13
“TamakuꞋa aiyahae hiho.” huno humaine.
Ani yupa nagoꞋa vayala Kalili vayafe Yisasina kea hapaigahe eꞋya mage hae “Ani Kalili vayaꞋmoꞋya Anumaya Koti muse yama amigahena sipi sipi nehageno PailatiꞋa, kava kanomoꞋa, ati vaya humategeꞋya me hamayageꞋya faligeno kolaꞋamiene sipi sipi afuma haya kolaꞋamoꞋene nagopi tavi-maine.” huꞋya hae. Hageno YisasiꞋa mage huno hie “Kalili vayaꞋma fali-mainaya vayaꞋmogami kefo yaꞋamia nagoꞋa Kalili vayaꞋmogami kefo yaꞋamimona ago amakaseno hai-mainea yafe fali-mainae hutama tamakesa nehavio? Tamahapauve ani vayaꞋyaga kefo yaꞋamia ala huno otamakaseneanagi tamakaya kefo yatamihena tamakuꞋa aiyahae ohisayana aniꞋa hutama faligahae.
Nago yupa Siloamu kumate ayaꞋaya nona tagape ailavino eitiniꞋa (18) vaya hamaegeꞋya fali-mainaya kea havilinao? Na tamakesa nehaviye ani vayaꞋmogami kefo yaꞋamimoꞋa nagoꞋa Yelusalemu mainaya veaꞋmogami kefo yaꞋami ago amakaseno hai-maineafe fali-mainae hutama tamakesa nehavio? Tamahanepauve anima fali-mainaya vayala kefo yaꞋamimoꞋa ala huno otamakasenegi tamakaya kefo yatamihena tamakuꞋa aiyahae ohisayana aniꞋa hutama faligahae.”
Nago yosamo avame kea humaleno alagaꞋa oꞋayea yafe humaine.
YisasiꞋa nago avame kea huno mage hie “Nago kanomoꞋa hoyaꞋafina figi yosa hane. Nago yupa alagaꞋa tagigahe vianagi alagaꞋa omale. Omalegeno hoyafi aliꞋya neꞋalia kanomofe mage huno hie ‘Havio nagaya taliꞋa (3) kafu alaga aligahe ete ete huanagi alaga omalene. OꞋayeneafe ani yosa atagi-talo. NaꞋa higeno mopamona limaꞋa afaꞋa nenegeꞋna alu yosa faisue huꞋna nehue.’ huno hie. Higeno hoyafi aliꞋya kanomoꞋa mage hie ‘MusekaꞋa nehugi ma kafuene atalegeꞋna hafuꞋyafina aipopoꞋma huꞋna afumo aifa kateꞋna maleꞋna agano. Malesugeno nago kafuleꞋma alagaꞋa ayesio? OꞋayesigeka afaꞋa atagi-talegane.’ huno humaine.”
YisasiꞋa nagola kali neꞋalia alagino alino kanale hutene.
10 Nago Sapati yupa YisasiꞋa nago mono nopi maineno humavenelie. 11 Humaveneligeno nagola kali neꞋalia alagino ani nopina maine. Ani aꞋmona aguꞋafina Kefo Avamula hai fale-maineno tusiꞋa kali neꞋamigeno eitiniꞋa (18) kafu ani kalia ali-maineanagino akaveꞋya ayamufamoꞋa fagagigeno hetino fatago huno nomaiyane. 12 YisasiꞋa ageteno ke huno mage huno hie “Ma aꞋmogae kalikaꞋa ago ali neꞋataloe.” huno hie. 13 Nehuno ani aꞋmo augafale aya malegeno anile aupaꞋa akaveꞋya aifatago higeno hetino maineno Anumaya Koti agia alisaga humaine.
14 Nehigeno ani mono nopi soka kanomoꞋa YisasiꞋma Sapati kanaleꞋma hutea yafena aipa kafa heteteno mukiꞋa veafe mage huno hamapaiye “AliꞋya kana sikisiꞋa (6) kana hanegi kalitima alino kanale hisie hinutamahena ani aliꞋya kanale eho. Sapati kana kalitami alilino kanale hulamatesia yafena omeho.” huno humaine. 15 Higeno AnumayamoꞋa kenonaꞋa mage huno hie “Tamakaya tamakuꞋafina havi omaletama amegati ke nehaya vagala vayaꞋmogatama tamakaya mukiꞋamogatama Sapati yupa toki afuene pulamakatamiene noꞋamifina mo kalu hetama ti amigahena amavaletama neꞋvayane. 16 NaꞋa nehayanagi ma aꞋmona Apalahamu aginagomona SataniꞋa eitiniꞋa (18) kafu nofi hutegeno kalia ali-maineafe Sapati yupa ani yana ali kalu hetaloa yafe ‘Havi kava hane.’ hutama nehao?” huno humaine. 17 HigeꞋya kame vayaꞋamoꞋya tusiꞋa amakaye higeꞋya mukiꞋa veaꞋmoꞋya kanale kava hia yafe tusiꞋa muse humainae.
“Anumaya KotiꞋa kava yagaisia kavaꞋmoꞋa maꞋa humaine.” huno humaine.
18 YisasiꞋa mage huno hie “Anumaya KotiꞋma kava yagaisia kavaꞋmoꞋa ma kava humaine? HanaꞋa huꞋna maꞋa augafa yana hane huꞋna tamahapaisue? 19 Ma osi osi alagamoꞋma hia avamete nehie. Ani alagamo agia masatatie. Osi osi alagama nago kanomoꞋa alino hoyafima fai-malegeno hageteno haino haino ala yosagefa hanegeꞋya namayagamoꞋya akopale noꞋamia ki-mainae.” huno hie.
20 NagoꞋene mage huno hie “Anumaya KotiꞋma kava yagaisia kavafena hanaꞋa huꞋna maꞋa yana hane huꞋna tamahapaisue? 21 Kaihamema hale negia avamete humaine. Nago aꞋmoꞋa ani kaihamema halegisia yana alino taliꞋa (3) ala yopafi taꞋnefa falauvaꞋene ali havigu higeno haenagaꞋa mukiꞋa taꞋnefa falauvaꞋmoꞋa halegi-maine.” huno hie.
Anumaya Koti kava yagaisia kumate hai falesaya fiana osi fia kanoꞋa hane.
22 YisasiꞋa Yelusalemu ugahe osiꞋosi kumaꞋyagaleꞋene ala kumaꞋyagaleꞋene uno humavelie. 23-24 Humaveneligeno nago kanomoꞋa mage huno havige “Anumayamogae Anumaya KotiꞋa naꞋmagi veaꞋne amaku amamena aligatigahie? OsiꞋa veaꞋnefi kasagoꞋya veaꞋne?” huno higeno YisasiꞋa alitalu humainaya veaꞋmogamina mage huno hamapaiye “Anumaya Koti kumateꞋma visaya fiana osi fia kanoꞋa hane. Ani fiapima vinutamahena tamayamufa alitama tokiyaꞋage hutetama hai falegahae. Hai falegahagi kasagoꞋya veaꞋmoꞋya ‘Hai falesune.’ huꞋya hugahayanagi amukoꞋamia omaleneanagiꞋya hai ofalegahae. 25 HaenagaꞋa ani noteꞋma kava yagai-mainea kanomoꞋa hetino fita alino kilamatesigetama fiate heti-mainetama fitale aiko nelitama mage hutama hugahae ‘Anumayamogae fita yakilato.’ hutama hisagenoꞋa mage hugahie ‘Nagaya otamakenoane. Tamakaya hanategati aya veaꞋne neꞋae?’ huno hulamategahie. 26 Hulamatesigetama mage hutama hugahae ‘KagaiꞋene kavela nenonane. Tagai kumate kaiyekea tahapai-mainana kano mainane.’ hutama hugahae. 27 Hugahayanagi mage huno hulamategahie ‘Ago tamahanepauve tamakaila otamakenoane. Hanategati aya veaꞋne neꞋae? Kefo kavakeꞋya ali falote hutama nehaya vealagi nagaitegatila mai-haletama viho.’ huno hulamategahie. 28 Tamakaya mogesayana ApalahamuꞋene AisakiꞋene YekopuꞋene Anumaya Koti amaune vayaꞋene Anumaya Koti kumatela mainesagetama mogegahayanagi tamakaya anilela oꞋugahayanagitama malaga mainetama tusiya hutama avia neꞋatetama tamakaitami tamaugafahena tusiꞋa kalagi aigahae. 29 Nagi mukiꞋa veaꞋmoꞋya yagemoꞋma tavi nefalelegatiꞋene evaꞋyi nehilegatiꞋene aluga aluga haupalegatiꞋene Anumaya Koti kumate melitalu huꞋya siale maineꞋya kavela negahae. 30 Haviho meni kanafina nagoꞋa veaꞋmoꞋya haenagalafa mainaya veaꞋmoꞋya uhagoteꞋya maigahae. HagoteꞋya mainaya veaꞋmoꞋya haenagalafa maigahae.” huno hamapaiye.
YisasiꞋa Yelusalemu mainaya veaꞋmogamifena avite-maine.
31 HigeꞋya ani kanafina nagoꞋa Falasia vayaꞋmoꞋya mage me hae “Ma kumala ataleka alu kumate vuo. HelotiꞋa ala kava kanomoꞋa ago kahaegahe nehie.” huꞋya humainae. 32 Hageno YisasiꞋa mage hie “Tamakaya utama ani afai kalamona, kesi kate vaiyatete nehia kalamona, nagayama hisua kea mage hutama hapaiho ‘Havio nagaya osi kanaꞋa Kefo Avamula veaꞋmogami amakuꞋafiti ali-taleteꞋna kali veaꞋnene aliꞋna kanale humateteꞋna taliꞋa (3) kanale aliꞋyaniꞋa ali avaya ayegahue.’ huꞋna tamahapai-mainoa kea mo hapaiho.” huno hamapaiye
33 Hamapaiteno “Anumaya Koti aune kanomona alu kumatela ohaegahayanagiꞋya Yelusalemuge haegahae. Ani yafe nagaya meniene egaene olagaene kate vaiyegahue.
34 Vaeha Yelusalemu mainaya veaꞋmogatama tamakaya Anumaya Koti amaune vayaꞋyaga nehamaetama yafa kaꞋyo alitama Anumaya Koti humategeꞋya tamakaitega emainaya vayala yafa kaꞋyoteti tavata hamae-mainayanagi nagaya mukiꞋa yupa a kokolemoꞋa nafaꞋneꞋama agekoꞋnafinagama alitalu nehia avamete huꞋna tamakaila nagaya nagaiꞋniꞋale alitalu hulamategahe nehugetama tamakaya ‘Ani kavala ohuo.’ hutama nehae. 35 Haviho ma mainaya kumatefena Anumaya KotiꞋa ago ataleno ‘AoteꞋyamaꞋae.’ huno humaineanagitama menia nagoꞋene onagegahagi ‘Anumayamo aliꞋya aligahe higeno hutenea kanoa Anumaya Koti kanale manu amisie.’ huꞋya hisaya kanafi nagoꞋene nagegahae.” huno humaine.