1-2 YisasiꞋa osi kanaꞋa maiteno ala kumaꞋyagaleꞋene osi kumaꞋyagaleꞋene vaiyatete huno Anumaya Koti kava yagaimatesia kanale mono kea hamapaimaine. AgaiꞋa tuelufuꞋa (12) anagaꞋaene nagoꞋa aꞋneyagaene YisasiꞋa amakupitiꞋma Kefo AvamuꞋma anatitaleno kaliꞋamima alino kanale humatenea aꞋneyagaene agaiꞋaene vaiyatete humainae. Nago aꞋmo agia Magatala MaliaꞋe. YisasiꞋa hagoteno seveniꞋa (7) Kefo AvamuꞋyaga aguꞋafiti anatitalenea ale. 3 Nago aꞋmo agia YoanaꞋe Heloti nopi kava kanomo alagi. Ani kava kanomo agia SusaꞋe. Nago aꞋmo agia SusanaꞋe nagoꞋa aꞋneyagaene YisasiꞋene vaiyatete nehuꞋya ani aꞋneyagamoꞋya amakaiꞋami moneꞋamifiti YisasiꞋene anagaꞋamogamiꞋene amaya humainae.

4 MukiꞋa alu kumateti kumateti veala Yisasite melitalu hageno YisasiꞋa nago avame kea hamapaimaine. 5 Mage huno hie “Nago kanomoꞋa avina faigahe alino vie. Avina alino aihelafino nefaigeno nagoꞋa avinamoꞋa kapi tavino hanegeno veaꞋmoꞋya ani avinale amaiya ayeꞋya ute ete hageno namayagamoꞋya nageno haꞋno hie. 6 NagoꞋa avinamoꞋa yafa mopafi taviteno hageana tina omalea mopafinagino eteno fayoteno asagalimaine. 7 NagoꞋa avinayagamoꞋa avetaꞋnafa ino hanea amuꞋnopi tavino hageteno avetaꞋnafa hanea inoꞋmoꞋa ayetegeno haviya humaine. 8 NagoꞋa avinamoꞋa kanale mopafi tavino hageteno alagaꞋama ayeana nagoke yosalela kasagoꞋya alaga vani hataletiꞋa (100) ayeno vasaimai vasaimai humaine.” huno hie. Ani kea huteno ala ke huno mage hie “Mani kea tamakesama hanesigetamahena havilama hutama haviho.” huno hie.

9 AgaiꞋenema tokaeꞋya nemaiya anagaꞋmoꞋya ani avame kemo aepaꞋahe havigae. 10 Havigageno YisasiꞋa mage hie “Tamakaya Anumaya KotiꞋa kava yagailamateneafe kemoꞋa falaki mainea kea Anumaya KotiꞋa tamaya higetama ago havilinagi mukiꞋa veaꞋmoꞋya avame kema hamapaisugeꞋya amakesa havigahagi haviteꞋya havilama huꞋya ohavigahae. VeaꞋmoꞋya neꞋagayanagi agelama huꞋya oꞋagegahae.

11 Mani avame kemona aepaꞋa hu falote huꞋna tamahapaisue. Mani avinamoꞋa Anumaya Koti ke kana humaine. 12 KateꞋma tavimainea avinamoꞋa maꞋa humaine nagoꞋa veaꞋmoꞋya Anumaya Koti kea havitageno SataniꞋa mage hie ‘Amakupi aliꞋya omalesageno Anumaya KotiꞋa amaku amamena ali okatisie.’ huno amakupitila ani kea alitalene.

13 Yafa mopafima tavimainea avinamoꞋa maꞋa humaine nagoꞋa veaꞋmoꞋya Anumaya Koti kea haviꞋya muse huꞋya atafa hayanagi hafuꞋya mopafi otavia yamoꞋa alige atalege veaꞋne maineꞋya osi kanaꞋa osiꞋa haviꞋya amakupi maletageno havi kanama amakaiteꞋma falote nehiana aupaꞋa Anumaya Koti kea neꞋatalae.

14 AvetaꞋnafa ino hanea amuꞋnopi tavimainea avinamoꞋa maꞋa humaine nagoꞋa veaꞋmoꞋya Anumaya Koti kea haviteꞋya ma mopafi mukiꞋa yaꞋyagaꞋamihe amakesa haviꞋya moneꞋamiene yokaloꞋamienefe kalagi aiteꞋya ani yaꞋyagaꞋamimo Anumaya Koti kea alino aiso humalegeꞋya atalageno alagaꞋamoꞋa aye helafino lama nohie.

15 Kanale mopafima tavimainea avinamoꞋa maꞋa humaine nagoꞋa veaꞋmoꞋya tokiyaꞋage amaku amakesa hanegeya Anumaya Koti kea haviteꞋya aliꞋya amakupi maleꞋya atafa hu talako huꞋya mainaya veaꞋmoꞋya ani alagaꞋa mukiꞋa aye henelafie.”

16 Anumaya Koti ke nehaviyafe YisasiꞋa mage huno hamapaiye “NagoꞋa veaꞋmoꞋya lamua hanagaliꞋya susufaneleti aiso hu nemalafi ifi sipa kapinaga hanagaliꞋya aiso hu nemalae? AꞋao lamua hanagaliteꞋya esaya veaꞋmoꞋya ani lamule agesayafe sipale nemalae. 17 Ani yafe haenagaꞋa mukiꞋa falakimainesia yamoꞋa efalote hugahie. MukiꞋa kesi kava nehaya yamoꞋa efalote hinageꞋya veaꞋmoꞋya agegahae. 18 Ani yafe Anumaya Koti ke havisaya yafena tamakesa havitama havilama hutama haviho. Havilama huno havilinesia kanomona Anumaya KotiꞋa nagoꞋene havilisia yana amigahianagi nagoꞋamoꞋya ‘Ago havilinoe.’ huno hisia kanomona havilinesiamaꞋa hanafaletalegahie.” huno humaine.

19 Yisasina itaꞋamoꞋene aganaꞋamoꞋyaene agegahe ayanagi kasagoꞋya veaꞋmoꞋya hiya huꞋya maigeno YisasiꞋma mainea avatela omenae. 20 Omenagi nago kanomoꞋa Yisasife mage hie “ItakamoꞋene kaganakamoꞋyaene kagai kagegahe emaineꞋya kumatega hetiꞋya mainae.” huno hie. 21 Higeno kenonaꞋa mage huno hie “MukiꞋama Anumaya Koti kema haviꞋya akave nemalaya veala itaꞋnimoꞋya naganaꞋnimoꞋya mainae.” huno hapaiye.

22 Nago yupa YisasiꞋenema tokaeꞋya nemaiya anagaꞋene tipi kalefi haisaga humaiꞋya neꞋuꞋya YisasiꞋa mage huno hamapaiye “Tikotumona atu faliga vigetao.” huno higeꞋya umainae. 23 Yaufa neꞋvageno YisasiꞋa aukalokalo higeno faemainegeno tusiꞋa yasimoꞋa tina mevaleno tipi kalefi atalegeno ani lipi kalefina havatesia kava higeꞋya mukiꞋamoꞋya haviya hisaya kava humainae. 24 HuteꞋya YisasiꞋa faemainegeꞋya mogafa huꞋya mage hae “Kava kanomogae, kava kanomogae tagaya ti nakaita falisuna kava nehunageka notagane.” huꞋya hageno hetino ani limofeꞋene yasimofeꞋene tokiyaꞋage ke huno “Taga huo.” huno higeno yasimoꞋene timoꞋene taga huꞋana alava humainaꞋe. 25 Alava hutegeno YisasiꞋa agaiꞋaene tokaeꞋya nemaiya anagafe mage huno hamavige “Nagaifena havitama tamakupi maletama tamametitima haya yana hanate atalae?” huno higeꞋya koli huꞋya tusiꞋa amamaꞋyo neꞋaiꞋya huge havige huꞋya mage hae “Mani kanoa taꞋe? TimoꞋene yasimoꞋene keꞋa haviteꞋya akave malae.” huꞋya hae.

26 Kaliliti ala tikotuna takaeꞋya ame kaiyaga agegayamona Kelasasa* veaꞋne mainalega uvaꞋyi hae. 27 YisasiꞋa tipi kalea ataleno ti agegayalega neꞋuno ageana nagola ala kumate kanoa Kefo AvamuꞋyagamoꞋya aguꞋafi mainaya kanoa Yisasite emaine. Ani kanoa ayaꞋaya kanafi kenaꞋa fai oꞋalino nopina nomaiyane. MatimatipikeꞋya nemaiya kanoe. 28 Ani kanomoꞋa Yisasina ageteno mopafi agoꞋya ayemaineno ala kefiti mage hie “Yisasiga tagasenoꞋma anale mainea Anumaya Kotina nafaꞋneꞋamoga naꞋa hunategahe neꞋane? MusekaꞋa nehugi nagata aisia kavala hu onato.” huno nehie. 29 Higeno YisasiꞋa Kefo Avamufe mage huno hie “Agusafitila hatilavio.” huno higeno Kefo AvamuꞋmoꞋya mukiꞋa kanafina ani kanomona atafa nehigeꞋya kava neꞋyagaiya vayaꞋmoꞋya aiya ayapi seni nofiteti kisalu kitayanagi ani nofila aikaꞋnokaꞋnu huneꞋataleana Kefo AvamuꞋmoꞋya afai kotega anatigeno faleno neꞋviane. 30 YisasiꞋa ani kanohe mage hie “Kagai kagia tagae?” huno higeno mage hie “Nagai nagia kasagoꞋyamoꞋnae.” huno hie. NaꞋafene kasagoꞋya Kefo AvamuꞋmoꞋya aguꞋafima hai falemainayafe “Nagia kasagoꞋyamoꞋnae.” huno hie.

31 Ani Kefo AvamuꞋmoꞋya Yisasifena mage hae “Hanikimainea kumapina tagaila hulategeta oꞋvamano.” huꞋya hae. 32 NehageꞋya kasagoꞋya afuyagamoꞋya agoꞋyafi maineꞋya kave nenageno ani Kefo AvamuꞋmoꞋya Yisasifena mage huꞋya hae “Amuga afuyagamo amakuꞋafina hulategeta vamano.” huꞋya havigageno YisasiꞋa “AniꞋa hiho.” huno hie. 33 HigeꞋya ani Kefo AvamuꞋmoꞋya ani kanomo aguꞋafitila hatilaviꞋya afuyagamogami amakupi hai nefalayana ani afuyagamoꞋya amaiyayeꞋya nagola aulufi kapi taviteꞋya tipi asaga hulaviꞋya ti nakaiꞋya fali haꞋno humainae.

34 Fali haꞋno hageꞋya ani afuyagale kava vayaꞋmoꞋya ani afuyaga tima nakaiꞋya fali haꞋnoma haya yana ageteꞋya faleꞋya ala kumate mainaya veaꞋmogamifeꞋene hoyafinaga mainaya veaꞋmogamifeꞋene “NaꞋa maꞋa higeta neꞋone.” huꞋya hamapaimainae. 35 HageꞋya ani veaꞋmoꞋya humainea yama agegahe Yisasite eꞋya Kefo AvamuꞋmoꞋma agusafiti ataleno umainea kanomona agesa akalo higeno kenaꞋa failino Yisasi aiyafi mopale mainegeꞋya megeteꞋya koli humainae. 36 YisasiꞋma humainea yama agemainaya veaꞋmoꞋya “NaꞋa maꞋa huno Kefo AvamuꞋmogamina agusafi mainea kanomona alino kanale hutene.” huꞋya hamapaiye.

37 HamapaigeꞋya mukiꞋa Katalaga kumate veaꞋmoꞋya Yisasifena tusiꞋa koli huteꞋya “Tagaila tataleka vuo.” huꞋya hageno YisasiꞋa amataleno emainelega ugahe tipi kalefi haisaga humaine. 38-39 Haisaga hunemaigeno Kefo AvamuꞋmoꞋma agusafiti hatilavino umainea kanomoꞋa Yisasifena “KagaiꞋene ugahe nehue.” huno higeno YisasiꞋa “AꞋao kagaya eteka nokalega uka mukiꞋa Anumaya KotiꞋma hugatenea yafena veaꞋneyaga mo hamapaiyo.” huno higeno ani kanomoꞋa viaꞋyamo mukiꞋa ala kumaꞋale veaꞋmogamina YisasiꞋma hutea yafena hamapaimaine.

40 YisasiꞋa eteno egeꞋya mukiꞋa veaꞋmoꞋya agava maineꞋya tusiꞋa muse huꞋya falu fala hutenae. 41 Falu fala huneꞋatageno nago kanoa YailasiꞋe nehaya kanoa emaine. Ani kanoa soka kano maineanagino Yisasi aiyafi mepe humaineno tutu nehuno Yisasina mage huno havige “NoniꞋalega egetaꞋa vaꞋano.” huno hie. 42 Ani kanomoꞋa aiya nagoke munaꞋa maine. Ani munala kafuꞋa tuelufuꞋa (12) kafuꞋa hanea munala faligahe ayaya neꞋaigeno “NoniꞋalega eno.” huno tutu higeno YisasiꞋa anilega vigeꞋya veaꞋmoꞋya yageꞋyage huꞋya aulega akavelega huꞋya akave umainae.

43 Vageno ani veaꞋnefiti nago aꞋmoꞋa tuelufuꞋa (12) kafu aigu nopinaga mukiꞋa kanale nemaiya aala nagoꞋa vayaꞋmoꞋya aliꞋya kanale hu oꞋataleꞋasine. 44 Ani aꞋmoꞋa Yisasina akavelagati eno kenaꞋamo atupale avate aligeno aupaꞋa kolamaꞋamoꞋa taꞋnemaine. 45 TaꞋnegeno YisasiꞋa mage huno humaine “Ta kenaꞋnilela mevate humaine?” huno higeꞋya mukiꞋamoꞋya “Tagaya naꞋa ohunone.” huꞋya hageno PitaꞋa mage hie “Kava kanomoga mukiꞋa veaꞋmoya yageꞋyage huꞋya kaulegati kakavelagati nehagi naꞋa higeka mani kea hamavinegane?” huno hie. 46 YisasiꞋa mage huno hie “Tamage huꞋna nehue nago kanomoꞋa kenaꞋnile avate higeꞋna nagaya nagesa nehavugeno navate aligeno nagoꞋa tokiyaꞋnimoꞋa ago nataleno umaine.” huno hapaiye.

47 Hapaigeno ani aꞋmoꞋa “Falakigahe huanagi ago nagane.” huno atili huteno Yisasi aiyafi mepe humaineno mukiꞋa veamogami amaulagafi “NaꞋa maꞋa huꞋna kali alimainoafe avate alugeno kaliꞋniꞋa aupaꞋa kanale hunate.” huno hapaimaine. 48 Hapaigeno YisasiꞋa mage huno hapaiye “Ma aꞋmoga nagaife kagupi maleka kametiti hanafe kanale negahaiye kagaya kaipamoꞋa yasi nehinageka vuo.” huno hapaiye.

49 Ani kea nehigeno nago kanomoꞋa soka kanomo notegati anile evaꞋyi huno Yailasife mage huno hie “MunakamoꞋa ago falimainegi ataleka kava kanomona kasalo haegi nagoꞋene havioko.” huno hie. 50 YisasiꞋa ani kea haviteno Yailasife mage huno hie “Kolia ohuka afaꞋa nagaife kagupi maleka kametiti hisanageno munakaꞋa falimainefitila hetigahie.” huno hie.

51 Soka kanomo note uvaꞋyi huno YisasiꞋa mukiꞋa veaꞋnehe “Omeho.” huno PitaꞋene YoniꞋene YemesiꞋene ani munaꞋmo itaꞋafoꞋamoꞋene amavaleno ani nopi haimainae. 52 MukiꞋa veaꞋmoꞋya ani munaꞋma falimainea yafena tusiꞋa avi neꞋatageno YisasiꞋa mage huno hie “Avia oꞋateho mani munala falilavata ohunegi afaꞋa faeno maine.” huno hamapaimaine. 53 Ani munala faligeꞋyama agemainaya yafena ani veaꞋmoꞋya Yisasina kigiꞋa hutenae.

54 Kigi hutayanagi YisasiꞋa ani munaꞋmo ayate atafa nehuno mage hie “Ma munaꞋmoga hetio.” huno hie. 55 Nehigeno agu nafaꞋnea eteno egeno aupaꞋa hetie. Hetigeno YisasiꞋa mage hie “NagoꞋa nesia kavela amiho.” huno hamapaimaine. 56 ItaꞋafoꞋamogania ani yana ageteꞋana tusiꞋa anamaꞋyo aimaiꞋanagi YisasiꞋa mage hie “Nago kanomona ma ma hua yafena hamaopaiꞋo.” huno kaheginatene.