NAHUM
Nahum ere binaŋ iŋuc jaha boc mi manaŋgopeneŋ. E Jereniazi juhame juwec. Juju‐ticnere fuŋne ʒiŋuc piticne honeŋgopeneŋ: E porofete guru moc jaŋeraonec ŋic moc, Jona iŋucne. Porofete i jaŋe Judaŋic râsifâc‐jeŋic, qâpuc hâcne, qaisoc‐jopa sanaŋkehuc Anutu buuruc â maŋjauŋ‐ticnere fuŋne hone mana tarac mi embiŋ. Nahum gie ticnere ine ʒiŋuc sawa manaŋgopeneŋ: E Niniwe hae sâko mi tâtiehame gie‐ticne fuŋkerâ bahuc juwec.
Porofete Nahum e gie‐ticne bahuc Niniwe haere findaŋdâŋ muwec hâcne. Dâŋ kecʒiŋuc: Hae rune jaŋe boc repirehuc Judaŋic jaŋere Anutu râsi ecnembiŋte Wofuŋzi hae i bâsiroweocte muwec. Dâŋ i hâcne muratiewec. Ehuc dâŋ moc ʒiŋuc mutaniŋkewec wâc: Wofuŋ e râsifâc‐ticne râsi jaha ejareocmu, â mamanafâc‐ticne jaŋe ine bafic‐jopahuc ŋezic‐jopaocmu. Papia‐ticnere fuŋne ʒiŋuc honeŋgopeneŋ: Maŋnao dâŋ forakac i gâcne Niniwe hae ŋeha mu qâreŋ ekicne, â gâcne ine hae i okacne fisicneha tâtieme qâreŋkekicne. Niniwe hae i jara dameŋ 612 B. C. ira tâtiewec.
Papia maŋnao gaŋne gaŋne dâŋ kecʒiŋuc forakac:
Gaŋ 1:1–11. I Anuture mumuteŋ gae moc. Ira Anutu muteŋkehuc ʒiŋuc mukac: Wofuŋ Anutu e okac babazu â aakic runezi Niniwe hae okacne bazucneocmu.
Gaŋ 1:12–15. Ira Juda kikefuŋzi fific guguriŋ faio juju i Wofuŋzi jowac roocmu irec biŋedâŋ, erâ Asiria mâreŋte uŋsawaŋ dâŋ fokac wâc.
Gaŋ 2. Niniwe hae somâckehuc hetâtieniŋmu irec findaŋdâŋ.
Gaŋ 3. Niniwe hae rune jaŋere sâqocne mujaŋgeŋkerâ hae tâtieocmu irec dâŋ mocwâc mukac. Tataranao ine Niniwe hae tâtiewec irec makuc gae qâreŋkekicne fokac.
1
Wofuŋ e kimbeŋ qahuc okac babazu gie baocmu
1 Niniwe haere findaŋdâŋ. Nahum e Elekosi haeoneczi wiac hone manac ewec irec papia.
2 Wofuŋ e Anutu ʒoɋac‐ticnehec,
erâ wâc kimbeŋ‐ticneheczi okac babazu gie baekac.
Wofuŋ e râsifâc‐ticne okacne bazu‐jareekac,
â kisâfâc‐ticne kiŋjeŋic bajuekac.
3 Wofuŋ e kimbeŋ‐ticne uneŋne,
â tâpiri‐ticne i ɋârâŋne,
e kiŋ bahachec jaŋe moc mi akic‐jopaekac.
E karoraczi kike‐ticnere rufe eha âterâ raekac,
erâ mâŋâŋ ɋicwânʒâŋnehec â ɋuŋ parandaŋ
irec maŋnao juhuc fisiekac.
4 E hâwec dâŋ mucneme kereŋkeekac,
ehuc mume opâ sâkozi ʒicke kereŋ efâreekac.
Ehame Basaŋ â Karamele mâreŋko jâc wiac ururucke‐fâreekac,
â Lebanoŋ eri qaraweŋ‐ticne somareekac.
5 Tiki jaŋe ere maio qiriŋ qaeŋgopieŋ,
â mâreŋ facne jaŋe ŋenʒaŋnerâ omaeeŋgopieŋ;
mâreŋ sâko mâreŋ irec faio ŋec juc eeŋgopieŋ
jaŋe weaŋkeeŋgopieŋ.
6 Mamana sâqoc‐ticnere mozi sanaŋkerâ domaocmu,
â kimbeŋ‐ticnezi bâruŋkerâ ʒacnâpoha mozi juocmu?
Aaric‐ticne i ʒoc uucne iŋucne hoŋkeme
ʒahuc haroŋaŋ ʒâfâuckeocmu hâcne.
7 Wofuŋtao roweckeeŋgopieŋ jaŋe uruc jauŋ ejareekac,
â ʒârâ hâriŋ dameŋko huec sanaŋ‐jeŋic eekac
erao soŋkeeŋgopieŋ jaŋe hone manac ejareekac.
8 Râsifâc‐ticne ine mume rumi sâkozi qâuruc‐jopaekac,
â kisâfâc‐ticne jaŋe dapâcko tuŋjopame hueŋgopieŋ.
9 Ŋoŋe Wofuŋ râsi ecnehuc wemo dâŋ moc manasu biric eeŋgopieŋ?
Eki furu jaha ŋopa mizieocmu,
ehuc râsifâc‐ticne ŋoŋerao okac babazu gie arecne jajahec mi baocmu.
10 Jaŋe fâpâ uupic qâtâcne behec ekicne irec sâc ehapie
ʒoczi jawa hahaŋkekicne iŋucne ʒâseŋ‐jopaocmu.
11 Wofuŋ râsi ecnehuc dâŋ manasu biric ewec,
â ŋic doc bacjopahuc juwec
e ŋoŋeraonec mi fuawec me?
12 Wofuŋzi ʒiŋuc mukac: “Jaŋe ŋic sasanaŋhec â bocjaha,
erâ sifu rândiŋkehuc omae‐fâreniŋmu.
Juda go biac bâtiŋgupo,
irec mocwâc mi bâtiŋgupemu.
13 Â ɋawegao reŋ râekicne fokac i hâcne qazupemu,
erâ niŋgiŋge hetâcnepemu wâc.”
14 Asiria, gore ine Wofuŋzi ʒiŋuc mutâcnewec:
“Ʒâŋe biŋege mocwâc mi muhuc junʒepieŋ;
no ine nemufâcge jaŋere fickonec ɋâŋ qâqâtâc wiac
jâczi â aeŋzi ba akic ekicne i ro behec epemu.
Go ŋic sindaŋne juekicte mupe ʒâŋeruŋge fuazejec.”
15 Honeniŋ! Biŋe biaŋ â wamadâŋ bafisirâ muromackezo ekac
e biac tikio ware fuakac i!
O Juda, go hombaŋge ŋefârehuc Wofuŋtao dâŋ mupaŋkemeŋ
irec fârine bâfuazemec,
sindaŋŋic e bâsirowekicnere
hae mâreŋgao mocwâc sicne fotâc mi eocmu hâcne.