1 YisasiꞋa mage huno hu-maine “MukiꞋa veaꞋmogatama tamaipamoꞋa kanaꞋage huno tamakesa kuꞋmoꞋa ohino. Anumaya Kotife havitama tamakupi maletama tamametiti haya kava nehutama nagaifena havitama tamakupi maletama tametiti hiho. 2 Nenafa nopina veala maisaya nona kasagoꞋya hane. Ani yama omalesina nagaya mani kea ohuleꞋasine. Nagaya kumatamia moliꞋna talo tala hu-lama-tegahe ugahue. 3 Nagaya kumatamia mo lalo tala hu-maleteꞋna eteꞋna me lamavalesugetama visua kumatela visageta nagaiꞋene mo lokaeta maigahune.

4 Tamakaya nagayama visua kumaꞋmo kana ago age-mainae.” huno hie. 5 Higeno TomasiꞋa mage huno hie “Alatimogae tagaya visana kumala oꞋagenone. HanaꞋa huta ani kana agesune?” huno hie. 6 Higeno YisasiꞋa mage huno hapaiye “Nagaya ikapinaga visaya kamona NefaꞋnae. Nagaya ke-lamage kemona aepaꞋa mainoe. Nagaya agola maige maige yamo hamaimula aepaꞋa mainoafe nagoꞋa veaꞋmoꞋya Nenafatega visayana alu katetila oꞋugahagi nagaiteke esae. 7 Tamakaya nagaiꞋma havimainaleꞋasipa Nenafafena aniꞋa hutama havileꞋasine. Tamakaya menia aepa hetama Nenafana ago havitetama age-mainae.” huno hie.

8 Higeno FilipiꞋa mage huno hapaiye “Alanimogae negafana taveligeta agesunageno tagu tamemoꞋa tamu hisie.” huno hie. 9 Higeno YisasiꞋa mage huno hapaiye “Filipigae ayaꞋaya kanale tamakaiꞋenena maime emainoana kagaya nagaila onagenano? NagoꞋa veaꞋmoꞋya nagaiꞋma nage-mainayana aniꞋa huꞋya Nenafana age-mainae. NaꞋa higeka ‘Negafana lave-lio huka nehane?’ 10 Nagaya Nenafa aguꞋafina maugeno NenafaꞋa aniꞋa huno nagai naguꞋafina mainea yafena havika kagupina nomalano? Tamaha-pai-mainoa kea nagesafiti kea tamaha-opainoe. AꞋao. NenafaꞋa nagai nagupi maineno agaiꞋa aliꞋyamaꞋa neꞋalie. 11 Nagaya Nenafa aguꞋafi maugeno aniꞋa huno NenafaꞋa nagaila naguꞋafina maigetaꞋa hu-mainoꞋema huꞋnama hua kea havitama tamakupina maletama tamametiti hiho. Mani kema ohavinutama tamakaya mukiꞋa aliꞋyama ali-mainoa aliꞋyama age-mainesayana nagaifena havitama tamakuꞋafi ali maletama tamametiti hiho. 12 Tamage-lafa huꞋna tamaha-nepauve nagoꞋa veaꞋmoꞋya nagaifema haviꞋya amakupi nemalaya veaꞋmoꞋya mukiꞋama ali-mainoa aliꞋyana aniꞋa huꞋya aligahae. Nagaya Nenafatega visua yafe anima alisaya aliꞋyamoꞋa ali-mainoa aliꞋyana agaseꞋya aligahae. 13 NafaꞋneꞋamonife huꞋya NenafaꞋa agima ali-saga hisaya yafe tamakaya nagai kema havitetama nagai nagi ayetama mukiꞋa yafena naha-vi-gesageꞋna aniꞋa hu-lama-tegahue. 14 MukiꞋa yafema nagai nagima ayetama naha-vi-gesayana afaꞋa ani yana hu-lama-tegahue.” huno hu-maine.

15 Mani kea huteno mage hie “Tamakaya nagaifema tamahau tamayamopafima tama-haisigetamahena tamaha-pai-mainoa kemona akave malegahae. 16 Akave malesageꞋna Nenafatega havigesugeno tamaya hisia Avamula hu-tesigeno tamakaite eno agola tamakaiꞋene emaige maige huno maigahie. 17 Ani Alu Aotage Avamula tamageꞋage kemona aepaꞋa maineno hulama-ve-ligahie. MukiꞋa ma mopale yafema amaugafama aliꞋya nehaiya veaꞋmoya Alu Aotage Avamula ageꞋya havilama ohunaya yafe oꞋavalegahagi tamakaya ago age-lama hutama age-mainaya yafe tamakaiꞋenena emaineno tamakupi haino maigahie.

18 Na yafe tama-talesugetama megusa nafaꞋne kana hutama omaigahayanagiꞋna tamakaitela eteꞋna egahue. 19 Okasi kanaꞋa ma mopale yafema amaugafama aliꞋya nehaiya veaꞋmoꞋya nagoꞋene onagegahayanagitama tamakaya nagegahae. Agola maige maige yamona aepaꞋa mainoafe tamakaya aniꞋa hutama maige maige hisaya tamahaimula alitama maigahae. 20 Mainesageno Alu Aotage AvamuꞋmoꞋma esia kanafina nagaya NenafaꞋene mainoanagitama tamakaya aniꞋa hutama nagaiꞋenena maisageꞋna nagaya aniꞋa huꞋna tamakaiꞋenema mainoa yafena havilama hutama havigahae.

21 NagoꞋa veaꞋmoꞋya nagai kema haviꞋya akave malenuꞋya nagaifena hamau amayamopafifna hamau-maine. Nagaifema hamau amayamopafima hamau-mainesia veaꞋmoꞋya NenafaꞋa aniꞋa huno amakaifena hau ayamopafina nehaiye. NehaigeꞋna nagaiꞋenena aniꞋa huꞋna nahau nayamopafina nenahaigeꞋna naguꞋa amamisugeꞋya nagaila nage-lama huꞋya nagegahae.” huno hie. 22 Higeno nago kanoa, Yutasi Isakalioti omagi, hamoꞋamoꞋa mage huno Yisasina havige “Alanimogae naꞋa higeka kagaya tagaila taulagafina kagaika aepakaꞋa tave-nelinagi mukiꞋa ma mopale yafema amaugafama aliꞋya nehaiya veaꞋmogami amaulagafina hu-falote huka ohunanane?” huno havinege. 23 Havigegeno YisasiꞋa mage huno hie “NagoꞋa veaꞋmoꞋyama nagaifema hamau amayamopafima hamaisigeꞋyahena nagai kemona akave malesagenofena NenafaꞋa amakaifena aniꞋa huno hau ayamopafina haugahie. NenafaꞋene nagaiꞋnienena amakaiꞋene emaigahuꞋe. 24 NagoꞋa veaꞋmoꞋya nagaifema hamau amayamopafima ohamaisiana nagai kemona akavela nomalae. Manima tamaha-nepauva kea nagaiꞋnige kea omalegi hu-na-tenea Nenafa ke hane.

25 TamakaiꞋenema maineꞋna mani kea ago tamaha-pai-mainoe. 26 Tamaha-pai-mainoanagino NenafaꞋa nagai nagileꞋma hu-tesia kanomoꞋa, tamayama hisia Alu Aotage Avamulagino emaineno mukiꞋa yana hulamave-liteno mukiꞋa tamaha-pai-mainoa kea alino tamakesa hao hinagetama havigahae.

27 Tama-taleꞋna ugahe tamaipa falu hutama maisaya tamaku tamakesa nelamamue. Nagayama naipa falu huꞋna nemauva nagu nagesa nelamamue. Anima tamaipa falu hutama maisaya yama tamamua yana ma mopale veaꞋmoya amaipa falu nehaya ya kana ohunegi kanaꞋage tamaku tamakesa havitama kolia ohiho. 28 ‘TamataleꞋna uteꞋna eteꞋna tamakaitega egahuema.’ huꞋna tamaha-pauva kea ago havilinae. Nagaifema tamahau tamayamopafima nelamahaisigetamahena Nenafa mainelega visua yafena muse haleꞋasine. NenafaꞋa nagaseno ala kano mainea yafe Nenafa mainelega visua yafena muse haleꞋasine. 29 TamataleꞋna visua kanafina nagaife havitama tamakupi maletama tamametitima hisaya yafe yaufa ani kana falote ohunea kanafi menia mani kea tamaha-nepauve. 30 SataniꞋa, ma mopaleꞋma kava hu-mainea kanoa ago neꞋeanagiꞋna nagaya nagoꞋene kea ohugahue. Satanina tokiyaꞋamoꞋa nagaila onagaseneanagi Nenafa nahapai-mainea kava huꞋna faligahue. 31 Nagayama Nenafafema nahau nayamopafi nenagea kavala ma mopale veaꞋmoꞋya havisaya yafe Nenafa naha-pai-mainea kava nehue. Hai nehugi vigetao.” huno nehie.