1 Nago yupa YisasiꞋa nago kotega maineno Anumaya-motega ke huno havige-maine. Havigeteno agaiꞋaene tokaeno nemaiya anagapiti nago kanomoꞋa mage huno havige “Anumayamogae YoniꞋene tokaeꞋya nemaiya anagaꞋmogamina humavelimainea kavala huka ‘NaꞋa maꞋa hutama nunamuna hiho.’ huka hulavelio.” huno hie.

2 Higeno YisasiꞋa mage huno hie “Nunamuma hinutamahena mage hutama hiho ‘Nelafaga kagai kagimoꞋa alu aotage huno hanesie. Kava yagaisana kanamoꞋa efalote hisie. 3 MukiꞋa kanafima nesuna kavela tamio. 4 Tagaya havi kavaꞋma hulatenaya veala aigeꞋamateteta kefo yaꞋamia atalematona kava huka kefo yatia aigetateka atalelato. SataniꞋma ayelavataga hisia katela tavaleka otato.’ hutama hiho.” huno hamapaiye.

5 Hamapaiteno mage huno hie “Hana kanomoga kege amuꞋnona negafute uka mage huka hugane ‘Nenafugae taliꞋa (3) maya yoka namisano? 6-7 Nago nenafuꞋa kategati eana nesia yana omalegi kanale namisano?’ hukama hisanageno negafuꞋa nomaꞋafinagati make huno kahapaisio ‘Kasalo nenahaegi natalo. Fita ago ki-maleteꞋna nafaꞋneyagaꞋniene ago fae-mainonanagita nagaya hetiꞋna nahavigana yana okamigahue.’ huno hisio? 8 AꞋao tamahanepauve ‘NegafuꞋma mainoe.’ huno hisia yafena oꞋamigahigi tutuꞋma hia yafe hetino havigea yana amigahie.”

9 Ani yafe tamahanepauve Anumaya Kotitega nago yafema ke hutama havigesagenoꞋa ago tamamigahie. Nago yafema atiyesagenoꞋa afaꞋa tamaveligahie. FitaleꞋma akalu-kaluma hisagenoꞋa Anumaya KotiꞋa yakilamategahie. 10 MukiꞋa havigesaya veaꞋmoya aligahae. Atiyesaya veaꞋmoya ali falote hugahae. FitaleꞋma akalu-kalu hisaya veaꞋmogamina fita yakimategahie. 11 Hana kanomoga nafaꞋnekamoꞋa noyamehema kahavigesigeka nefaga osifaꞋvea alika amigano? AꞋao ani yana alika oꞋamigane. 12 Kokole amufema kahavigesigeka yapavena alika amigano? AꞋao ani yana alika oꞋamigane. 13 OꞋamiganagi tamakaya havi veaꞋne mainayanagitama nafaꞋnetamimona kanale ya amamiyanagi ikapinaga mainea nelamafaꞋa tusiya huno tamakase-maineanagitama havigesageno Alu Aotage AvamuꞋa tamamigahie.

14 Nago kanomona Kefo AvamuꞋmoꞋa* aguꞋafi mainegeno avefuꞋna alino aiyahae higeno agea noꞋaiyane. YisasiꞋa ani Kefo Avamula anati-talegeno vigeno ani kanomoꞋa age aino kea kea higeꞋya alitalu hu-mainaya veaꞋmoꞋya ageteꞋya tusiꞋa amamaꞋyo aimainae. 15 AmamaꞋyo neꞋaigeꞋya nagoꞋa veaꞋmoꞋya mage hae “PielesepuliꞋa Kefo AvamuꞋyagale kava hu-mainea kanomoꞋa tokiyaꞋa amigeno Kefo AvamuꞋmona anati-neꞋatalie.” huꞋya hae. 16 HageꞋya nagoꞋa vayaꞋmoꞋya aye-vataga hugahe mage hae “Monafinagati avame yana hugeta tokiyakaꞋa agamano.” huꞋya hae.

17 Hageno YisasiꞋa amakupinagama ma haviya amaku amakesa ago haviteno mage hie “Nagoke kotega veaꞋmoꞋya aye fako huꞋya tuma hisayana ani kotega veaꞋnene haviya hu-lavigahae. Nago afamo aye fako huꞋya ‘Alu vaya mainone.’ huꞋya tuma hisayana ani afamola haviya hu lavigahae. 18 SataniꞋa anagaꞋaenema aye fako huꞋya ‘Alu vaya mainone.’ amakaiꞋami tuma hisayana Satani kava yagaisia tokiya hanaꞋa huno hanegahie? AꞋao tokiyaꞋa omalegahie ani yafe tamakaya nagaifena ‘PielesepulimoꞋa tokiya kamigeka ani yateti Kefo Avamula neꞋanatine.’ hutama nehayanagi havige nehae. 19 Nagaifena ‘Kagaya Pelesepulimo tokiyaleti anati neꞋatalane.’ hutama hayanagi tamakaitami anagatamia Kefo Avamula amanati-talageno Pielesepulimo amakaila amaya nehio? Ani anagatamia amakaiꞋami manima haya kea ali fako huꞋya tamaveneliye. 20 Tamage nagaya Anumaya Koti tokiyaleti ani Kefo Avamula anati neꞋataloe. Ani yafe Anumaya KotiꞋa kava yagaisia yana tamakaitela ago emaine.

21 Nagola tokiyaꞋage kanomoꞋma nomaꞋafima ati keveꞋa alino yagai-maleno maisiana mukiꞋa yamaꞋamoꞋa kanale huno hanegahie. 22 Nagola tokiyaꞋage kanomoma eno ani tokiyaꞋage kanoenema tuma hisaꞋana tokiyaꞋage kanomoꞋa agasesiana hagote kanomoꞋma ametitima huno mainea ati keveꞋa melino ani kanomo afeno yamaꞋa musufa alino vayaꞋamogami amamite amamite hugahie. 23 NagoꞋa veaꞋmoꞋya nagai kanapa veaꞋne omaisayana kame vayaꞋniꞋa mainae. NagoꞋa veaꞋmoꞋya sipi sipiꞋniꞋama naya huꞋya ali-taluma ohisayana amanati neꞋatalae.” huno hie.

24 Nago Kefo AvamuꞋmoꞋa vaya aguꞋafi haino maineleti ataleno viaꞋyamo hau hu-mainea kopinaga mo vaiyatete huno mai-faluma hisia kumafe ati neꞋaye. Ati ayegeteana mai-falu hisia kumala omalegeno “HagoteꞋna maigeꞋna emainoa aguꞋafi eteꞋna mo maigahue.” huno hie. 25 Uno mogeana ani agupi ago sese huno kanaleꞋya hu-malenegeno mogemaine. 26 Mogeteno eteno viaꞋyamo seveniꞋa (7) kefo kavaꞋamimoꞋma agase-mainea Kefo AvamuꞋyaga momavaleno egeꞋya ani agupi hai-faleꞋya mainageno hagotenoꞋa ani kanomoꞋa nagoke Kefo AvamuꞋmoꞋa aguꞋafima mainegeno haviya huno maineanagino menia mukiꞋa Kefo AvamuꞋmoꞋya aguꞋafina haiꞋya maigeno tusiꞋa kefo ya hutafa huno maine.”

27 Mani kema higeꞋya anifima alitalu hu-mainaya veaꞋnefiti nago aꞋmoꞋa ala kefiti mage huno hie “KatetenoꞋma numa kaminea aꞋmona Anumaya KotiꞋa tusiꞋa muse huno haiya yana amine.” huno hie. 28 Higeno YisasiꞋa mage huno hie “Ani aꞋmoꞋa musena hugahianagi Anumaya Koti kema haviꞋya akave malesaya veaꞋmoꞋya tusiꞋa muse hugahae.” huno hie.

29 MukiꞋa veala agaite melitalu hageno mage huno hamapaiye “Menia ma kanafima mainaya veaꞋmoꞋya tusiya huꞋya kefo veaꞋne mainae. ‘TokiyaꞋage avame yana tavelio.’ huꞋya hayanagi Anumaya KotiꞋa ani yana oꞋamamigahigi nagoke avame yana nayoma mainea aune kanoa Yonama hutenea tokiya avame yana tamaveligahie. 30 Yonana noyamemoꞋa asaga huno nakaigeno taliꞋa (3) yupa aipafinaga maineafe Ninive mainaya veaꞋmoꞋya avame yana amaveli-maineane. Nagaya ikapinagati emainoa kano vayaꞋmo natenea kanomoꞋna menia ma kanafima mainaya veaꞋmogamina nagaya aniꞋa kavala hisua kavaꞋniꞋa avame yana tamaveligahue.

31 Nagola alu haupalegati emainea sauve aꞋmoꞋa mopamona atupaleti eno SolomoniꞋa kanale agu agesaene kanomo kea havigahe emaineanagi haviho Solomonina agase-mainea kanoa ma mainegetama tamakaya agai kea nohaviye. Nohaviyafe Anumaya KotiꞋa kaiyekema hulamatesia yupa ani aꞋmoꞋa hetino menia ma kanafima mainaya veafe kefo kava hutama agai kema ohavinaya yafena hu falote hulamategahie. 32 Ninive kumate mainaya veaꞋmogamina YonaꞋa Anumaya Koti kea hamapaigeꞋya kefo yaꞋamihena amaipa aiyahae hu-mainagi haviho menia Yonana agase-mainea kanoa ma mainegetama tamakaya kefo yatamihena tamaipa aiyahae nohae. Tamaipa aiyahae nohayafe Anumaya KotiꞋa kaiyekema hulamatesia kanamoꞋa Ninive kumate nayoma mainaya veaꞋmoꞋya hetiꞋya menia ma kanafima mainaya veaꞋmoꞋya havi kava hu-mainayafe hu falote hulamategahae.”

33 “VeaꞋmoꞋya lamua hanagaliteꞋya nopinaga hanesia komufinaga omalegahae. Susufaneletila aiso ohugahagi ani nopima hai falesaya veaꞋmoꞋya agesayafe sipale nemalae. 34 TamaulagamoꞋa tamakupinaga aivasa hisia lamu hane. TamaulagamoꞋa kanale yama agesiana tamakupinaga aivasa hu-mainegi tamaulagamoꞋa kefo yama agesiana tamakupinaga haniki-maine. 35 Tamakesa havilama hiho ‘Nagupinaga aivasa hu-maine.’ hutamama hisayana asu huno haniki-mainesia yafe hisagi kava yagaitama maiho. 36 MukiꞋa tamaugafa aivasa hisigeno nagoke kaiyaga hanima okisiana lamumoꞋma aivasa hia avamete mukiꞋa lamakupinaga tusiya huno aivasa hugahie.” huno hie.

37 Nagola Falasia kanomoꞋa Yisasifena mage huno hie “Menia kagaya nagaiꞋene kavela me negane.” huno higeno YisasiꞋa kave mo negahe Falasia kanomo nopi haino mopale maine. 38 Mainegeno ani Falasia kanomoꞋa mogeana YisasiꞋa kaveꞋma negahena ayana sese ohuno* mopale maiya yafena agesa havi havi huno maine. 39 Mainegeno YisasiꞋa mage huno hapaiye “Tamakaya Falasia* vayaꞋmogatama amega kava hutama masutamiene yopatamiene amega kaiyagaꞋa sese nehagi tamakupina musufa yaꞋene kefo yatamiene hiya hulamatenegetama sesela nohae. 40 Tamakaya aifoꞋnafo vaya mainageno Anumaya KotiꞋa amega kaiyagaꞋage talo nehuno agusafinaga talo ohuneo? 41 Masutamiene yopatamienema hanesia kavela kasagoꞋya yaꞋamima omalenesia veaꞋmogamima amamisayana tamakuꞋamoꞋa oniꞋyaꞋage ohugahie.

42 AvoꞋnio Falasia vayaꞋmogatama kaꞋyeho. Tamakaya supu tala yaꞋene atuꞋene hefi kana yaꞋene osi osi yana alitama teniꞋa (10) malenafiti nagoke Anumaya Kotina neꞋamitama nehayanagi fatago hutama maisaya yaꞋene Anumaya Kotifema lamahaisia yaꞋene ago atalenae. Hagotetama fatago hutama mainetama Anumaya Kotifena tamahau tamayamopafi tamahau-maineanagitama haenagaꞋa supu tala yaꞋene atuꞋene hefi kana yaꞋene teniꞋa (10) malenafiti nagoke Anumaya Kotina amisayana kanale hugahie.

43 AvoꞋnio Falasia vayaꞋmogatama kaꞋyeho. Mono nopima neꞋutama ‘Kava vayayaga nemaiya sialefekeꞋya maigahune.’ hutama veaꞋne atagu nefaya kumapina ‘Nagaifena ala kano mainane huꞋya hisae.’ hutama nehae. 44 AvoꞋnio tamakaya kaꞋyeho. Tamakaya vaya hevaimatenaya komu kana hutama mainae. TamakuꞋamoꞋa oniꞋyaꞋage higetama falaki-mainageꞋya veaꞋmoꞋya oniꞋyaꞋage yama hanea komufi vaya hevaitenaya komule oꞋageꞋya ute ete nehae.” huno hie.

45 Higeno nagola kahegi kema havilinea kanomoꞋa kenonaꞋa mage huno hapaiye “Hulavenelina kanomogae ani kema hanana tagaiꞋenefe tagaye hia ke nehane.” huno hie. 46 Higeno mage huno hie kahegi kema havilinaya vayaꞋmogatama tamakaifeꞋene nehugi avoꞋnio kaꞋyeho. Tamakaya kahegi ke malenaya ke hutama tusiꞋa kanaꞋage ya mukiꞋa veaꞋmogami amayoꞋnale malenetama amaya hugahena nagoꞋke tamakinagoa maletama amaya ohageꞋya tusiꞋa kana yakefa neꞋaliye.

47 AvoꞋnio kaꞋyeho. Tamakinago-moꞋya Anumaya Koti amaune vayaꞋa hamayageꞋya fali-mainayanagitama tamakaya anima fali-mainaya amaune vayaꞋmogami komulega vilasi hoya maitama nehae. 48 Vilasi hoya maitama nehayafe “TamakinagomoꞋya amaune vayala hamayageꞋya fali-mainaya yafena kanale kava humainae.” hutama nehae. 49 Anumaya KotiꞋa kanale agu agesaene kanomoꞋa mage huno humaine “Nagaya nagaiꞋni amaune vayaꞋene Aposolo vayaꞋene amakaipina visageꞋya nagoꞋa veaꞋmoꞋya ali haviya humateꞋya nagoꞋa veaꞋmoꞋya hamaesageꞋya faligahae.” 50 HamayageꞋya fali-mainaya yafe ma mopama talo hu-mainoa kanafina aepa heꞋya mukiꞋa kafua amaune vaya hamayageꞋya fali-mainagi tamakaya meni kanafima mainaya veaꞋmogatama amakaiꞋma humatenaya havi kavaꞋmo anonaꞋamia aligahae. 51 Hagoteno Epolona haegeno fali-maineane. NagoꞋa hamaeme hamaeme ageno haꞋno hutegeꞋya haenagalafa Sekalaiyana ala mono no kegiꞋyamo amuꞋnopi yafa folamole heti-mainegeꞋya hayageno fali-maineane. Nagaya tamage huꞋna tamahanepauve hamayageꞋya fali-mainagi tamakaya menima mainaya veaꞋmogatama hu-mainaya havi kavaꞋmo anonaꞋamia aligahae.

52 AvoꞋnio kahegi kema havilinaya anagaꞋmogatama kaꞋye ho. MukiꞋa Yisasi kea havimainayanagi veaꞋmoꞋya ohavisae hutama fita ki-maletetama yakisaya ki nofila ago alitama atalenae. Tamakaya “Ani nopi ohaigahune.” hutama haleti nagoꞋa veaꞋmoꞋya “Hai falegahune.” huꞋya haya veaꞋmogamife “Hai ofalegahae.” hutama katile neꞋamatae huno hamapaiye.

53-54 YisasiꞋa ani nopiti hati-lavigeꞋya mukiꞋa kahegi kema havilinaya anagaꞋene Falasia vayaꞋene akave neꞋuꞋya tusiya huꞋya amaipa kafa heteteꞋya amata huꞋya alu yafe alu yafe agaila havige havige nehuꞋya mage hae “AgaiꞋama hisia keleti atafa huta kaiyekea hutegahune.” huꞋya humainae.