28
PoloꞋa Malata kumate maine.
1 Tagaya kanale huta evaꞋyi hune. EvaꞋyi huna koꞋmo agia Malata kumale huꞋya tahapaigeta havimainone. 2 Ani kumate vayaꞋyagamoꞋya kanaleꞋya huꞋya ali kayone hulatageta mainonageno kola aiteno yasiꞋage higeꞋya ata kae-maleteꞋya me lavaleꞋya ata mo lota hulatenae. 3 PoloꞋa ata haefusa haꞋya alino ata kaeyana nagola vayaꞋma nehaeya osifaꞋvemoꞋa ata haefusa haꞋyafiti augafa leno amuko higeno hati-lavino Polo ayapi menilage-lage humaine. 4 Menilage-lage hulinegeꞋya anile maiya vayaꞋmoꞋya ageteꞋya mage hae “Mani kanoa vaya hamaeno hevai-neꞋamatea kanogino hage tipina ofalianagino fatago AnumayamoꞋa anonaꞋa alisiafe haeyanagino ago faligahie.” huꞋya hae. 5 Hayanagi PoloꞋa ani osifaꞋvea alino aye-tafaino atafi ataleteno agaila augafa alino haviya ohigeno afaꞋa maine. 6 AfaꞋa maigeꞋya anile maiya vayaꞋmoꞋya augafa halegino asaga hulavino falisiafene huꞋya ayaꞋayate agava maiyanagi nagola havi yamoꞋa agaitela falote ohigeꞋya eteꞋya alu amakesa haviꞋya mage hae “Agaya nago Anumaya maine.” huꞋya havimainae.
7 VaꞋyima huna mopamona aupaꞋale hanea kumatela ti amuꞋnopi kotega kava kanomo mopae. Ani kava kanomo agia PupiliusiꞋe. Ani kanomoꞋa lavaleno nomaꞋalega mo lateneno tagufa (3) kanafi kave yagita huno nelamino yagai-latene. 8 Yagai-lateneno Pupiliusina nefaꞋa amuko kaliene aiꞋamoꞋa tolo ya agea kaliene alino mainegeno PoloꞋa mo-geteno Anumaya Kotitega havigeno augafale aya malegeno ani kaliꞋamoꞋa falu hu-tene. 9 Falu hutegeꞋya nagoꞋa ani kumate kali vayaꞋmoꞋya ageno PoloꞋa kaliꞋamia alino kanale humatene. 10 Alino kanale humategeꞋya tagaila kanale kava hulatageta maineta haenagaꞋa ugahema hunageꞋya tagaila nesuna yama aupa huna yana tamiteꞋya tipi kalefi aliꞋya latenae.
PoloꞋa Lomu kumate uvaꞋyi humaine.
11 Tagaya tagufa (3) ika ani kotega maiteta nago tipi kalea, ala yasima alia kanafinagiꞋya Malata kumate maiya tipi kalea, Alekasatalia kumateti emaiya tipi kalefi asaga humaita umainone. Ani tipi kalemo agoꞋyalela tole kuyave netalamogani anamena talo humalenae. 12 Ani tipi kalefima onana Sailakiusi kumate evaꞋyi huta tagufa (3) kana mainone. 13 Sailakiusi kumala ataleta kagita kagita Legiumi evaꞋyi huta faenonageno yasimoꞋa alino aepa hegeta nagoke taula mo faeteta Puteoli evaꞋyi huteta hati-lavita lipi kalea agola neꞋataleta mopafi emainone. 14 Puteoli nagoꞋa mainaya tafu-taganagamina amakonageꞋya mage hae “TagaiꞋene nagoke sota maigahae.” huꞋya hageta anile maigeta Lomu kumatela umainone. 15 Katega neꞋonageꞋya Lomu kumate mainaya tafu-taganaꞋya “Katega neꞋae.” huꞋya haya kea haviteꞋya eꞋya nagola Apiusi maketie nehaya kumate me fotu hageꞋya nagoꞋa vayaꞋmoꞋya “TaliꞋa (3) Natu VayaꞋmoꞋya Nefayaya NoꞋyaga Hane.” huꞋya haya kumate fotu hunageno PoloꞋa ani vayala amaketeno Anumayamotega muse nehigeno aguꞋamoꞋa tokiyaꞋage humaine.
16 Lomu kumateꞋma unana ala kava kanomoꞋa Polofe “Kanalelagika kagaikaꞋa nopi mainesanageno nago ati kanomoꞋa kava yagaigategahie.” huno humaine.
PoloꞋa Lomu kumate Yisasi kanale mono kea huhaleno hamapai-maine.
17 PoloꞋa tagufa (3) kana maiteno ani kumate mainaya Yuta soka vayaꞋyagahe ke higeꞋya melitalu hageno mage huno hamapaiye “NafuꞋnaganagatama nagaya tagaiti nofi vayaꞋmogamiꞋene taginagomoꞋya humainaya kavaꞋene aliꞋna haviyana ohunoanagi Yelusalemu nofila hunateteꞋya Lomu vaya amayapi natenae. 18-19 Lomu vayaꞋmoꞋya keꞋnima haviyana nagaipina nagoꞋa nahaesageꞋna falisua keꞋnia omalegeꞋya natalegahe hayanagi Yuta vayaꞋmoꞋya ani kehena ‘AꞋaoꞋ huꞋya haya yafe nagoꞋma visua kaniꞋa omalegeꞋna ‘Sisa kaiyekeꞋnia havisie.’ huꞋna humainoanagi nagaiꞋni nofi vayala kaiyeke humatesua yana omalene. 20 Mani kema tamahapaisuafene huꞋna ke hugetama ageꞋna tamahanepauve Isaleli vayaꞋmoꞋya amametiti huꞋya agava mainaya kanomofe haviꞋna nagupi malenoa yateti nofila hunatenae.” huno humaine. 21 HigeꞋya ani soka vayaꞋmoꞋya Polofe mage hae “NagoꞋa Yutia vayaꞋmoꞋya kagaifena avona kaeꞋya tamigeta ohavinone. NagoꞋa vayatimoꞋya tagaite eꞋya ke hageta nagola havi kavaꞋma humainana kea me lahaopainae. 22 Tahaopainagi mukiꞋa kotegati vayaꞋmoꞋya Yisasina amakuꞋa aminaya veaꞋmogamifena ‘Havi kava maiꞋya nehae.’ huꞋya hageta ago havimainonagi menia kagaikaꞋa kaguꞋafiti hisana ke havigahune.” huꞋya humainae.
23 “Na kanale havigahune.” huꞋya hapali-maleteꞋya ani kanalela mukiꞋa vayaꞋyaga PoloꞋma mainea nopi me-litalu hageno PoloꞋa natema aepa heno Anumaya KotiꞋa kava yagai-matesia kea hamanepaino Anumaya KotiꞋma Yisasina hutegeno emainea kanomo kea Mosese kae-malenea kefitiꞋene Anumaya Koti amaune vayaꞋmoꞋya kae-malenaya kefitiꞋene amakaila amakuꞋa alino hetisigeꞋya Yisasife haviꞋya amakupi maleꞋya amametiti hisayafene huno huge huge nehigeno yagemoꞋa lavi fale-maine. 24 Polo kea nagoꞋa vayaꞋmoꞋya haga neꞋya amakupi malenagi nagoꞋa vayaꞋmoꞋya amakupina ali omalenae. 25 Alu amaku amakesa haviꞋya mohu mehu huteꞋya ugahe nehageno PoloꞋa mage huno hamapai-maine “Alu Aotage AvamuꞋmoꞋa tamage huno Aisaiyana hapaigeno AisaiyaꞋa, aune kanogino, taginagomogamina mage huno tamage hamapai-maineane.
26 Kagaya mage huka veaꞋmogamina mo hamapaiyo ‘Tamakaila tamakesamoꞋa havime havime haigahayanagi ani kemona aepaꞋa havilama hutama ohavigahae. TamaulagamoꞋa kasagoꞋya yupa ageme ageme haigahayanagi nago yana agelama hutama oꞋagegahae. 27 Mani kemona aepaꞋama havisaya amaku amakesa omale veaꞋne mainae. Mani kema ohavisayafene huno amakesamoꞋa ago tile-maine. AmaulagamoꞋa aniꞋa huno ‘OꞋagesae.’ huno ago asu humaine. Mani kea amakesamoꞋa havisigeno amaulagamoꞋa agesigeno amakuꞋa aiyahae huꞋya nagaitega esageꞋna ali hilato humateyafene.’ huno higeꞋya.” kae-malenayane.
28-29 “Anumaya KotiꞋa mani kea tamakinagomogamiꞋene tamakayaenefe lamaha-pai-maineanagi tamakaya lamakaveꞋno hutenagi haviho Anumaya KotiꞋa anima lamaku tamamema aligatisia kea Yuta veaꞋne omainaya veafe ago humateneanagiꞋya ani veaꞋmoꞋya havigahae.” huno humaine.
30 PoloꞋa nago nona miya huteno ani nopi tole kafu maineno agaitegama aya veala kanaleꞋya humatene. 31 HuneꞋamateno Anumaya Koti kava yagaimatesia kea huhaleno hamanepaino Anumayati Yisasi Kalaisi kanale mono kea huge amavelige huno kea hulokiya vaino higeꞋya nagoꞋa veaꞋmoꞋya “Na kea ohuo.” huꞋya kahegi oꞋatenae.