7
Israe ŋic jaŋere juju â eebapa sâqorewec
1 Jei, jâc hândâŋne batara‐fârekicne,
â waiŋ gieonec hândâŋ fârine rofârekicnere basaeŋgopieŋ
jaŋere sâc jaha jukopac;
ehuc waiŋ hândâŋne moc mi bâfuakopac,
â jâmbo hândâŋ qeucne nâpemurâ basakopac wâc.
2 Mâreŋko ŋic mitinezi omaembiŋ,
â ŋicŋondeŋko ŋic siocmâc moc mi juŋgopieŋ;
jaŋe ʒika qaniŋte ruc babac eeŋgopieŋ,
ehuc jaŋe jaŋaczia uficko jowaniŋte
ufic rârâec eeŋgopieŋ.
3 Jaŋe mejeŋiczi bahac bâfuaniŋte ʒoɋac eeŋgopieŋ,
ŋic fekicne â mumutara ŋic jaŋe
bâbâmiriŋ moneŋ roniŋte mueŋgopieŋ,
â ŋic kâcɋene jaŋe aŋac‐jeŋicte sâcko
dâŋ mutarahuc dâŋ tiŋne muhasickeeŋgopieŋ.
4 Biaŋnefâc‐jeŋic jaŋe qiŋambu ʒârâ iŋucne jueŋgopieŋ,
â ŋicfâc‐jeŋic tiŋne jaŋe ʒârâ uupic irec sâc.
Iŋuc juhapie rucbapafâc‐jeŋic jaŋe
okac dameŋte findaŋdâŋ mumbiŋ i maickeme
bipic tatara ejareocmu.
5 Diguracfâc‐ŋeŋic jaŋerao mi siŋkenʒepieŋ,
â âgofâc‐ŋeŋic jaŋerao mi roweckenʒepieŋ;
â ŋokac gohec mâmâc juekac
ere ruc bahuc micge soŋaŋkezemec.
6 Wiac kecʒiŋuc fuaocmu irec erâ iŋuc enʒepieŋ:
Ŋokâzi mamac‐ticne qaisockeocmu,
otâzi neŋgocnere dâŋ qataraocmu,
jojoŋao jahe rârâsi enicmu
â ŋic mocte garikiŋfâc jaŋe jaŋaczia
kikisâ erâ juniŋmu.
7 No ine Wofuŋtao ʒâŋe fihuc jupemu,
ehuc bâbâpiaŋ‐nane Anutu ere woŋec jupemu,
ehame Anutu‐nanezi dâŋnane manaocmu.
Wofuŋzi batamaec‐nâpohuc râsi jaŋere meonec batarac‐nâpoocmu
8 O râsifâc‐nane, ŋoŋe honec‐nâpohuc bubiaŋ mi mananʒepieŋ,
nâŋe waha nâpowec i sifu mocwâc faharenaŋmu,
erâ dapâcmaŋko ŋehapene Wofuŋzi batamaec‐nâpoocmu.
9 Nâŋe sâqocne bahuc Wofuŋ bunao bambeŋ,
irec kimbeŋ‐ticne âsickerâ juhapene
dâŋnâŋec mutara‐nârezejec.
Eme nâŋe tiŋne juju‐ticne honenaŋte jowac‐nâpome
tatamacko fisinaŋmu.
10 Râsifâc‐nâŋec jaŋe honenʒepieŋ wâc,
ehame dâŋ kecʒiŋuc nâzâmbiŋte
fai‐jeŋicko mimi fezejec:
“Wofuŋ Anutu‐ŋeŋic weni?”
Eme hatao sohoŋ iŋucne âte docjopapie
ʒâŋe‐nâŋeczi hone ʒiziwec‐jopanaŋmu.
11 Dameŋ moc maickeme
qânâsacge mocwâc heɋârehuc bâpiaŋkeniŋmu,
ehuc mâreŋgere ma i bâsokaniŋmu.
12 Dameŋ ira hâcne ŋic kecʒiŋuczi gorao fisiniŋmu:
Asiria mâreŋkonec raku Aigita mâreŋko tarakac,
â Aigita mâreŋkonec raku Eufrata opâ sâkoo mickekac,
erâ hâwec ŋifeckonec hâwec ŋifecko
â tiki mockoneczi tiki mocko tarakac,
mâreŋ ŋondeŋ irecneczi fisi‐gareniŋmu hâcne.
13 Mâreŋ‐jeŋic ine ŋecjucfâc‐ticne
jaŋere eebapa sâqocnere erâ
niniŋ siarereŋ fuarâ foocmu.
14 Ŋicfâcge, lamafâcge hâcne,
jaŋe rârec rârec mâreŋ guec‐ticnehec fohame
mâreŋ ʒâʒâŋiŋ kâtemaŋko bucjeŋic jueŋgopieŋ,
irec gunuge bajuhuc soŋaŋ‐jopazemec,
ehuc mana‐jaretec mârâc jaha ejumbieŋ
irec sâc jaha ehuc Basaŋ â Gileade mâreŋko
nânâ bâfuarâ nâhuc junʒepieŋ.
15 Aigita mâreŋkonec jowac‐nâpo warehuc
wiac bipinehec nâwotutec honembeŋ,
irec sâc jaha nâwotutec honenʒepeneŋ.
16 Eme ŋicne ŋicne jaŋe wiac i honerâ tâpiri‐jeŋicte manapie
wawahane eme mimienʒepieŋ,
ehuc maŋjeŋic gâckeha fâsâerâ dâŋemâc domanʒepieŋ.
17 Jaŋe homa â wiac gâcne jaŋe foforâ rahuc
rufe nâeŋgopieŋ irec sâc enʒepieŋ,
jaŋe ɋarac ɋarac qahuc ficsanaŋ‐jeŋickonec waharâ
fâfârehuc Wofuŋ Anutu‐nâŋec maickenʒepieŋ,
ehuc ere hâwic‐jopazejec.
18 Mozi Anutu go iŋucne juhuc sâqocne bâtâmireekac,
me ŋicfâc‐ticne ʒanʒaŋne jaŋere qaqatara beheekac?
Goki ŋic aki anonoc eejare
irec manatec biaŋkeekacte
kimbeŋge mimiŋzi ɋâric forahuc juocte mi muekic.
19 Goki hâcne busâqoc mocwâc manacmu,
ehuc kiŋtofa‐nâŋec sasawa âte‐hâmorâ
hâwec ʒâkâŋ fâhâŋnao behetec hutâmireocmu.
20 Go mârâc jaha mimiŋnefâc‐nâŋec mupaŋke‐jaremeŋ
irec sâcko Jakobo â Abraham jahere ɋâricfâc jaŋe
jauŋ fâri â aki anonoc ejare rahuc jucmu sanaŋ.