela uwosi, matausina goli imwasawasi.
Matausina ibubunasi makawala Guyau la Karaiwaga.tBaisa mapilasina buki pilalima Vitouula bila Karaiwaga Kwaiyuwela.
2 Availa availa matausina ibokulaisi la karaiwaga makwaisina matausina goli imwasawasi.
Matausina ikabikuwolaisi matauna deli ninasi komwaidona.
3 Matausina gala avai tuta iuvagaisi sula,
e ililoulasi ola keda Guyau.
4 Mwa Guyau! Lokusakaimasi makwaisina m kwaraiwaga
e lokulukwaimasi bakakabikuwolaisi makwaisina deli ma kimadagisi.
5 Saina apikwaku mwada bakimadagi
avai tuta bauvagi makawala m kwatuloluta.
6 Kidamwa banakaigali komwaidona m kwaraiwaga makwaisina
e yeigu gala wala bammosila.
7 Avai tuta kidikedala m kwaraiwaga duwosisia bikabitutukwaigu,
e bogwa bayakawolaim deli nanogu kala migileu.
8 Bogwa bakabikuwoli m kwaraiwaga makwaisina.
Gala avai tuta bukusilavaigu.
Akabikuwoli Guyau la Karaiwaga
9 Ammakawala taitala totubovau ibodi biyamati la bubunela bimigileu wala?
E ibodi bikabikuwoli makwaisina m kwaraiwaga.
10 Avigikoni bawotitalaim metoya onanogu komwaidona.
Kukolaigu mwada taga bakoulovi m kwatuloluta.
11 Ayamati m Kwaraiwaga onanogu wala,
kidamwa gala bamitugaga baisa yoku.
12 Mwa Guyau! Aiyakawolaim.
Anigadaim bukukwatululutaigu.
13 Yeigu balivilivau
komwaidona karaiwaga makwaisina lokusaiki m tomota.
14 Kaina bamwasawa kidamwa bayosi ulo guguwa bidubadu,
mitaga ulo mwasawa bisiligaga sainela kidamwa babokuli makwaisina m kwaraiwaga!
15 Atitakutu makwaisina m kwatuloluta
e avitusi m vituloki.
16 M kwaraiwaga makwaisina ivigaki ulo mwasawa,
e gala wala balumwelavi makwaisina.
Guyau la Karaiwaga baisa kabomwasawa
17 Kumitukwaibwailigu yeigu m touwata,
mapaila baisa basisu tomomova e bakabikuwoli m biga.
18 Kuulaim matagu, kidamwa goli bagisibwailaki
avaka kala kamokwita m Kwaraiwaga.
19 Yeigu asisu baisa odabala pwaipwaia tuta pikekita wala,
e taga bukukwatupwani makwaisina m kwaraiwaga baisa yeigu.
20 Saina iyovi nanogu sainela,
paila magigu banikoli m kwaraiwaga tuta komwaidona.
21 Kukwamitilaki availa availa matausina ninasi walakaiwa,
e kubuloti availa availa matausina ikoulovaisi makwaisina m kwaraiwaga.
22 Kutanekwaigu metoya osi bigigaga deli osi yousokana,
paila uula auvagi makawala makwaisina m kwaraiwaga.
23 Tokwaraiwaga isigugulasi e ikeiwalaigusi,
mitaga yeigu batitakutu m kwatuloluta.
24 M kwatuloluta ivigaki ulo kabomwasawa,
e makwaisina makawala goli agu tokatayuvisa.
Apwaitukula paila bakabikuwoli Guyau la Karaiwaga
25 Yeigu ikalisauwaigusi e akanukwenu opwaipwaia.
Mapaila kuyomovivauwaigu makawala avaka bogwa lokukwatotila.
26 Yeigu akamituli komwaidona avaka bogwa lavagi, e yoku kuvitakaulokaigu.
Mapaila kukwatululutaigu.
27 Kupilasaigu e gagabila bitapuloki nanogu makwaisina m kwaraiwaga,
e iluyelu nanogu paila m vituloki saina kabokatubau.
28 Yeigu ninamwau wala iyomami wowogu.
Mapaila kukwatupewolaigu makawala avaka bogwa lokukwatotila.
29 Kukolaigu mwada taga basula ogu keda,
e om bobwailila kuvitulokaigu m Kwaraiwaga.
30 Yeigu bogwa lanagi paila bakabikaula,
deli bogwa laligimlili m kwaraiwaga.
31 Mwa Guyau! Yeigu bogwa labokuli m kwatuloluta,
e taga kutagwala availa biyomsilaigu.
32 Yeigu bapwaitukula paila babokuli makwaisina m kwaraiwaga,
paila yoku bukukwatumkulovi ulo nikoli.
Nigada paila nikoli
33 Mwa Guyau! Kuvitulokaigu uulotoula makwaisina m kwaraiwaga,
kidamwa bakabikuwoli makwaisina tuta komwaidona.
34 Kukwatumiki m Kwaraiwaga baisa yeigu, e bakabikuwoli wala,
e bavagi makwaisina deli nanogu komwaidona.
35 Kuvigakaigu bakabikuwoli m kwatuloluta,
uula wala metoya makwaisina abani ulo mwasawa.
36 Gala magigu bidubadu ulo guguwa.
Kuvigaki nanogu komwaidona kidamwa bakabikuwoli makwaisina m kwaraiwaga.
37 Kuyamataigu mwada taga bikau nanogu avai vavagi makwaisina gala isim dimlesi.
Kuvagi bwaina baisa yeigu makawala goli m biga katotila.uKuvagi bwaina baisa yeigu makawala goli m biga katotila. Gagabila bitagini, “Kuyomovaigu tutala aliloula om keda.”
38 Kuvagi makawala m biga katotila baisa yeigu m touwata -
biga katotila makwaina lokuvagi baisa matausina availa availa ikabikuwolaimsi.
39 Kukolaigu metoya bigigaga makwaisina lakukoli.
Isa bwainigaga m kwaraiwaga.
40 Magigu bakabikuwoli m karaiwaga makwaisina,
e bukusakaigu ulo momova kwaivau, paila yoku tomitukwaibwaila.
Kala dubumi Guyau la Karaiwaga
41 Mwa Guyau! Kuvitulokaigu kala vakaila m yebwaili paila yeigu,
e bukukwatumovaigu makawala goli m biga katotila.
42 Oluvi yeigu ibodi bamapu si biga matausina ibigigagaigusi,
paila uula bogwa ladubumi m biga.
43 Kupilasaigu mwada tuta komwaidona balivala biga mokwita wala,
paila uula ulo pikwaku baisa wala m kwaraiwaga.
44 Yeigu tuta komwaidona bakabikuwoli m Kwaraiwaga,
tuta gala biwokuva, gala biwokuva.
45 Yeigu gala avaka biyomi wowogu,
paila uula bogwa lavigikoni kidamwa bakabikuwoli makwaisina m kwaraiwaga.
46 Yeigu bakamituli m kwaraiwaga makwaisina baisa gweguya,
e gala wala bammosila.
47 Kala kabikaula m kwaraiwaga makwaisina ivigaki ulo kabomwasawa,
paila uula yeigu ayebwaili makwaisina.
48 Yeigu akamiabi deli ayebwaili m kwatuloluta.
Mapaila bogwa biiluyelu nanogu paila m kwatuloluta.
Aninatotila baisa Guyau la Karaiwaga
49 Kululuwai m biga katotila baisa yeigu m touwata.
Makwaina goli isakaigu ulo pikwaku.
50 Deli goli ogu tuta mwau kuvisimolaigu,
paila m biga katotila eisakaigu ulo momova.
51 Matausina ninasi walakaiwa tuta komwaidona iyosokanaigusi,
mitaga m Kwaraiwaga gala wala asilavi.
52 E Guyau aluluwai m kwaraiwaga makwaisina omitibogwa,
e tuta baisa makwaisina ivisimolaigu.
53 Avai tuta agisi tomitugaga iyogwalaisi m Kwaraiwaga,
e saina agu leiya goli.
54 Ogu tuta baisa odabala pwaipwaia,
yeigu abutubutu wosi paila wala makwaisina m kwaraiwaga.
55 E wa bogi aluluwaim,
e Guyau aninanamsa paila m Kwaraiwaga.
56 Ulo kabomwasawa wala,
baisa bakabikuwoli m kwaraiwaga makwaisina.
Atugwalaigu baisa Guyau la Karaiwaga
57 Mwa Guyau! Kammwaleta wala yoku magigu,
Yeigu bogwa lakatotila mwada bakabikuwoli m biga.
58 Ayokakapisi baisa yoku kidamwa bukunokapisaigu,
makawala goli m biga katotila.
59 Bogwa lavitoki tolosila ulo bubunela.
e deli goli akatotila babokuli m kwatuloluta.
60 Bananakwa goli, galaga baluvatuta,
e bakabikuwoli makwaisina m kwaraiwaga.
61 Tomitugaga bogwa eileiyasi agu sikula
mitaga gala balumwelavi m Kwaraiwaga.
62 Olubulotoula yeigu amamata e asimalaula mwada bayakawolaim,
paila kidikedala m kwaraiwaga duwosisia.
63 Komwaidosi matausina iuwotitalaimsi,
deli goli komwaidosi matausina ikabikuwolaisi makwaisina m kwaraiwaga,
e mabudona goli lavigaki lubaigwa.
64 Mwa Guyau! M mitakwai ivakasuwoki wala valu watanawa.
E magigu wala bukuvitulokaigu m kwatuloluta.
Guyau la Karaiwaga veiguwatoula
65 Mwa Guyau! Bogwa lokuvagi makawala m biga katotila,
e bogwa lokuvagi bwaina baisa yeigu m touwata.
66 Kusakaigu kabitam deli ninitalapula,
paila adubumi wala m kwaraiwaga makwaisina.
67 Omitibogwa lavagi sula, e yoku lokumipukwaigu,
mitaga baisa tuta bogwa lakabikuwoli m biga.
68 Yoku saina bwaina e saina toninabwaila yoku,
e bukukwatululutaigu makwaisina m kwaraiwaga!
69 Matausina ninasi walakaiwa bogwa eisipulokaigusi,
mitaga onanogu komwaidona akabikuwoli m kwatuloluta.
70 Matausina tomota gala wala avaka itapuloki ninasi,
mitaga yeigu abani m Kwaraiwaga ulo kabomwasawa.
71 E agu mipuki makwaina eipilasaigu wala,
paila ivigakaigu batakutu m kwaraiwaga makwaisina.
72 Makwaina Karaiwaga bogwa lokusakaigu kala nanamsa saina wala isiligaga baisa yeigu,
e ikalisau komwaidona veiguwala valu watanawa.
Guyau la Karaiwaga kala duwosisia
73 Yoku kububulaigu, deli kukolaigu.vdeli kukolaigu. Gagabila bitagini “deli kuyoudulaigu.”
Mapaila kusakaigu kabitam, kidamwa batakutu m kwaraiwaga makwaisina.
74 Matausina availa availa itemmalaimsi bigigisaigusi deli si mwasawa,wPaila bigisaisi ammakawala Yaubada eimitukwaii matauna.
paila uula adubumi avaka m biga katotila.
75 Mwa Guyau! Bogwa anikoli m kwaraiwaga duwosisia,
e lokumipukwaigu, paila yoku tokimadagi.
76 Kutugwali m mitakwai bivisimolaigu,
makawala bogwa lokukwatotila baisa yeigu m touwata.
77 Kunokapisaigu, e yeigu basisu tomomova,
paila uula m Kwaraiwaga iyomwasali nanogu.
78 Ibodi matausina ninasi walakaiwa bimmosilasi paila si tabinona sasopa baisa yeigu.
Mitaga yeigu aiyenona wala m kwatuloluta.
79 Ibodi matausina ititemmalaimsi bimakaiagusi,
komwaidosi matausina availa availa ikatetasi makwaina m kwaraiwaga.
80 Ibodi yeigu bakabikuwoli m kwatuloluta, e gala bisim pikolela wowogu,
mapaila gala bibodi bamama e bivigaki agu mmosila.
Nigada paila katumova
81 Mwa Guyau! Bogwa lasomata latutulaim paila bukukwatumovaigu,
paila yeigu adubumi wala m biga.
82 Matagu bogwa isomata vatoi paila avaka bogwa lokukwatotila,
e tuta tuta anigadaim kawagu, “Ki, avai tutaga bukupilasaigu?”
83 Yeigu makawala wawa wala, gala isim dimlegu,
mitaga gala wala alumwelavi makwaisina m kwaraiwaga.
84 Ammakawala kala kaduwonaku batulotula tuvaila?
E avai tuta bukumipuki matausina eilamidadaigusi?
85 Tauwau tokaluvalova matausina gala ikabikuwolaisi m Kwaraiwaga.
Bogwa eileiyasi agu sikula metoya nobwala eikelaisi.
86 Komwaidona m kwatuloluta ibodi wala bakadubumaisi.
Mwa! Kupilasaigu metoya tomota matausina eilamidadaigusi metoya osi sopa.
87 Matausina bogwa wala makateki bipeulasi e bikatumataigusi.
Mitaga yeigu gala wala basim pwaitukula paila m kwaraiwaga makwaisina.
88 Paila uula yoku tomitakwai kumitukwaibwailigu,
e gagabila yeigu bakabikuwoli makwaisina m kwaraiwaga.
Kala dubumi Guyau la Karaiwaga
89 Mwa Guyau! M biga gala biwokuva, bikanigaga goli,
e baisa ikanigaga wala wa labuma.
90 E m kimadagi bisetuwoli goli oluwalaisi tubwa komwaidona.
Yoku bogwa kusaibogwi valu watanawa okabala, e makawala goli ikanuvagasi.
91 E vavagi komwaidona eikanuvagasisi omitibogwa e leima lagaila,
uula wala makwaisina m kwaraiwaga, paila komwaidona makwaisina iwotitalaimsi goli.
92 Ulo mwasawa uulotoula m Kwaraiwaga.
Kidamwa gala makawala, e yeigu bogwa bakaliga metoya ogu mmayuyu.
93 Yeigu gala avai tuta bakilavi m kwatuloluta,
uula metoya baisa makwaisina yoku bogwa lokuyomovaigu.
94 Yeigu goli m vavagi - e, kukwatumovaigu!
Bogwa lavigikoni mwada bakabikuwoli makwaisina m kwaraiwaga.
95 Tomitugaga eitutulaigusi wala mwada bikatumataigusi,
mitaga ibodaigu wala baiyenona m kwaraiwaga makwaisina.
96 E bogwa eitapuloki nanogu kidamwa vavagi komwaidona isim kalitulesi,
mitaga makwaisina m kwaraiwaga bwainawokuva wala.
Ayebwaili Guyau la Karaiwaga
97 Saina ayebwaili m Kwaraiwaga.
Yam kwemwaidona aiyenona wala paila makwaina.
98 Makwaisina m kwaraiwaga isisu onanogu tuta komwaidona.
Ipilasaigu e ulo kabitam ikalisau si kabitam agu tilaula.
99 Ulo kateta ikalisau komwaidosi agu tovituloki,
uula aiyenona wala m kwatuloluta.
100 Ulo kabitam ikalisuwoli tommoya si kabitam,
uula akabikuwoli makwaisina m kwaraiwaga.
101 Bogwa lapaiki komwaidona mitugaga,
uula mwada bakabikuwoli m biga.
102 Gala goli akilavi m kwatuloluta,
uula yoku titoulem wala agu tovituloki.
103 Kakamwenala m kwatuloluta saina simokainia,
ikalisau kitorina kala simokainia.
104 Abani kabitam metoya om kwaraiwaga makwaisina
e mapaila bogwa lapaiki mitugaga komwaidona.
Guyau la Karaiwaga ititapaidasi
105 M biga ikugwaiyaigu makawala kaitapa omatagu,
e ivakadaigu makawala lumalama ititapi ulo keda.
106 Bogwa bavagi makawala ulo biga katotila saina mwau,
kidamwa bakabikuwoli m kwatuloluta duwosisia.
107 E Guyau, laboda mmayuyu saina mwaugaga.
Kukwatumovaigu, makawala lokukwatotila bukuvagi.
108 Mwa Guyau! Bukulagi ulo nigada nokagutoki,
e bukuvitulokaigu makwaisina m kwaraiwaga.
109 Tuta komwaidona abudoboda kabosilagi,xabudoboda kabosilagi.Gagabila bitagini “asisu olopola kaliga”.
mitaga gala wala alumwelavi m Kwaraiwaga.
110 Tomitugaga ileiyasi agu sikula,
mitaga gala wala akoulovi makwaisina m kwaraiwaga.
111 M kwatuloluta baisa ulo kaikeya.
Makwaisina goli kaiyomwasalela nanogu.
112 Bogwa lanagi mwada bakabikuwoli makwaisina m kwaraiwaga,
bila kala kalitutila wala bakaliga.
Guyau la Karaiwaga kabokwala
113 Yeigu mina kukologu wala matausina gala ininatotilasi baisa yoku,
mitaga ayebwaili wala m Kwaraiwaga.
114 Yoku wala agu taboda deli agu tokwala,
mapaila apikwaku wala m biga katotila.
115 Yokomi tomitugaga kusilavaigusi wala.
Yeigu bogwa bakabikuwoli ulo Yaubada la karaiwaga makwaisina.
116 Bukusakaigu peula, makawala m biga katotila, e bamova goli,
e taga kutagwala ulo pikwaku biyomwau nanogu.
117 Mwa! Kuyosaigu e bogwa bakwala,
e yeigu tuta komwaidona banakaigali m kwaraiwaga makwaisina.
118 Yoku kupaiki availa availa matausina ikoulovaisi makwaisina m kwaraiwaga.
Si katuduvidavi gala wala isim dimlela.
119 Yoku kuvigaki matausina tomitugaga makawala wawa wala.
Mapaila baisa, yeigu ayebwaili wala m kwatuloluta.
120 Yeigu isim agu kokola paila uula wala yoku.
Makwaisina m kwaraiwaga wala ibulukukolaigu sainela.
Kala kabikaula Guyau la Karaiwaga
121 Yeigu bogwa lavagi avaka duwosisia deli bwaina.
Taga bukusilavaigu mwada agu tilaula biyosaigusi.
122 E kukwatotila mwada bukupilasaigu yeigu m touwata,
e taga bukutagwala tokaluvalova bilamidadaigusi.
123 Matagu bogwa eisomata vatoi paila m kwatumova bipilasaigu,
paila m kwatumova makwaisina bogwa lokukwatotila.
124 Kuvigakaigu makawala m mitakwai,
deli bukukwatululutaigu makwaisina m kwaraiwaga.
125 Yeigu goli m touwata, mapaila kusakaigu ninitalapula,
e igagabila banikoli makwaisina m kwaraiwaga.
126 Mwa Guyau! Baisa tuta m tuta paila bukuvagi avaka,
paila tomota ikikoulovaisi m Kwaraiwaga.
127 Yeigu ayebwaili goula sitana wala,
e goula saina mwau mapula ayebwaili,
mitaga ulo yebwaili paila makwaisina m kwaraiwaga saina siligaga goli.
128 E mapaila abokuli komwaidona m kwatuloluta,
e apaikiga komwaidona keda kadasulosula.
Nanogu mwada bakabikuwoli Guyau la Karaiwaga
129 Makwaisina m kwaraiwaga saina kabokatubau,
e akabikuwoli makwaisina metoya onanogu komwaidona.
130 M biga kala katumiki ivigaki makawala kaitapa,
eivigaki tobubeikam bibanaisi si kabitam.
131 Saina magigu balagi makwaisina m kwaraiwaga,
e atiliawai wala paila saina magigu sainela makwaisina.
132 Kutovilakaigu e bukunokapisaigu,
makawala goli kuvigaki komwaidosi matausina iyebwailimsi.
133 Makawala m biga katotila, kukolaigu mwada taga bakapusi.
Taga bukutagwala mitugaga bikalisauwaigu.
134 Bukukolaigu metoya matausina ilamidadaigusi,
kidamwa bakabikuwoli m kwaraiwaga makwaisina.
135 Om mitakwai bukusividulaigu
e bukukwatululutaigu makwaisina m kwaraiwaga.
136 Mitilagigu ibubusi makawala waya,
paila tomota gala bikabikuwolaisi m Kwaraiwaga.
Yaubada la Karaiwaga kala duwosisia
137 Mwa Guyau! Yoku tomitukwaibwaila
e m kwaraiwaga makwaisina duwosisia goli.
138 Karaiwaga makwaisina lokusakaimasi
kibobuta goli deli duwosisia.
139 Ulo gibuluwa ilululu olopogu makawala kova,
paila agu tilaula eiligaimwaisi m kwaraiwaga makwaisina.
140 Kala kamokwita m biga katotila.
Yeigu saina ayebwaili makwaina.
141 Yeigu gala avaka agu yeiwau e ikaluwouwaigusi wala,
mitaga gala wala akilavi m kwaraiwaga makwaisina.
142 M mitukwaibwaila bikanigaga goli,
e m Kwaraiwaga tuta komwaidona mokwitawokuva wala.
143 Tuta komwaidona imomwau nanogu deli anokubukubu,
mitaga m kwatuloluta iyomwasalaigu goli.
144 M kwatuloluta tuta komwaidona duwosisia.
Bukusakaigu ninitalapula, e bogwa basibwabwaila goli.
Nigada paila kwala
145 Mwa Guyau! Onanogu komwaidona adou baisa yoku.
Kumapu ulo dou e bakabikuwoli makwaisina m kwaraiwaga!
146 Adou baisa yoku.
Kukwatumovaigu, e bavagi makawala m kwaraiwaga makwaisina.
147 Igau gala biyamtatoula adou baisa yoku paila pilasi.
Apikwaku goli m biga katotila.
148 Bogi komwaidona yeigu ammamata,
e aiyenona paila m kwatuloluta.
149 Mwa Guyau! Kunakaigalaigu, kunokapisaigu,
kukoli ulo momova, paila m mitakwai gala kala kalitutila.
150 Agu tolamadada bogwa ivakatitaikinasi wala,
matausina gala avai tuta ivagaisi makawala m Kwaraiwaga.
151 Mitaga yoku kuvakatitaikina baisa yeigu.
Mwa Guyau! Komwaidona m kwaraiwaga makwaisina ikanabogwasi wala.
152 Tuta omitibogwa atakutu wala m kwatuloluta.
Lokuvigaki makwaisina bikanuvagasi tuta gala biwokuva.
Kayubabai paila pilasi
153 Mwa Guyau! Kugisi kagu mmayuyu e kukwatumovaigu,
paila yeigu gala wala akilavi m Kwaraiwaga.
154 Kupilasaigu ogu wotetila, deli kutanekwaigu.
Kukwatumovaigu makawala bogwa lokukwatotila.
155 E tomitugaga gala wala bukukwatumovi,
paila uula gala ikabikuwolaisi makwaisina m kwaraiwaga.
156 Mitaga yoku Guyau m nokapisi saina vakaigaga.
Kunokapisaigu e kuyomovaigu.
157 Agu tilaula deli agu tolamadada saina bidugaga,
mitaga yeigu gala wala basim kwabikaula baisa makwaisina m kwaraiwaga.
158 Avai tuta bagisi matausina eiyogwalaisi m kwaraiwaga, yeigu saina wala agu leiya,
paila uula gala wala ivagaisi makawala makwaisina m kwaraiwaga.
159 Mwa Guyau! Kugisi ammakawala layebwaili m kwatuloluta.
Yoku m yebwaili gala avai tuta bukukwatumapu, mapaila kukwatumovaigu.
160 M Kwaraiwaga uulotoula baisa kamokwita,
e komwaidona m kwaraiwaga duwosisia, makwaisina kwekanuvagasi goli.
Katalova paila Guyau la Karaiwaga
161 Topeuligaga gala dimlela iwaigusi goli,
mitaga yeigu akamiabi m Kwaraiwaga.
162 Ulo mwasawa gala bitakaibiga, paila uula goli makwaisina m biga katotila,
e ulo mwasawa makawala matauna ibani veiguwa makwaina mapula saina mwaugaga.
163 Yeigu kukologu deli saina agu leiya paila sasopa komwaidona,
mitaga yeigu ayebwaili m Kwaraiwaga.
164 Yam kwaitala kwaitala yeigu asivalima asivayu anokagutoki baisa yoku,
paila m kwaraiwaga duwosisia.
165 Matausina availa availa iyebwailisi m Kwaraiwaga bogwa ibanaisi kabokwala mokwita,
e gala avai vavagi igagabila bivakapusii matausina.
166 E Guyau latutulaim wala paila bukukwatumovaigu,
e auvagi makawala makwaisina m Kwaraiwaga.
167 Yeigu akabikuwoli makwaisina m kwaraiwaga,
e ayebwaili metoya onanogu komwaidona.
168 Yeigu akabikuwoli makwaisina m kwaraiwaga deli m kwatuloluta,
e yoku kugigisi komwaidona avaka avaka auvagi.
Nigada paila pilasi
169 Mwa Guyau! Kutagwala bukulagi ulo dou paila pilasi!
Kusakaigu ninitalapula makawala bogwa kukwatotila.
170 Mwa! Kunakaigali ulo nigada,
e kukwatumovaigu makawala bogwa lokukwatotila.
171 Yeigu tuta komwaidona baiyakawolaim wala,
paila uula kukwatululutaigu makwaisina m kwaraiwaga.
172 Yeigu bawosi butula m Kwaraiwaga
paila m kwaraiwaga makwaisina duwosisia.
173 Ibodi tuta komwaidona bukukwatubaiasa paila bukupilasaigu,
paila uula abokuli makwaisina m kwaraiwaga.
174 Mwa Guyau! Saina magigu sainela m pilasi bikatumovaigu,
paila abani ulo mwasawa metoya om Kwaraiwaga.
175 Mwa! Kusakaigu ulo momova, e gagabila bayakawolaim.
Ibodi m kwatuloluta bipilasaigusi.
176 Yeigu awowau makawala natana sipi eitamwau,
mapaila kuma kunevaigu yeigu m touwata.
Paila yeigu gala wala akilavi makwaisina m kwaraiwaga.
t119:1 Baisa mapilasina buki pilalima Vitouula bila Karaiwaga Kwaiyuwela.
u119:37 Kuvagi bwaina baisa yeigu makawala goli m biga katotila. Gagabila bitagini, “Kuyomovaigu tutala aliloula om keda.”
v119:73 deli kukolaigu. Gagabila bitagini “deli kuyoudulaigu.”
w119:74 Paila bigisaisi ammakawala Yaubada eimitukwaii matauna.
x119:109 abudoboda kabosilagi.Gagabila bitagini “asisu olopola kaliga”.