1-2 YisasiꞋa mage hie “MukiꞋa kanafina nunamuna hiho. ‘Kasalo tahae.’ hutama oꞋataleho. Ani kema havisaya yafe nagola huvame ke tamahapaigahue.” huno mage huno hie “Nago ala kumatela Yasi kanoa maine. Ani kanomoꞋa veaꞋnehe agesa havioꞋamamino Anumaya Kotifena koliꞋa nohiane. 3 Nagola megusa alagino ani kumatela maineno mukiꞋa kanafina ani Yasi kanomote ete ete huno mage huno nehiane ‘Nago kanomoꞋa ali-haviya hunategi kagaya kaiyekeꞋnia havika fatago ho.’ huno havige. 4-5 Havige havige maino higeno ani Yasi kanomoꞋa hagote kanafina ‘Kaya ohugahue.’ huno hu-maineanagi eteno haenagaꞋa agu agesamoꞋa mage hie ‘Tamage huꞋna nagaya Anumaya KotifeꞋene veafeꞋene kolia nohuanagi ma megusa aꞋmoꞋa nagaite ete ete hia yamoꞋa onahaiyanagiꞋna afaꞋa kaiyekeꞋa haviꞋna fatago hugahue. AniꞋa ohisuana mukiꞋa yupa ete ete hisigeno tusiꞋa kasalo nahaegahie.’ huno humaine.”

6 YisasiꞋa mage huno hie “Fatago kava ohunea Yasi kanomoꞋma humainea kehena havilama hutama haviho. 7-8 Anumaya KotiꞋma hisia yafena na tamakesa nehaviye? AgaiꞋa havinoꞋma hapalimatenea veaꞋmoꞋya nateꞋene kegeꞋene mage huꞋya havinegae ‘Ali-haviya hulataya veaꞋmogamina ageteka fatago huka kaiyekea humato.’ huꞋya havige havige hisageno ani kea havisio? E, afaꞋa havigahie. AyaꞋaya kanagefa maiteno amaya hisio? AꞋao tamahanepauve ali-haviya hu-neꞋamataya veaꞋmogamina aupaꞋa anonaꞋamia humategahie. Nagaya ikapinagati emainoa kanoa vayaꞋmo natenea kanomoꞋna eteꞋna esuana nagaifema haviꞋya amakupi maleꞋya ametiti nehaya veaꞋnea ma mopafina mainesao omainegahao?” huno humaine.

9-10 NagoꞋa veaꞋmoꞋya amakaiꞋami amaku amakesafiti “Kanale kava nehunageꞋya nagoꞋa veaꞋnea kefo kava nehaya anaga mainae.” huꞋya nehaya veaꞋmogamifena YisasiꞋa avame ke huno mage huno hie “Tole kanolatamogania nunamu hugahe mono nopi haiꞋana umainaꞋe. Nago kanoa Falasia kanoe. Nago kanoa musufaya huno vaya amaugafaleti takisi mone aliliteno nehia kanoe. 11 Falasia kanomoꞋa amuꞋnote mo hetino maineno Anumayamotega agaiꞋahe mage huno hie ‘Nagaya nagoꞋa veaꞋmoꞋya nehaya kavala nohue. Musufayama haya kavala nohue. Fatago ohunaya veaꞋmogami augafa kavala nohue. AꞋnele kumai nehaya kavala nohue. Mama mainenoꞋma vaya amaugafaleti takisi mone aliliteno nehia kano kana ohunoe. Ani yafe musekaꞋa nehue. 12 MukiꞋa sotamo aliꞋyapina nagaya tole yupa kavela mosiꞋna maineꞋna mukiꞋa neꞋalua yapitila teniꞋama (10) malenofitila nagoke alitayeꞋna negamuane.’ huno hie.

13 Hianagi vaya amaugafaleti takisi monema aliliteno nehia kanomoꞋa aluꞋale maineno Anumaya Kotitega ke huno havigegahe hetimaineno ‘Nagaya kefo kano mainoe.’ huno ikapinaga agesaga ohuno ape huno havi kafa yonegino Anumaya Kotitega mage huno havige ‘Anumayamogae nagaya kefo kava hume hume nehauva kano mainoe. Nagaifena kalagi ainateka kahau hunato.’ huno havige.” 14 YisasiꞋa mage huno hie “Nagaya tamahanepauve anima musufayama huno takisi monema aliliteno nehia kanomofena Anumaya KotiꞋa ‘Fatago kano mainane.’ huno hutegeno nomaꞋalega eteno umaineanagi hagote kanomofena ani kea hu oꞋatene. NagoꞋa veaꞋmoꞋya amakaiꞋami amaugafa aliꞋya haisayana Anumaya KotiꞋa ‘Osi veaꞋne kanoꞋa mainae.’ huno humategahianagi nagoꞋa veaꞋmoꞋya ‘Osi veaꞋne kanoꞋa mainone.’ huꞋya hisayana Anumaya KotiꞋa amakia alisaga hugahie.” huno humaine.

15 NagoꞋa veaꞋmoꞋya osi osi nafaꞋneyaga Yisasite “Aya malesie.” huꞋya amavaleꞋya neꞋageꞋya agaiꞋaene tokaeꞋya nemaiya anagamoꞋya ageteꞋya “NaꞋa kavala ohiho.” huꞋya kemamaki-mainae. 16 Kemamakiyanagi YisasiꞋa ani nafaꞋneyagahe mage hie “AmatalegeꞋya nagaitega eho.” higeꞋya ageno mage hie “NafaꞋneyaga nagaite esaya yafena kahegi oꞋamateho. NaꞋa huꞋya nafaꞋnemogami avamete maisaya veaꞋmoꞋya mage hugahae ‘Tagaya tokiyatia omalenegi Anumaya Kotiga kava yagailato.’ huꞋya hugahae. 17 Tamagelafa huꞋna tamahanepauve nagoꞋa veaꞋmoꞋya nafaꞋne mainaya avamete maisaya veaꞋmoꞋya mage hugahae ‘Tagaila tokiyatia omaleanagika Anumaya Kotiga kava yagailato.’ huꞋya ohisayana Anumaya KotiꞋma kava yagaisia kumatela oꞋugahae.” huno hie.

18 Nago kava kanomoꞋa mage huno havige “Kagaya kanaleꞋya huka humavenelina kanomoga nagaya hanaꞋa huteꞋna agola maige maige hisua nahaimula alisue?” huno havige. 19 Havigegeno YisasiꞋa kenonaꞋa mage huno hie “NaꞋa higeka nagaifena kanale kanoa mainane huka nehane? Anumaya KotiꞋa agaiꞋage kanale kanoa maine. 20 Kagaya Anumaya Koti kahegi kea ago havilinanagi ani kemoꞋa mage huno humaine ‘Kumai he yana ohuo. Vayala hamaegeꞋya ofaliho. Musufayana ohuo. ‘Ma kanomoꞋa havi kava nehie.’ huka havigea huoꞋato. Itakafokamo kea oꞋatagaeka anakia alisaga huo.’ huno humaineane.” huno hie.

21 Higeno ani kanomoꞋa mage hie “Nagaya nafaꞋnema mainoa kanaleti aepa heꞋna mukiꞋa ani kema hana kea akave nemaloane.” huno hie. 22 Higeno YisasiꞋa ani kea haviteno mage huno hie “Nago kavaꞋene huo. MukiꞋama malenana mone fenoꞋyaꞋyagaka alika fako faka huka moneꞋamima omalenesia veaꞋne amamisanageno Anumaya KotiꞋa ikapinaga hanea afenoꞋyana kagaila kamigahie. AfenoꞋyaꞋyagaka fako huka amamite amamite huteka nakave eno.” huno humaine.

23 Higeno ani kanomoꞋa ani kea haviteno mone fenomaꞋamoꞋma kasagoꞋma humainea yafe oꞋatalesia agesa haviteno aipamoꞋa tusi kanaꞋage humaine. 24 KanaꞋage higeno YisasiꞋa ageteno mage huno hie “MukiꞋa mone fenoꞋyaꞋamima hanesia veaꞋmoꞋya tusiꞋa kasageke huꞋya ‘Anumaya Kotife kava yagailato.’ huꞋya hugahae. 25 Nagola pulumaka kana afumo agia kemolomoꞋa nekaꞋyamo kapima hai falesiana afaꞋa yoꞋyo huno hai falegahianagi mukiꞋa mone fenoꞋyamaꞋa hanesia kanomoꞋa Anumaya Kotife ‘Kava yagainato.’ huno kasageke-voke hugahie.” huno humaine.

26 HigeꞋya ani kea haviteꞋya veaꞋmoꞋya mage huꞋya hae “NaꞋama hu-mainesiana Anumaya KotiꞋa hana veaꞋmogami amaku amamemaꞋa aligatigahie?” huꞋya hae. 27 Hageno YisasiꞋa mage hie “VeaꞋmogamina himamuꞋamia omaleneanagiꞋya ohugahayanagi Anumaya KotiꞋa mukiꞋa kava hisia himamuꞋa haneanagino afaꞋa aligatigahie.” huno hie. 28 Nage higeno PitaꞋa mage huno hie “Havio tagaya mukiꞋa yatia ataleteta kagai kakavela neꞋone.” huno hie. 29-30 Higeno YisasiꞋa mage huno hamapaiye “Tamage huꞋna tamahanepauve mukiꞋa veaꞋmoꞋya Anumaya KotiꞋa kava yagaisia keꞋa veaꞋnema mo hamapaigahena noꞋamiene aꞋamiene amasaꞋamiene nepuꞋamiene itaꞋafoꞋamimoꞋene nafaꞋneꞋamiene amataleꞋya visagenoꞋa Anumaya KotiꞋa mopaleꞋma mainaya kanaleꞋma atalenaya yaꞋene nagoꞋene nagoꞋene anonaꞋa ohavunamaꞋa ya amamiteno haenagama falote hisia kanafina maige maige hisaya hamaimuꞋene amamigahie.” huno humaine.

31 YisasiꞋa agaiꞋaenema tokaeꞋya nemaiya anagala hamaote amavaleno momateneno mage huno hie “Haviho tagaya Yelusalemu haisunageꞋya mukiꞋa Anumaya Koti amaune vayaꞋmoꞋya ikapinagati emainoa kanoa vayaꞋmo natenea kanomonihema kae-malenaya kemoꞋa efalote huno tamage hugahie. 32 Nagaila natafa huꞋya Yuta vea omainaya vayate navaleꞋya momamisageꞋya nagaye hisifa kea hunateꞋya hu-haviya hunateteꞋya amavetuꞋna henategahae. 33 Hegi kaꞋyoteti nahaeteꞋya tavata nahaesageꞋya hevainatesageꞋna tole yupa komufina maiteꞋna tagufa kanale fali-mainesufitila eteꞋna hetigahue.” huno hie. 34 Hianagi YisasiꞋene tokaeꞋya nemaiya anagaꞋmoꞋya keꞋa haviyanagi ani kemo aepamoꞋa falaki-mainea yafe havilama ohunae.

35 YisasiꞋa Yeliko kumate uvaꞋyi hugahe mo aupa higeno nagola aulaga asu humainea kanomoꞋa kate mopale maineno monehe aukaꞋya hie. 36 AukaꞋya maino nehigeꞋya mukiꞋa veaꞋmoꞋya agaseꞋya eutele haya yafe “NaꞋa higeꞋya mukiꞋa veaꞋmoꞋya nagaseꞋya eneꞋvae?” huno hie. 37 HigeꞋya “Nasaleti YisasiꞋa neꞋegeꞋya kagaseꞋya eneꞋvae.” huꞋya hae. 38 Hageno ala kegefafiti mage huno hie “Yisasiga Tevitina aginagomogae nagaila kahauna hunato.” huno hie.

39 HigeꞋya aulegama mainaya veaꞋmoꞋya kemakiꞋya “Ke ohuka maiyo.” huꞋya hayanagi nagoꞋene ala kefiti keha keha hie “Yisasiga, Tevitina aginagomogae kahauna hunato.” huno keha keha humaine. 40-41 Higeno YisasiꞋa haviteno anile heti-maineno “Avaletama nagaite eho.” huno higeꞋya avaleꞋya ageno YisasiꞋa “NaꞋa hugatesue hugeka nehane?” huno havigegeno “MusekaꞋa nehue nagaya eteꞋna naulaga agesua yafe nehue.” huno hie. 42 Higeno YisasiꞋa agaifena mage hie “Kaulaga agegali huo. Nagaifema havika kagupi maleka kametiti hanafe kaulagamoꞋa ago kanale hugate.” huno hie. 43 Higeno aupaꞋa ani kanomoꞋa agegali nehuno Yisasi akave neꞋeno Anumaya Koti agi alisaga nehigeꞋya mukiꞋa anile alitalu humainaya veaꞋmoꞋya ageteꞋya Anumaya Koti agia alisaga humainae.