7
YisasiꞋa ati vayate kava humainea kanomo aliꞋya kanoꞋa alino kanale hutene.
1 YisasiꞋa mukiꞋa humainea kea veala hamapaigeꞋya havitageno Kapaneamu umaine. 2 Nago Lomu ati vayate kava humainea kanomoꞋa agaiꞋa aliꞋya kanoꞋa tusiya huno nehaiya kanoꞋagino tusiꞋa kali alino ago faligahe hie. 3 Faligahe nehigeno ati vayate kava humainea kanomoꞋa Yisasi avagea haviteno nagoꞋa Yuta vayate ala vayaꞋmoꞋya humateno mage humaine “Nagayama hua kea Yisasina havigeho ‘MusekaꞋa nehugi kanale eka aliꞋya kanoꞋnia ali kanale huto huno hie.’ hutama havigeho.” huno hie. 4-5 Nage higeꞋya neꞋuꞋya Yisasite uvaꞋyi huꞋya tutu huꞋya mage hae “Ani kava kanomoꞋa tagaiti Yuta vayaꞋmogatife aluya huno nehaigeno mono notia kilatene. Ani yafe kanale kano mainegi afaꞋa haꞋmaisanana katesia kava hugane.” huꞋya hae.
6-7 YisasiꞋa amakaiꞋene tokaeno viaꞋamo nomaꞋale uvaꞋyi hugahe nehageno Lomu ati vayate kava humainea kanomoꞋa vayaꞋamogamife “Mage hutama hiho.” huno humategeꞋya Yisasite eꞋya mage huꞋya mehae “Mage hie ‘Anumayamoga kasalo kahaesigekahena atalo. Nagaya kanale ohunoa kanomoni noniꞋafi esanana okategahie huꞋna ani yafe kagaitega oꞋunogi afaꞋa menia aliꞋya kanoꞋnimona kaliꞋahena keꞋa hutesanageno kanale hutesie huꞋna nehue. 8 Nagaya kava kano mainoe. NakaiꞋma kava yagainatenea kanoa anale nagaseno maineanagi nagaya aniꞋa huꞋna nagoꞋa ati vayatela kava huꞋna mainoe. Nago kanomofe ‘Vuoma.’ hugenoꞋa umaine. ‘Enoma.’ hugenoꞋa emaine. AliꞋya kanoꞋnihe ‘NaꞋa huo.’ hugenoꞋa aniꞋa humaine.’ huno hie.” huꞋya hapaimainae. 9 Hapaigeno YisasiꞋa ani kea haviteno agesaguꞋmoꞋa tusiya huteno kasagoꞋya akaveꞋma umainaya veaꞋmogamifena mage huno hie “Tamahanepauve ma kanomoꞋa tusiya huno nagaifena havino agupi maleno ametiti humaine. Ma kanomoꞋma hia ya huꞋya nagaifema haviꞋya amakupi maleꞋya ametiti humainaya veala mukiꞋa Yuta veaꞋne mainaya kumatela oꞋagenoe.” huno hie. 10 HigeꞋya humatenea vayaꞋmoꞋya notega eteꞋya uꞋya mogayana ani aliꞋya kanoa ago kanale huno mainegeꞋya mo gemainae.
YisasiꞋa nagola Neni kumate neyana falimainefiti ali hetitene.
11 YisasiꞋa osi kanaꞋa maiteno agaiꞋene tokaeꞋya nemaiya anagaꞋaene mukiꞋa veaꞋnene Neni kumate umainae. 12 Ani kumala kegiꞋya humalenaya fiate neꞋvageꞋya nagola falimainea kanoa aliꞋya hevaitegahe emainae. Anima falimainea neyamona itaꞋamoꞋa aiya nagoke nafaꞋneꞋagino itaꞋamoꞋa megusa alagiꞋya ani yafe mukiꞋa ani kumate veaꞋmoꞋya ani aꞋmo akave umainae. 13 NeꞋvageno AnumayamoꞋa ani aꞋmona ageteno tusiꞋa hau huteteno mage huno hapaiye “Kagaya kahauma huka avima atana yana haꞋno huka afaꞋa maiyo.” huno hapaiye.
14 Hapaiteno alilinaya hagifanale motafa hulineno hagifanama aliꞋya aya vayala anile hetimainageno YisasiꞋa mage hie “Ma neyamoga hetio huꞋna nagaya kahanepauve.” huno hie. 15 Higeno anima falimainea neyamoꞋa hetino kaiyekea aepa henoꞋma nehiana YisasiꞋa avaleno itaꞋamona amine. 16 AmigeꞋya mukiꞋa veaꞋnemoꞋya tusiꞋa amamaꞋyo aiteꞋya Anumaya Koti agia alisaga nehuꞋya mage hae “Anumaya Koti ala aune kanoa tagai amuꞋnopina ago emaine. Anumaya KotiꞋa mukiꞋa veaꞋa amaugafa aligatigahe emaine.” huꞋya humainae. 17 YisasiꞋa aniꞋama hia avagemoꞋa mukiꞋa Yutia kotegaene alu kotegaene ute ete humaine.
YoniꞋa tole kanolatana Yisasitega hunatene.
18 Yoni kema nehaviya vayaꞋmoꞋya Yisasi avagea Yonina hapaimainae. 19 Hapaigeno YoniꞋa agaiꞋene tokaeꞋya nemaiya anagapiti tole kanolafe ke higeꞋana agaite aꞋageno Anumayamotega hunateno “Mage hutana havigeꞋo.” huno hanapaiye “Kagaya egahiema humainaya kano emainapi alu kanohe agava maisune?” hutana havigeꞋo. huno hie. 20 HigeꞋana ani tole kanolatana Yisasitega eꞋana mage huꞋana haꞋe “YoniꞋa tima fale neꞋamatea kanomo hulaꞋategetaꞋa kagaitega neꞋoꞋe. Mage hutana havigeꞋo huno taꞋahapaiye ‘Kagaya egahie huꞋya humainaya kano mainapi alu kanohe agava maisune.’ huno hie.” huꞋana haꞋe. 21 Ani kanafina YisasiꞋa mukiꞋa alu kali alu kali alimainaya veaꞋnene Kefo Avamula amakusafinaga mainea veaꞋnene ali hilato humatene. Amaulaga asu humai veaꞋnea amaulaga agesaya ya humatene. 22 Anakaifena kenonaꞋania mage huno hie “Tanakaya utana agaꞋa yaꞋene haviꞋa yaꞋene Yonina hapaiꞋo. Amaulaga asu humainea veaꞋmoꞋya amaulaga neꞋagae. Amaiya haviya humainea veaꞋmogami amaiyamoꞋa kanale humate. Fugitaya amakemainea veala kanale humate. Amakesa tilemainea veala eteꞋya nehaviye. Falimainaya veala hetiꞋya mainae. AfenoꞋami omalenea veala Anumaya Kotina kanale keꞋa nehaviye hutana hapaiꞋo. 23 Nagai kehema tole amakesa ohavisaya veaꞋmoꞋya kanaleꞋya huꞋya maigahae.” huno humaine.
Yonife “Ala kano maine.” huno humaine.
24 YoniꞋma hunategeꞋana emainaꞋa kanolatana utaꞋageno YisasiꞋa anile mainaya veaꞋmogamina Yonife mage huno hamavige “Tamakaya kaꞋme kotega utama na ya agegahe neꞋvae? Nago vemoꞋa hopa kana huno yasimoꞋa ali fagagi mainea kanomona agegahe neꞋvafio? 25 Ifi na ya agegahe neꞋvae? Kanale kena failinesia kanoa kaꞋme kotega agegahe neꞋvafio? AꞋao kanale kena failinesaya vayala kanale kave nege nege nehaya vayala kaꞋme kotega omainagi ala kanomona kanale nomaꞋafi maigahae. 26 Na ya agegahe neꞋvae? Anumaya Koti aune kano agegahe neꞋvafio? Tamage tamahapauve mukiꞋa Anumaya Koti aune vayaꞋmogamina amakasemainea kanoa Yoni maine. 27 Yonife nayona Anumaya Koti autaꞋmafina mage huꞋya kaemalenayane
‘Haviho nagaya Anumaya KotiꞋna aliꞋya kanoꞋnimona hagoteꞋna hutogeno uhagotegateno visana kana valino ali hilato hugategahie.’ huno kaemaleneane. 28 Tamahapauve YoniꞋa mukiꞋa ma mopale atenaya vayaꞋmogamina ago amakasemaineanagino nagoꞋa afa veaꞋmoꞋya Anumaya Kotife ‘Kava yagailato.’ huꞋya humainaya veala Yonina ago agasemainae. 29-30 KasagoꞋya veala musufaya nehuꞋya vaya amaugafaleti takisi neꞋaliya vayaꞋene Yoni humainea kaiyekea haviteꞋya ‘E, Anumaya KotiꞋa ‘NaꞋa maꞋa huo.’ huno humainea kea fatago ke huno hie.’ hutageno YoniꞋa tina falemateanagi Falasia vayaꞋene kahegi kema havilinaya anagaꞋene ‘Anumaya KotiꞋma ‘NaꞋa maꞋa hiho.’ humainea kehe tagaifena ohune.’ YoniꞋma falematea tina ofalegahune.” huꞋya amakaveꞋno hutenae.
31 Meni kanafima mainaya veaꞋmogatamahena hana augafa veaꞋne mainae huꞋna tamahapaisue? 32 Ma ma hisua augafa nafaꞋneyagamoꞋya mainaya kava hutama mainae. Ani nafaꞋneyagamoꞋya veaꞋne alitalu huꞋya mainalega maineꞋya alu nafaꞋneyagahena ke huꞋya mage huꞋya hae ‘YaveꞋya aikolunana tamakaya amoa noꞋayae. Tagaya tahau hisuna yagame nehunana tamakaya avia noꞋatae.’ huꞋya hae. 33 YoniꞋa ti fale neꞋamatea kanomoꞋa kaveꞋene haviliꞋene mosino emainegetama tamakaya ‘Satani Avamula aguꞋafina maine.’ hutama nehae. 34 Hayanagi ikapinagati emainoa kanoa vayaꞋmo natenea nafaꞋnemoꞋna tina kavela nenogetama nagaifena ‘KaveꞋene tiꞋene neno haꞋno hugeno omai kano maineno musufaya nehaya vayaꞋene amaugafaleti takisi neꞋaliya vayaꞋene kefo yama nehaya vayaꞋene vayaꞋamoꞋya mainae.’ hutama nehae. 35 Hayanagi Anumaya KotiꞋna kanale agu agesama hanea kavala akaveꞋma neꞋvaya veaꞋmoꞋya ‘Fatago kava nehie.’ huꞋya nehae.” huno hie.
Nago aꞋmoꞋa Yisasina aiyale masavena faletene.
36 Nagola Falasia kanoa SaimoniꞋe Yisasife “NagaiꞋene kavela meno.” huno higeno YisasiꞋa kave mo negahe Falasia kanomo nopi haino mopale maine. 37 Haino mainegeno nagola kumai aala ani kumate nemaiyanagino “YisasiꞋma Falasia kanomo nopiti kave negahe umaine.” huꞋya haya kea haviteno manaꞋage masavena havatemai yafa keꞋayo alilino emaine. Ani keꞋayoꞋma talo hia yafamo agia alapasatae. 38 Yisasi akavelega aiyafi umaineno Yisasife “Ala kano mainane.” nehuno aiyafi ape huno avi neꞋategeno aunumoꞋa takilavino Yisasi aiyale tavigeno agaiꞋa ayolagefaleti aye haꞋmino alisoso hu neꞋateno aiyale atako nehuno manaꞋage masaveteti faletene.
39 Fale neꞋategeno kema humainea Falasia kanomoꞋa ani aꞋmoꞋma hia kavala ageteno agesafinaga mage huno havie “Ma kanomoꞋa Anumaya Koti aune kanoma maineleꞋasina aiyaleꞋma alisoso hutea aꞋmofena ago havileꞋasine. Ani aꞋmoꞋa tusiꞋa kefo yamaꞋage nehia a maine.” huno nehavie. 40 Agesafinaga ani kea nehavigeno YisasiꞋa agaife mage huno hie “Saimonigae nago kea kahapaisue.” huno higeno “Hulavenelina kanomogae nahapaigeꞋna havino.” huno hie.
41 Higeno YisasiꞋa mage huno hie “Nagola moneꞋa hanea kanomote tole kanolatamogania uꞋana nagoꞋmoꞋa ‘Vani hataleti kina (K100) namigeꞋna alino.’ higeno nagoꞋmoꞋa teni kina (K10) namigeꞋna alino. AlitetaꞋa anonaꞋa haenaga megamiꞋano huꞋana haꞋageno anamigeꞋana aliꞋana umainaꞋe. 42 UteꞋana haenagaꞋa anonaꞋama amisaꞋa monea kosa ohegeꞋana oꞋamiꞋageno ‘Kanalelagi onamitana ataleꞋo.’ huno humaine. Ani kema humainea yafena ani tole kanolatalapitila hana kanomo monema aminea kanohena tusia musena huno hau ayamopafina haugahie?” huno havige.
43 SaimoniꞋa mage hie “Nagesa havuana ala monema alimainea kanohe atalo hunoꞋma hutea kanomoꞋa tusiꞋa muse huno hau ayamopafi haugahie.” huno higeno YisasiꞋa mage huno hie “Tamage hane.” huno humaine. 44 Ani kea huteno maiyahae huno ani aꞋmona agemaineno Saimonina mage huno hapaiye “Kagaya mani aꞋmona ago. Nagaya kagai nopi ogeka naiya sese huonatanageno ma aꞋmoꞋa agaiꞋa aunuleti naiya sese hunateteno agaiꞋa ayolagefaleti ali hau hunenate. 45 Kagai nopi ogeka nagaila naugafalela alisoso hu onatenanagi ma aꞋmoꞋa naiyalela eno aluya huno alisoso hunenate. 46 Kagaya afa masavetetila nanupina fale onatenanagi mani aꞋmoꞋa manaꞋage masaveteti naiyalela falenatene. 47 Ani yafe kahanepauve mani aꞋmoꞋa kefo yamaꞋamoꞋa kasago humainegeno Anumaya KotiꞋa ago aigeꞋateno ataletea yafe tusiya huno hau ayamopafi haumaineanagino osi kefo yamaꞋama hanea kanomona Anumaya KotiꞋa ani kefo yamaꞋa aigeꞋateno ataletesiana osiꞋa hau ayamopafina haugahie.”
48 YisasiꞋa mage huno ani afena hie “Nagaya kefo yakaꞋa ago aigekateꞋna atalegatoe.” huno hapaiye. 49-50 AgaiꞋaene tokaeꞋya mopale mainaya veaꞋmoya sumi sumi kefiti mage huꞋya hae “Mani kanoa hanaꞋa kano maineno ‘Kefo yakaꞋa aigekateꞋna atalegatoe.’ huno nehie.” huꞋya hae. “Nagaifena havika kagupi maleꞋka kametiti hanafe kagu kamena ago aligatigatogi kamena male falu huka vuo.” huno hapaiye.