MUMUTARA ŊIC
MITI RAŊɊAre papia moc ʒâŋene MUMUTARA ŊIC irec fuŋne mupe mananiŋ. Josua e Israe ŋic Kanaaŋ mâreŋko jowac‐jopa raʒirâ râec‐jopame jumbiŋ. Jufehuc Anutu râpeckepie eki behec‐jopame ŋic qâpuc jaŋe fisirâ jopa sipiric ejare jumbieŋ. Eme Israe ŋic jaŋe maŋjeŋic bârisiehuc Wofuŋ kio wâwâsic ecnekupie eki mocwâc bafic‐jopahuc micne bapa tâpirihec bâfuac‐jopa‐jare jujec. Micne moc bâfuame eki bânie‐jareme qâpuc jopa jâpec ejare jumbieŋ. Eme wama fuarâ foha micne bapazi soŋaŋ‐jopahuc dâŋjeŋic mutiŋnehuc mutara‐jare jujec. Irec micne bapa iŋucne tuczi tuc juwefuhuc jumbiŋ jaŋere ʒâŋe sâko Mumutara Ŋic mukicne. Â binaŋ‐jeŋic sasawa papia mocjahao qâturerâ râekicne papia irec ʒâŋe MUMUTARA ŊIC jaha mukicne fokac. Papia mozi qâreŋkewec i mocwâc mi mana sanaŋkeŋgopeneŋ. Mâc ŋifec ine qâreŋŋic ere fuŋne ʒiŋuc honeŋgopeneŋ: E Anuture mamana biri â guriŋ bapa gie‐ticnere fuŋne mana utuckehuc papia qâreŋkewec.
Papia i bâfâuckepene iŋuc jaha dâkâne jahec â moc ekac.
Dâkâne namba 1:
Mum 1:1—Mum 2:5. Dâkâne irec maŋnao mumutara ŋic jaŋere binaŋ biac mi fuaha, ine Israe ŋic jaŋe mâreŋ dâkâne gâcne ʒuhuckerâ ro rauc eniŋte ʒika sâko qahuc mâreŋ rune sasawa ine sifu mi jâpec‐jopa‐fârembiŋ.
Dâkâne namba 2:
Mum 2:6—Mum 16. Ira ine mumutara ŋic jaŋere binaŋ jâmbâŋ fuŋkerâ qâreŋkekicne fokac. I mumutara ŋic kecʒiŋuc jaŋere binaŋ hâcne: Otinie, Ehudu, Debora, Baraki, Gideoŋ, Abimelec, Jefita, Simsoŋ erâ gâcne gâcne.
Dâkâne namba 3:
Mum 17—21. Ira ine Judaŋic jaŋere juju â eebpa mocwâc sifuc safuckewec irec dâŋ â binaŋ qâreŋkekicne fokac.
Papiare fuŋne moc kecʒiŋuc wâc mupene sâckeocmu: Mumutara ŋic jaŋere papia maŋnao dâŋ forakac izi Israe ŋic jaŋe Kanaaŋ mâreŋ rauckerâ juhuc weniŋuc erâ ŋicguru moc buc ehuc soka sanaŋ embiŋ irec binaŋ banârekac hâcne.
1
Juda guru â Simeoŋ guru jaŋe ŋicwofuŋ Adoni‐Beʒec rombiŋ
1 Josua hâmome faicnao Israe ŋic jaŋe Wofuŋ wiocnerâ mumbiŋ: “Kanaaŋ ŋic jopazore guru wenimoizi micne banârehuc feocmu?” 2 Eme Wofuŋzi muwec: “Manaŋgopieŋ, no mâreŋ i Judare meo râepore eki fezejec.” 3 Eme Juda guru jaŋe qomâfâc‐jeŋic Simeoŋte guru jazarâ mumbiŋ: “Nâŋere mâreŋko mâmâc fehuc Kanaaŋ ŋic jopanʒepeneŋ. Ehame nâŋe wâc iŋuc jaha ŋoŋere mâreŋko mâmâc ranaŋmu.” Eme Simeoŋte guru jaŋe bâjâpec‐jopapie rambiŋ. 4 Eme Juda guru jaŋe ʒikao rahapie Wofuŋzi Kanaaŋ â Periʒi ŋic mejeŋicko râec‐jopawec. Eme jaŋe ŋic 10 tauseŋ Beʒeki hae mendâŋko jopambiŋ. 5 Eme Beʒeki haeo Adoni‐Beʒec erao fisirâ ʒika qambiŋ. Ehuc Kanaaŋ â Periʒi ŋic bawahac‐jopambiŋ. 6 Â Adoni‐Beʒec e ine wisehame jâpe ra rorâ meneŋgoc jahecne â kike neŋgoc jahecne hetâcnembiŋ. 7 Eme Adoni‐Beʒeczi muwec: “Ŋicwofuŋ 70 meneŋgoc â kike neŋgoc‐jeŋic hetâcnekicnezi nore tebo rurumaŋko nânâ huŋgaŋ nuse nâc ejumbieŋ. No iŋuc epore Anutuzi okacne bazu‐narekac.” Eme jaŋe Jerusalem haeo barapie ira hâmowec.
Judazi Jerusalem â Heboroŋ hae rocjofawec
8 Eme Judaŋic jaŋe Jerusalem haeo ʒika qambiŋ. Ehuc hae i ʒikazi imackehuc ʒoc turuŋkepie ʒawec. 9 Eme ʒâhec Judaŋic jaŋe Kanaaŋ ŋic tiki mâreŋko, Negebe mâreŋ â wâneŋko jumbiŋ jaŋe jopaniŋte rambiŋ. 10 Eme Juda guru jaŋe Heboroŋ haeo Kanaaŋ ŋic jumbiŋ jaŋe jopaniŋte rambiŋ. (Heboroŋte ʒâŋe mârâc Arabare hae mujumbieŋ.) Ehuc micnefâc‐jeŋic Sesai, Ahimaŋ â Talamai iŋuc jopambiŋ.
Otiniezi Debiri hae bawahahuc Akisa ŋonâŋ‐ticne rowec
(Jos 15:15–19)
11 Eme irecnec ine Debiri haere ŋecjucfâc râsi fisi‐jareniŋte rambiŋ. Debiri haere ʒâŋe ine mârâc jaha Kiriati‐Sefe iŋuc fowec. 12 Eme Kalebezi muwec: “Moc e Kiriati‐Sefe hae imackerâ rome otâ‐nane Akisa râcnepe ŋonâŋ‐ticne eocmu.” 13 Mume Kalebe ɋaticne Kenaʒire ŋokâ Otiniezi hae i rowec. Eme Kalebezi otâ‐ticne Akisa râcnewec. 14 Eme ŋokac e fisime ŋowe‐ticnezi hesarac mâreŋte mamac‐ticne wiocneocte ʒoɋac ecnewec. Eme doŋgionec wahame Kalebezi wiocnerâ muwec: “Wemo wiacte egarekac?” 15 Wiocneme âzâcnerâ muwec: “Negebe mâreŋko râecnumeŋ irec wiac moc tahacnuc, ehuc opâ ʒâŋe hâcne narec.” Eme Kalebezi opâ ʒâŋe faic â juwic i mâmâc râcnewec.
Juda â Benjamiŋ guru jaŋe ʒuhuckerâ mâreŋ rombiŋ
16 Eme Mosere kimo Keniŋic ere ɋâricfâc jaŋe Judaŋic jaŋehec hâmu gie hae irecnec Juda mâreŋ burocne Negebe mâreŋko Arada hae heririŋnao fokac ira ferambiŋ. Ehuc jaŋehec jusanaŋkembiŋ. 17 Eme Judare guru jaŋe qomâfâc‐jeŋic, Simeoŋte guru hâcne, jaŋehec rarâ Kanaaŋ ŋic Zefata haeo jumbiŋ jaŋe joparâ hae i bâsirowe‐fârembiŋ. Ehuc hae irec ʒâŋe Horima mumbiŋ. 18 Judare guru jaŋe hae mâreŋ ʒiŋuc rombiŋ wâc: Gaza, Asikaloŋ â Ekoroŋ. 19 Wofuŋ e Juda guru jaŋehec juhame tiki mâreŋ rombiŋ. Â wâneŋko jaŋe ine ʒikare keretac aeŋzi bakicne fojarewecte jopa jâpec sâcne mi ejarembiŋ. 20 Eme Heboroŋ hae i Mosezi muwec irec sâcko Kalebe râcnembiŋ. Eme eki Anakare ŋokâfâc jahec â moc hae irecnec jopa jâpec ejarewec. 21 Â Benjamiŋ guru jaŋe ine Jebusi ŋic Jerusalem haeo jumbiŋ i jopa jâpec mi ejarembiŋ. Irec Jebusi ŋic jaŋe Benjamiŋ ŋic jaŋehec jumbiŋzi juŋgopieŋ jaha.
Josefe guru jaŋe Bete hae rombiŋ
22 Josefere kikefuŋ jaŋe iŋuc jaha Bete hae râsi fisicneniŋte fembiŋ. Wofuŋzi ine jaŋehec juwec. 23 Eme Josefere kikefuŋ jaŋe ruc bapa ŋic Bete hae hone tâcneniŋte sorec‐jopambiŋ. (Mârâcko hae irec ʒâŋe Lusi mujumbieŋ.) 24 Eme ruc bapa ŋic jaŋe ŋic moc haeonec wahame honerâ âzâcne mumbiŋ: “Haemaŋko raraʒire hata nâwotuc. Eme nâŋe akicguhuc wiac biaŋne egarenaŋmu.” 25 Eme haemaŋko raraʒire hata jowatume raʒirâ hae i ʒikazi imackehuc ŋic e jahacne â garikiŋfâcne ine akic‐jopa‐fârembiŋ. 26 Eme ŋic e Hitiŋic jaŋere mâreŋko rarâ hae moc bawec. Ehuc hae irec ʒâŋe Lusi muwec. Eme ʒâŋe izi dameŋ ʒiŋuczia fokac jaha.
Manase â Eferaim guru jaŋe mâreŋ ʒuhuckerâ rombiŋ
27 Manase guru jaŋe hae kecʒiŋuc jaŋere ŋecjucfâc jopa jâpec mi ejarembiŋ: Bete‐Seaŋ â hae piticfâc‐ticne, Tanaki â hae piticfâc‐ticne, Doro â hae piticfâc‐ticne, Ibeleam â hae piticfâc‐ticne erâ Megido â hae piticfâc‐ticne. Irec Kanaaŋ ŋic jaŋe mâreŋ ira ʒuhuckerâ jumbiŋ. 28 Israe ŋic jaŋe fua sawec ehuc tâpirihec erâ Kanaaŋ ŋic jopa jâpec mi ejarehuc jaŋacne mic sâcko juniŋte mujarembiŋ.
29 Eme Eferaim guru jaŋe Kanaaŋ ŋic Geʒera haeo jumbiŋ i jopa jâpec mi ejarembiŋ. Irec Kanaaŋ ŋic jaŋe Geʒera haeo ŋondeŋ‐jeŋicko jumbiŋ wâc.
Guru gâcne jaŋe ʒuhuckerâ mâreŋ rombiŋ
30 Sebuloŋ guru jaŋe hae kecʒiŋuc jaŋere ŋecjucfâc jopa jâpec mi ejarembiŋ: Kitoroŋ â Nahalolo. Eme Kanaaŋ ŋic jaŋe jaŋere kiŋaŋ qahuc micdâŋ‐jeŋicte sâcko jumbiŋ.
31 Ase guru jaŋe hae kecʒiŋuc jaŋere ŋecjucfâc jopa jâpec mi ejarembiŋ: Ako, Sidoŋ, Ahalaba, Akaʒibi, Heleba, Afiki â Rehobo. 32 Ase guru jaŋe Kanaaŋ mâreŋ rune jopa jâpec mi ejarehuc jaŋere ŋondeŋko jumbiŋ.
33 Naftali guru jaŋe Bete‐Semesi hae â Bete‐Anata hae jahere ŋecjucfâc jopa jâpec mi ejarehuc Kanaaŋ mâreŋ rune jaŋere ŋondeŋko jumbiŋ. Erâ ine sifu Bete‐Semesi â Bete‐Anata haere ŋecjucfâc jaŋe Naftali guru jaŋere rurumaŋko juhuc micdâŋ‐jeŋicte sâcko gie bambiŋ.
34 Amori ŋic jaŋe ine Daŋ guru kikeo kikeo ejarehuc jâpec‐jopapie tiki mâreŋko ferâ jumbiŋ. Jaŋe wâneŋko wahaniŋte moc mi mana‐jarembiŋ. 35 Amori ŋic jaŋe Hari‐Heresi, Ajaloŋ â Salabim haeo juniŋte boc ʒoɋac embiŋ. Josefere garikiŋ jaŋe ine boc bâuruŋ‐jopapie jaŋere rurumaŋko juhuc micdâŋ‐jeŋicte sâcko jumbiŋ. 36 Eme Amori ŋic jaŋere mazi Akerabim heâŋ‐ticnaonec fuŋkerâ raku Sela hae jâururâ ferawec.