NEHEMIA
Nehemia e Judaŋiczi Babilonia mâreŋko fuarâ ŋicwofuŋ Arataʒeʒe ere waiŋ soŋaŋ juwec. Juku ine Jerusalem haere dâŋ â Judaŋic âgofâcne jaŋe mâreŋ‐jeŋicko risierâ weniŋuc jumbiŋ irec biŋe manarâ busâqoc manahuc ŋicwofuŋzi manacnehuc râeme risierâ Judaŋic âgofâc‐ticne bafic‐jopaocte âzâcnewec. Âzâcneme ŋicwofuŋ Arataʒeʒezi manacnewec. Erâ manacnewec sawa mâcne, e Nehemia kia sâko âkendâŋnehuc tâpiri sâko râcnewec wâc. I fuŋne kecʒiŋucte ewec: Judaŋic jaŋe hae â taha ufuŋ‐jeŋic mocwâc bâpiaŋkehuc baniŋte ehapie râsifâc‐jeŋic, Kanaaŋ mâreŋ rune hâcne, jaŋe hecke‐jarehuc fific guguriŋ â ʒika boc bâfua‐jare jumbieŋ. Eme jaŋere tâpiri â pepec penaroŋ bawahaocte iŋuc ewec.
Gaŋne gaŋne dâŋ forakac ine kecʒiŋuc:
Neh 7:4—Neh 10. Ira ŋic kâpâcwâruonec risiembiŋ jaŋere ʒâŋe biri, erâ Eʒerazi Mosere sâcmutâc dâŋ wose‐jarehuc heɋâre‐jareme ŋic jaŋe sâqocne‐jeŋic mufuambiŋ irec dâŋ fokac.
Neh 11. Ira Jerusalem haeo â Judaia mâreŋko ŋic râec‐jopakicne jurambiŋ jaŋere ʒâŋe biri fokac.
Neh 12. Ira Lewi ŋicguru jaŋere ʒâŋe biri sasawa râekicne, erâ Jerusalem haere qânâsac barâ mutirimbiŋ irec dâŋ qâreŋkekicne fokac.
Neh 13. Ira Nehemia e Jerusalem haeo risieme arec jajahec eha bâbâsifuc gâcne bâfuambiŋ i honerâ dâŋ mujarehuc maŋ bâbârisie bâfuaniŋte ʒoɋac ejarewec, irec dâŋ fokac. Bâbâsifuc fuawec ine kecʒiŋuc: Hombaŋ sisipiric â qâpuc jaŋehec sisifuc ee. Nehemiazi Jerusalem haeo Judaŋic âgofâc‐ticne jaŋerao gie bahuc juwec dameŋ irec ʒâŋe ʒiŋuc mueŋgopeneŋ: Jerusalem haere bâbâpiaŋ â heheɋâre gie dameŋ namba 2.
1
Nehemiazi Jerusalem haere numuwec
1 Hakalia ŋokâ‐ticne Nehemia ere dâŋ.
Arataʒeʒe e ŋicwofuŋ juhame jare 20 eme no Kisilewo mosao Susa hae sâkoo juhape wiac kecʒiŋuc fuawec: 2 Soctofafâc‐nane jaŋeraonec moc ʒâŋene Hanani e ŋic gâcne jaŋehec Juda mâreŋkonec fisimbiŋ. Fisipie no Judaŋic kâpâcwâruo mi fefe mâreŋ‐jeŋickoa jumbiŋ jaŋere â Jerusalem haere mu indiŋ ejarepo. 3 Eme jaŋe ʒiŋuc nazambiŋ: “Kâpâcwâruo mi rara Juda mâreŋkoa jumbiŋ jaŋerao wiac hâhâwicne fuame mimi faio juŋgopieŋ. Jerusalem haere sac i heropiekicne â motâc‐ticne sasawa i ʒoczi imacke‐fârewec.”
4 Eme no dâŋ i manarâ waha ŋehuc kiopo. Erâ ki busâqoc ehuc juhape ʒoaŋ gie bapa bocjaha tarawec. Erâ nânâ sowa juhuc sambâŋte Anuture maio numuhuc jupo. 5 Ehuc kecʒiŋuc mupo: “O sambâŋ Wofuŋ Anutu, go Anutu sâko â gereŋ gereŋne, maŋzi ʒâficgueŋgopieŋ jaŋehec ʒâʒâficge i soŋaŋkehuc aki anonoc ejareekic. 6 Go ʒâŋe firâ hazec râehuc nunumu‐nane ʒi manazemec. Kiŋaŋ qaqage noni kiŋaŋ qaqafâcge Israe ŋic nâŋe nâŋâcnere erâ maigao ŋafe ʒoaŋ sâc numuekopac. Ehuc Israe ŋic nâŋe sâqocne bâfuahuc bugao bambeŋ i mufuaekopac. Jâmbomac, no â mamac‐nanere garikiŋfâc nâŋe sâqocne bambeŋ hâcne. 7 Nâŋe wiac repic qapicne egarehuc sâcmutâc dâŋ â dâŋsanaŋ erâ mumutâc dâŋ kiŋaŋŋicge Mose mutâcnecnemeŋ i mi soŋaŋkembeŋ. 8 Go dâŋ kecʒiŋuc muhuc kiŋaŋŋicge Mose mutâcnecnemeŋ i manasuzemec: ‘Ŋoŋe norao mi siŋkeniŋmuo ine noni ŋicne ŋicne jaŋere ŋondeŋko bâtâtiec‐ŋopapemu. 9 Me norao mocwâc risierâ sâcmutâc dâŋnane soŋaŋkehuc mana rereŋ eniŋmuo ine behe qaisoc ejarekicnefâc‐ŋeŋic jaŋe mâreŋ wiwicko juipiehapie no sifu irecnec qânusuc‐joparâ ʒâŋe‐nane foocte hae mâreŋ bâwosâepo ira mocwâc bârisiec‐jopapemu.’ 10 Jaŋe gore kiŋaŋ qaqa â ŋic ŋokacfâc. Go gahac tâpiri sâkogezi â mesanaŋgezi bâfiriec‐jopameŋ. 11 O Wofuŋ, go kiŋaŋ qaqage nore nunumure mecne â ʒâŋege araŋ bacnehuc mana ʒiziweeŋgopieŋ kiŋaŋ qaqafâcge i jaŋere nunumure mâmâc hazec râe‐hâmozemec. No ʒoaŋ ʒira gie bape fârinehec eocte mana‐narezemec. Ehuc ŋic kecʒirec ʒâŋe faio buurucge nowatuzemec.”
No dameŋ ira ŋicwofuŋte waiŋ soŋaŋ jupo.