WAHA RARA
MITI RAŊɊAnere papia qizec namba 2 irec ʒâŋe WAHA RARA iŋuc fuakac. Ʒâŋe i gaŋ 13 â gaŋ 19 ombâŋne 1 ira fuakac. Papia irec maŋnao Israe ŋic jaŋere binaŋ ʒuhuckerâ ʒiŋuc fokac: Mose e fuarâ sokame Wofuŋzi Israe ŋicfâc‐ticne Faraore meonec batarac‐jopaocte manasuhuc Mose soreme hahac‐ticne Aroŋ ehec jojowac erâ Aigita ŋic jaŋere ŋicwofuŋ Farao e fuacnepic. Erâ ere maio dâŋgie sâko bakupire Farao e qaqatara gie bâipie feku Wofuŋ dockecnerâ Israe ŋicguru râec‐jopame jaŋe Aigita mâreŋkonec waha rambiŋ, mâreŋ burocnao. Raku Sinai tikio fisimbiŋ. Binaŋ sasawa i hâcne WAHA RARA papiao qâreŋkekicne fokac.
Erâ i sawa mâcne, Israe ŋic juju â eebapa‐jeŋicte fuŋne i mâmâc mutaniŋkekicne fokac. Jaŋe mâreŋ burocnao wiac ŋemâcne gâcne fua‐jareme mamanasiŋ‐jeŋic goroŋkeme Wofuŋ râpeckezo embiŋ â micne jahec‐jeŋic Mose â Aroŋ mu kâroŋ boc ejactembiŋ. Ehame Wofuŋ Anutu e buuruc â erâ‐eesanaŋ‐ticnere erâ sifu mi bebehec‐jopa mâsi fuŋne fuŋne bahuc bafic‐jopahuc juwec. Ehuc wâc Sâcmutâc Sanaŋ Teŋ jarehuc jaŋehec ʒâʒâfic ewec, â qoruc boze bapie ŋondeŋ‐jeŋicko ŋeŋe juju eocte mupaŋke‐jarewec. Ine hâcne, Israe ŋic jaŋe Wofuŋ‐jeŋic behezo ehapie eki mi behec‐jopawec, jaŋe kiŋ bahac bâfuahapie eki akic‐jopahuc maŋjauŋ‐ticnere fuŋne jaŋerao bataniŋkewec. Papiare dâŋqizecne ʒiŋuc honeŋgopeneŋ: Anutuzi hâcne Wofuŋ jukac, eki Israe ŋic kâpâcwâruonec batarac‐joparâ e jahacne ŋicguru erâ juniŋte giene bawec.
Dâŋ neŋgocne neŋgocne gaŋ sâc kecʒiŋuc forakac:
Wah 1:1–7. I mumuʒâwe dâŋ.
Wah 7:8—Wah 13:16. Ira ine Anutuzi mume Aigita ŋic jaŋerao okacne wiac hâhâwicne fuŋne fuŋne fuawec irec binaŋ fokac.
Wah 13:17—Wah 18. Israe ŋic jaŋe Aigita mâreŋkonec waha rambiŋ irec dâŋ.
Wah 19—24. Sinai tikio ʒâʒâfic fuawec, eme ʒâʒâfic irec dâŋmiti, Sâcmutâc Sanaŋ Teŋ hâcne, i Anutuzi Mose râcnewec, irec dâŋ.
Wah 25—31. Qoruc boze bapa erâ taha bapa fufua irec sâcmutâc.
Wah 35:4—Wah 40. Tiri boze irec babaʒawie gie baku tiri boze âkendâŋnembiŋ irec dâŋ.
1
Aigita ŋic jaŋe Israe ŋic bomac‐jopambiŋ
1 Israere ŋokâfâc jaŋe ru sâc ŋokac naru motecfâc‐jeŋic jaŋehec â mamac‐jeŋic Jakobo ehec mâmâc Aigita mâreŋko ra fisimbiŋ jaŋere ʒâŋe biri ʒiŋe hâcne: 2 Rubeŋ, Simeoŋ, Lewi â Juda. 3 Isasa, Sebuloŋ â Benjamiŋ. 4 Daŋ â Naftali, Gade â Ase. 5 Jakobore ɋâricfâc sasawa jaŋere qâqâhâc ʒare 70; Josefe eki ine biac juwicnao Aigita mâreŋko ra juwec. 6 Eme Josefe hahacfâcne â wiacfâc‐jeŋic jaŋe juku hâmo‐fârembiŋ. 7 Ehame ɋâricfâc‐jeŋic jaŋe ine fua soka erâ sawe mâririackepie ʒare‐jeŋic fejâmbâŋkeme sanaŋkerâ mâreŋ fusucma sâqorembiŋ.
8 Ehame Aigita ŋic jaŋere ŋicwofuŋ ɋâricne moc fuawec e Josefe kâuc bawec. 9 Eki hâcne ŋicfâcne ʒiŋuc jazawec: “Manaŋgopieŋ, Israe ŋic jaŋe siric‐nâpopie ʒare â tâpiri‐jeŋic boc fekac. 10 Ajoc, nâŋâc bomac‐jopanʒepeneŋ, jaŋe boc sawe mâririackepie juku ʒika wiac moc fua‐nâreme râsifâc‐nâŋec qâtec‐joparâ nâpohuc mâreŋ nâwoc ronʒipiŋkohec.” 11 Iŋuc mume kia âkendâŋ‐jopapie jaŋe soŋaŋ‐jopahuc gie hâhâwicne jarembiŋ, ehuc Faraore nânâ rowaŋ hae jajahec, Pitoŋ â Ramasesi bacjofaniŋte mujarembiŋ. 12 Jaŋe ine bomac‐jopa‐bipiehapie sifu fehuc sawe mâririackembiŋ, eme Aigita ŋic jaŋe Israe ŋic jaŋere hâwic‐jopawec. 13 Irec Aigita ŋic jaŋe Israe ŋic kâpâcwâru gie ŋemâcne mujarembiŋ, 14 ehuc fific bacjoparâ gie ŋemâcne jarepie ʒâic manahuc afezi fic bapa qânâ bambiŋ, â nânâ gie he rikec â he sarac eniŋte ʒoɋac ejarembiŋ wâc. 15 Eme Aigita ŋicwofuŋ e Hebiraio gozi bapa ŋokac jajahec, Sifera â Pua, jahe ʒiŋuc muhuc jasawec: 16 “Ŋohe Hebiraio ŋokac gozi bajarehapire ɋâric fuapie honec‐jopa‐hâmozepirec, motec fuaocmuo bâhâmozepirec, naru fuaocmuo ine akickezepirec.” 17 Gozi bapa ŋokac jahe ine Anutu araŋ bacnehuc Aigita ŋicwofuŋzi dâŋ jasawec i mana rereŋ mi ee motec akic‐jopapic wâc. 18 Iŋuc epire Aigita ŋicwofuŋ e gozi bapa ŋokac hefârec‐jofarâ mu wioc ʒiŋuc ejactewec: “Ŋohe wemocte iŋuc ehuc motec jaŋe akic‐jopapic?” 19 Eme gozi bapa ŋokac jahe Farao dâŋ ʒiŋuc bâtikiecnepic: “Hebiraio ŋokac jaŋe Aigita ŋokac iŋucne aricne, jaŋe ŋokac sanaŋne, irec gozi bapa ŋokac nâŋe mi fisihapene motec biac rocjopaeŋgopieŋ.” 20 Anutuzi ine gozi bapa ŋokac ŋezic‐jopawec irec ŋic jaŋe fua sawec erâ soka sanaŋ embiŋ. 21 Eme gozi bapa ŋokac jaŋe Anutu araŋ bacnehuc gie bambiŋte ɋâricfâc‐jeŋic tahac‐jopawec wâc. 22 Iŋuc fuame Faraozi ŋicfâcne ʒiŋuc muhuc jazawec: “Hebiraio ŋic jaŋere motecfâc fuaniŋmu sâc Nilu opâo behec‐jopapie hufârenʒepieŋ, naru jaŋe ine akic‐jopanʒepieŋ.”