1 Ba:bene Polote Debi haba ba:gala Lista habamo nuluhukuti eta Ya:suku ta:matadawa ba:bo numiya:, ebeno mahilo Timotitila. Timotikono menoko ba: Yunapi kamenala ba:gala ebe hibima: mididawala, huiyatiya ebeno nabiwi Yuha: lumagila, ebe ba: Guliki hoponapima: eda:nami. 2 Lista ba:gala Aikoniyama habalo demedehonama: ba:bi hibima: midipi hiliyonomate Timotikono emede komo iya:tawahate hidonomoma: ga:lanakuya:, 3 ba:bema: Poloko ubila Timotiti Godokono oko ipuwalo eba:go pata:. Huiyatiya ba:be hopolo demedehonama: ba:bi Yunapi hiliyonomate ba:moe komo biya:tawahuya:, Timotikono nabiwi ba: Guliki hoponapila ba:bema: Timotiti Yunapino tama itamida kukala kalawiya:ha:. Ba:be mabuma: Polote Timotiko eta okamo magataheno, Yunapino ukui komodobuilamema: ebete Timotiko dopamo tama itamida iya:tawa lumagitamo noemiya: ba:be komo konelawema:. 4 Ba:bene Polua:te Timotiko lawete komo habahabamo kapimilo da:tolamenakui, iba:te Yelusalema sose watowatopi ba:gala oelamepi dubagodone kebe tutumu dopamo duwatiya:, ba:bi komokomo benehawakalilamenakuya: hibima: midipa:te ba:bi tutumamo kopapamila:halenama:. 5 Ba:bema: hibila, ba:be hopo konomolo Godote sose tawakalubino hibima: midi ipuwalo ibi ba heluilame, komo hegela hiliyonomolo ibino kuitititi hunamo odolo kekelanamiha:.

6 Ba:ba tetelo Godokono Gobogobote Polui na:duhilamiya: iba:te A:isiya hopolo ebeno tabo konolamagimima:. Ba:bema: iba:te Piligiya ba:gala Galesiya hopodo ba tolame 7 Misiya hopo tatalia:mo da:nikuliya:, ibi ubila eta Bitiniya hopamo konogomoma: huiyatiya Ya:sukunu Gobogobote ibi gala na:kaduhilamiya:. 8 Ba:be mabuma: iba:te Misiya hopodo tolamete kehaha: kolomoeno Talowase habamo dito nepalaguya:. 9 Ba:be dulu Polote hiyolo Ma:sadoniya dubu buminiya:, ebete utinate Poloko ba:ma ka:na toemehoniya:, “Ama: a owalubima: Ma:sadoniya hopamo na:pa:hiwuya:.”

10 Ba:bene eta duiduiyalo ale Polokono hiyo komo iya:tawahate tabo ba:ma ka:na ga:luya:ma:, “Godote ebeno ubi atamo a:hawakalimi, ale Ma:sadoniya hopo tawakaluba:tamo ebeno Hido Tabo konolamagimima:.” Ba:bema: ba:ba tetenomolo ale ilina hiduilamete ba: dito tupuimiya:ma:.

11 Ba:bene ale ko palai boga:mo ololote Talowase haba ba miya:pa kehaha: kolomoeno Sa:mota:si hopamo ba:bo na:hiwaliya:ma:, ba:bene eta hegelalo ale gala katupuimiti Niyapolisi habamo dito nikuliya:ma:. 12 Ba:bene a haka gabodo gala katolamete Pilipai ko habamo ba:bo nikuliya:ma:, ba:be Pilipai haba ba: Ma:sadoniya hopoeno konomo habala, ba:bema: komo Loma habanapi hiliyonomate ibino hoponomone pelamete ba:be habalo pemedehonama:. Ba:bene ale komo hegelalo ba:bolo emeda:tepate, 13 Yu tawakalubino okoha: talona hegelalo ale ba:be haba miya:pate tuli dodamo dito nepalaguya:ma: mabu a ba:ma ka:na emalagidoluya:ma:, diyala, Yunapi kapiyakapiyate Godotamo toetoe tabo ga:lama: ba:bamo da: pekapiyuimimina:. Ba:bene komo kamenakamenate kapimilo da:pola:nuya:, ale ibi nulamete iba:go nahiditi tabo ba:bo nega:luya:ma:. 14 Ba:bi kamenakamena ipuwalo eta dogodogodawate na:lutiya:, ebeno mahilo ba: Lidiyatela, ebe ba: Tayataila habanapila ba:gala ebete hawihawi kaliko kolowami ipuwalo koko mani buwatenakui. Ba:moe kamenate hibi Godo badikuminakui, ba:bene Polote Ya:sukunu komoma: tabo dolamagiya:, Kodawate ebeno tepo ipuwa ba:bo a:hiya:midamiya: ebete tabo hibinomolo kolawema:. 15 Ba:bema: Lidiyako ba:gala ebeno genamanapi, ale ibi beyamo wadulatelete ebete a ba:ma ka:na kiyaa:miya:, “La:le na Kodawa Ya:sukunu eta hibima: mididawama: hibilo da:ga:lama, wadiyala la: pelamete naeno genamalo na:pemediya:la:.” Ba:bene ebete a koamo da:toea:mehuya: ale ebeno tabamo papamila:hate eba:go dito pelamiya:ma:.

16 Komo hegela da:petohuya:, eta tetelo ale Godotamo toetoe tabo ga:la habamo gala da:katolamiya:ma:, gabo tetelo komopino huiyaha: oko bohelete ago ba:bo aluguya:. Ebe kuba gobogobagoenola, ba:be kuba gobogobote ebeno olamagi ipuwado tawakalubi begoelamenakui kebe hiya:hiya: komate iba:tamo dikulimina:, ba:bema: ba:be boheleno namutuluba:te ebeno pakani komo ododi ipuwado tawakaluba:godone koko mani buwatenakuya:. 17 Ba:bene ba:be bohelete aeno gala hapuni Poloko ba:gala a ba ta:matoe gaa:tepahalo ba:ma ka:na negoiya:, “Ba:moi dubu ba: Hununomo Godokono okopila! Iba:te la: kokiyalamema:na:ta la: ka:ka: mula: komo kebe gabodo na:ka:laweoma!” 18 Komo hiliyonomo hegelalo ebete atamo ba: ba:ba ka:na ewagelenakui, ba:bene eta tetelo Polote menemenema: eda:te boheletamo ohobigate kuba gobogobo ba:bo kiyahamiya:, “Nale Ya:su Kelisokono mahilamo ama: bikiyahamemata, ama: ebegodone nuluhuka!” Ba:ba tetenomolo kuba gobogobote bohelegodone ba: dito uluhukuya:.

19 Ba:bema: boheleno namutuluba:te ba:moe komo umiti iya:tawahuya:, ba:be bohele ipuwado ibino mani lawe gabo ba: a:wibo. Ba:moe mabuma: iba:te Poloko ba:gala Sailasiko heloamo uwatete, ba:be Pilipai ko haboeno watowatopa:te kebolo ka:pola:nuya: ba:be kolowami habamo ba:bo wadimuya:taliya:. 20 Ba:bene iba:te ba:bi Loma gabomani dubuino holoholo hapuamo ibi magatalete na:nega:luya:, “Ba:moi Yunapi dubu netewa iba:te aeno haba bekubahimina! 21 Ibino tutumu hiya:la, a Lomanapino tutumu huiyaha:, ba:bema: ibino iya:tumi komote a bikiyaa:mena aeno hidohido kukala kowakalamima:!” 22 Ba:bene ba:ba tetelo komo habalubi hiliyonomate Poluino ododili komokomoma: atu kuba tabo bekaga:luya:.

Ba:bema: Loma gabomani dubate ibi netewapino kaliko heloamo pipikulamelelamete komo alaholohopi ba:bo kiyalamiya: ibi giya:pa:pa:mo ka:na:miga:latilima:. 23 Ba:bene ibi kubanomamo a:na:miga:latiliti iba:te Poloko ba:gala Sailasiko du genamamo niya:hekete, ba:bene du genama umidawa na:kiyamiya: ebete ibi hidamo kulamenatema: iba:te alahutikapoma:. 24 Ba:bema: du genama umidawate ba:be tabo duliya:, ebete ibi du genama ipuwanomamo magatalete ibino nato keha gugamo newadulatelelamete ibi dito nimiya:paliya:.

25 Ba:be du iwa tetenomolo Poloko Sailasiko iba:te Godotamo toetoehonakui komo adikumi ohale akalapihonakuya:. Ba:bene gabomana:te komo dubu ibino kuba ododili mabuma: du genamamo ya:lo da:miya:tiya: ba:bi dubate Poloko Sailasiko ibino komo ba ulihona, 26 ba:ba tetenomolo ko wima:la:te penate du genama kubanomamo ba padegetena, gigihote ha:kiya a:hilamenate du genamanapino kokotoeno auli halete ha:kiya ba:bo ta:teholameniya:. 27 Ba:bene du genama umidawate ebeno genamanomolo mahiganate du genamoeno gigiho ya:lo a:hilame da:pulameniya: ebete nemalagidoloniya:, du genamanapi hiliyonomate ba: alahutiha. Ba:bema: ebete tole konomo lawenate ebeno alaholo gili magubutinate ebe ha:kiya ebeno ape ahohamidanama: ba ewagelena, 28 ba:ba tetenomolo Polote ba:be komo uminate ebe na:goepatemeniya:, “A:iye! Ama: ha:kiya ama: akanakapuma:la:! A hiliyonomo moela, kalahutihoha:!”

29 Ba:ba tetelo du genama umidawate ebeno hopopi begoelameniya: iba:te alo kowadahenama:, ba:bene ebete du genama guamo tola:go tiyonomolo na:pa:ganate, Poloko Sailasiko ibino nato mabamo neganate ba:bo nilililaniya:. 30 Ba:bene ebete ibi netewapi du genamane puluhukulatelenate ba:bo pegoelameniya:, “Koko dubala:, na bada komo ododiti Godogodone ka:ka: mula: komo ebo na:ka:lawemo?”

31 Iba:te na:huiyaniya:, “Ama: Kodawa Ya:suku hibima: na:mida:, ba:bene ebete ama: ba:gala amia:no genamanapino ka:ka: komula:lelamema:na:ta.” 32 Ba:bene iba:te du genama umidawa ba:gala ebeno genamanapa:tamo Kodawa Ya:sukunu tabo ba olamagimina ebeno komo ba:bo hawakaliminiya:. 33 Ba:bema: ba:ba tetenomolo du genama umidawate ibi netewapino bugumu ukulalelamenate, iba:te huiyatiya ebe ba:gala ebeno genamanapi hiliyonomo beyamo dito wadulateleniya:. 34 Ba:bene du genama umidawate Poloko Sailasiko ibi ebeno genama guamo magatalenate baa: ba:bo nikalameniya:. Ba: hibila, ebe ba:gala ebeno genamanapa:te konomamo kalakalahaniya:, mabu iba:te ba:be dulu ibino hibima: midi komo Godotamo a:miya:teniya:.

35 Ba:bene hegelate da:powalohuya: Loma gabomani koko dubate komo polisi dubu du genama umidawatamo ba:moe tabago poelamiya:, “Ama:le ba:bi dubu netewa du genamane dito nuluhukulatela:.”

36 Ba:bene du genama umidawate Poloko atu tabo bekanikiyamiya:, “Gabomani koko dubate tabo a:poema:, nale ama: ba:gala Sailasiko la: ba:moe du genamane kuluhukulatelema:. Ba:bema: ka:lo la: uluhukuti kalakalago na:toala:.”

37 Huiyatiya Polote ba:bi polisi dubu ulamelo iba:tamo na:goiya:, “Ao, ale dito a:kuluhukama:. La:eno koko gabomani dubate ha:kiya na:pelama:mena: a kopuluhukua:tema:, mabu a netewapa:te ba:moe hopolo Loma gabomanino pepago wapata:nama:,*Poloko tetelo Loma gabomana:te ibino Itali hoponapi kapiyatamo ba:bako pepa ikalameholenakuya:, iba:te komo hiya:hiya: hopolo ba wapata:lame ba:bi hopoeno gabomanino okopa:te temeteme iba:tamo ikalamekapoma:. Ba:bema: ba:bako pepagoeno lumagiti hibi kuba ododiha: tetelo eta gabomani dubuti ebeno komo hidamo anagiya:midameheno temeteme ebetamo dito dikamemene, ba:be mabuma: Loma koko gabomana:te pelamete ba:be gabomani dubutamo konomo kuba huiya kopikamema:na:. Poloko Itali hoponapiha:, ebe Yu lumagila. Huiyatiya ebete Tasase ko habalo da:hawakaluya:, ba:ba tetelo ebete Loma gabomana:godone pepa a:lawiya:, mabu Loma gabomana:te Tasase habanapa:tamo konomamo ba kalakalaha ibi hiliyonomatamo ba:bako pepa dito ikalameholiya:, iba:te ibino Itali hoponapa:tamo dikalamenakui ba:ba ka:na. ba:gala ale kuba ododihino iba:te aeno komo hidamo kanagiya:midaa:meha:, iba:te huiyatiya a giya:pa:pa:mo a:na:miga:titi du genamamo dito iya:hekiya:. Ba:bema: ka:lo ibi ubila a diya gabodo gelebadia:go dito koea:mema:. Ao, iba:te dopamo a na:pua:ma:mena:!”

38 Ba:bene polisi dubate tolamete Polokono tabo koko gabomani dubu da:nikiyalamiya:, ba:ba tetelo ba:bi dubate Poloko Sailasiko Loma gabomanino pepago wapata: komo uliti koamo toletolehuya:. 39 Ba:bema: iba:te pelamete Poloko Sailasiko iba:tamo nolata tabo pega:late ibi konomamo petoelameholiya:, iba:te Pilipai ko habane eta hopamo gelebadia:go kotoma:. 40 Ba:bene ibi netewapa:te du genamane puluhukuti, iba:te tote dopamo Lidiyakono genamamo nodolote, ba:bolo iba:te hibima: midipi ekaki da:nulamiya:, komo owalubi tabo nikiyahalamete Pilipai ko habane ba: dito tuya:.