1 Ba:bene Poloko Sailasiko iba:te A:mapipolisi haba ba:gala A:poloniya habado tote Tesalonaika ko habamo ba:bo nuluhukuya:, Yunapino eta baidi ibubulamehole genamate ba:bolo na:la:nami. 2 Ba:bene Polote komo habahabalo keba ka:na ka:pododinakui ebete Tesalonaika ko habalo ba: atumu kapododiya:, ebete netewa-kapiya okoha: talona hegelalo Yunapino baidi ibubulamehole genamamo nodolonakui Godokono Buka taboeno komokomo iba:tamo ba:bo nolamaginakui. 3 Ba:bene ebete hiya:hiya: taboeno ipuwa ba hawakalilame ibi hibinomolo ba:ma ka:na iya:tulameholiya:, Godote ya:lo tetelo dihatiya: ba:be ebeno nopo ipuwado Kelisote puluhukuti, tawakaluba:godone koko temeteme puwatete, hoe ipuwane gala kakamahigama:ne. Ba:bema: Polote iba:tamo na:goiya:, “Ba:moe Kelisoko nale ebeno komo la:tamo dolamagimo, ebe ba: Ya:sutila! Hoe ipuwane gala a:kamahiguya:!”

4 Ba:ba tetelo komo Yunapa:te ba:be taboeno hibi komo lawete Poloko Sailasiko bana kapiyama: ba:bo eda:huya:, ba:gala ba:be Guliki hopolo demedehonama:, komo ba:bi Yuha:pa:te hibi Godo dopamo dadikuminama: ba:gala komo Yuha:pino koko watowatopi kamenakamena atumu, ibi hiliyonomate kapimilo hibima: ba:bo midiya:. 5 Huiyatiya komo Yu tawakaluba:te ba:bi Yuha:pino hibima: midi komo dulamelelamiya:, ba:be mabuma: iba:te maubahalete ilina kolowami habamo tolamete, komo hiya:hiya: kuba ododilipi dubu nuwatete iba:go kapimilo konomo mauba komo ba:bo nadipatiya:. Ba:bema: iba:te haba konomolo helo adipatelo eta dubu Ya:isonikono genamamo gahugahulu tolamete gigiho newakalamiti Poloko Sailasiko ba:bo noholiya:, iba:te ibi nuwatete tawakaluba:tamo kopuluhukulatelema:. 6 Ba:ba tetelo iba:te ibi netewapi nipo noholete huiyatiya Ya:isoniko ba:gala komo Ya:suku ta:matapi genamane ba:bo wadimuya:taliya: ba:be haboeno gabomani dubatamo. Ba:bene iba:te gabomani dubatamo ibulunomamo na:ga:luya:, “Ba:moe hopo konomo da:kubahimina ba:bi dubate aeno habamo a:pikuliya:! 7 Ba:gala ba:moe eta dubu Ya:isoniti ba:bi kuba ododilipi kalakalago uwatete ebeno genamalo laha haba iba:tamo ikalami. Ibi hiliyonomate Konomo Gawadalagi Sisakono kukala bewakalamina, mabu iba:te na:ga:lana eta Ko Gawadalagi ba:luta, ebeno mahilo ba: Ya:sutila!”

8 Ba:bene habalubi hiliyonomo ba:gala gabomani dubate ba:be tabo uliti ukui bilibilinomoma: ba:bo eda:huya:. Ba:bema: ibi ipuwalo hiya:hiya: tabo konomamo ba ga:luta 9 gabomana:te Ya:isoniko ebeno mabuluba:go ibi na:kiyalamiya:, “Wadiyala la:eno kuba mabuma: mani atamo kohuiyama:nemata, huiyaheno ale la: du genamamo koniya:hekema:na:ta.” Ba:ba tetelo gabomana:te iba:godone mani uwatelamete ibino genamamo ba: dito noelamiya:.

10 Ba:bema: ba:be dulu hibima: midipi ekaka:te Poloko ba:gala Sailasiko ba:be habane dito oelameniya: Beliya habamo, ba:bene iba:te ba:bamo nuluhukunate, eta hegelalo iba:te Yunapino baidi ibubulamehole genamamo dito nodoluya:. 11 Ba:ba tetelo Beliya habanapa:te ibino tepo ipuwoeno gigiho a:hilamiya: Ya:sukunu tabo hido mulu ukuia:go kolawema:, Tesalonaikanapa:te dewageliya: eba ka:naha:. Beliyanapa:te huiyatiya hegela hiliyonomolo Godokono Buka taboeno komokomo da:ka:lamiholelenakui, ibi ipuwalo ba:bi komoeno ipuwa hidamo ba ga:la hibi komo ba:bo iya:tawahanakuya:, mabu ibi ubi konomola ba:moe komo umi, Polote iba:tamo dolamagiya: ba:be tabo da: hibila: o da: ha:dala:. 12 Ba:bema: ibi ipuwalo komo Yunapi hiliyonomate Ya:sukunu tabo hibima: na:midiya:, ba:gala ba:be atu tetelo ba:be Guliki hopolo demedehonama: ba:bi Yuha:pino koko watowatopi kamenakamena ba:gala dubu atumu, komo ibi hiliyonomate Ya:sukunu tabo kapimilo ba:bo lawiya:.

13 Huiyatiya ba:ba tetelo Tesalonaika ko habalo demedehonama: ba:bi Yu tawakaluba:te Polote Godokono tabo Beliya habalo da:nolamagiya:, iba:te ba:be komo uliti ba:bamo tolamete Beliyanapa:tamo helo ba nikalame ibi ba:bo nadipalateliya: iba:te Polotamo komaubahalema:. 14 Ba:ba tetenomolo hibima: midipi ekaka:te Poloko kehaha: kolomoeno eta habamo komo dubago ba: dito noemiya:, huiyatiya Sailasiko Timotiko iba:te Beliya habalo ba:bo pipikuliya:, iba:te Polokoba: katuya:ha:. 15 Ba:bene Poloko da:buiya:minuya: ba:bi Beliyanapi dubate boge lawete eba:go A:tenese ko habamo da:nikuliya:, ba:ba tetelo ibino habamo gala kakawilalema: ba ewagelita, Polote ibi na:kiyalamiya: Sailasiko Timotiko iba:tamo tabo katama:, iba:te A:tenesa:mo ebetamo tiyolo kopuluhukuma:.

16 Polote Sailasiko Timotiko ibino pe komo ba latimi, ba:be A:tenese ko habalo ida:da:li adikulame komokomo hiliyonomo dulameholiya:, ebete tepo ipuwalo menemenenomoma: ediya:. 17 Ba:bema: ebete Yunapino baidi ibubulamehole genamalo ibi ba:gala komo Yuha:pa:te hibi Godo dadikuminama:, ebete ibi hiliyonomatamo Godokono Buka taboeno ipuwa komokomo konomamo olamaginakui, ba:gala komo hegela hiliyonomolo ebete kolowami habalo dito da:wapata:lamitanakui ba:bi tawakaluba:tamo atu komokomo bekaolamaginakui. 18 Ba:bene Polote A:tenese habanapa:tamo Ya:sukunu hoene mahiga komo da:hawakalimiya:, iba:te ibino ukuilo nemalagidoluya: Ya:suku ba: eta hopo ida:da:lino gobogobola, ba:bema: komopa:te na:ga:luya:, “Ebe ubila ale muhulu hopoeno eta ida:da:lino komo kota:matama:.” Ba:bene ibi ipuwalo komo Epikuliya kapiyuimipi*Buka ka:lamiholedawa, wadiyala ama: ba:moe komo niya:tawa. Poloko tetelo Epikuliya tawakalubi ba: Guliki hoponapino kapiyuimi etala. Iba:te ibino ta:matapi ba:ma ka:na iya:tulamenakuya:, hiya:hiya: ida:da:lino gobogoboeno helo kitanaha:, ba:bema: wadiyala tawakaluba:te ibino tole komokomo gobogobamo ba miya:te kateneno ubilo kalakalago dito nemedehamena:. ba:gala Stowika kapiyuimipino†Stowika tawakalubi ba: Guliki hoponapino eta kapiyuimila. Ibi Epikuliya kapiyuimipi huiyaha:, ba:bema: iba:te komo hiya:hiya: ida:da:li hiliyonomo badikulamenama:, ba:gala ba:bi ida:da:lino helo ba tolelamena iba:te tuputupunomolo emedehonama:. Iba:te ibino ta:matapi ba:ma ka:na iya:tulamenakuya:, a hopo tawakalubi hiliyonomate ha:kiya aeno heloamo tepo ipuwoeno mulunomo ukui duwatema:, ba:ba tetelo a hibi kalakalago bemedehonama:. iya:tulamepa:te Polokoba: olowabeletihui da:tupuimiya:, komopa:te ebe walitilo na:ga:luya:, “Ba:moe wato ko dubuti daedae tabo dolamaginako, ebeno ipuwa badala:ka:?”

19 Huiyatiya komo iba:te Polotamo hido tete ba ikame ebe ibino A:tenese haboeno mulupino ahidi baha:mo ba:bo magatuya:, ba:be ahidi bahino mahilo ba: Aleyopagasela. Ba:ba tetelo Polote ibino holoholo hapuamo da:nuluhukuya: iba:te ebe nalatediya:, “A ubila ama:le a na:kiyaa:ma:, ba:moe uli iya:tulame tabo dolamaginaka keba ka:nala:ka:? 20 Mabu ama:le dolamagina ba:be taboeno komokomo aeno uliho ipuwalo hiya:nomoma: eda:hana, ba:bema: a ubila ama: ba:moe taboeno ipuwa atamo hidamo na:hawakalima:.” 21 Iba:te Poloko ba:ma ka:na kiyamiya:, mabu A:tenese habanapi ipuwalo puya:te ba:bolo da:hawakalahaliya: ba:gala puya:te muhulu hopone pelamete ba:bolo da:pemedehonama:, ibi hiliyonomate ubi konomamo ihatenama: ibino mulupino hiya:hiya: kapiyuimi ipuwalo uli komokomo ulihote koga:lanama:.

22 Ba:bene Polote Aleyopagase mulupi dubuino dopo hapulu mahigate na:goiya:, “A:tenese haba dubala:, na umimo la: ida:da:li adikulame komo ipuwalo helonomoma: eda:hanamata. 23 Iyo, nale la:eno hido habalo ba pata: la:godolo hiya:hiya: ida:da:li adikulame bahi da:pola:na ulamimo, ba:gala ba:bi hiliyonomo ipuwalo nale eta kapiya adikumi bahi bekumimo, eta lumagiti ba:be hunamo tabo ba:ma ka:na miya:tiya:,

“Ba:bema: la: A:tenese habanapa:te iya:tawahaheno dadikuminakoma, nale ba:be Kodawoeno komo la:tamo kohawakalimima:nemo. 24 Ebe ba: hopo konomo ba:gala ilina hiliyonomo Ododilidawala, iyo, ebete ba:moe hopolo ba:gala Hunu Habalo Kodawanomoma: eda:na, ba:bema: ebe ubihinola tawakaluba:te detemotehona ba:bi adikumi genamalo emedena. 25 Ba:gala ebe ubihinola a hopo tawakaluba:te aeno kokotamo eta ilina ododiti ebetamo ikame, mabu ebe ba: atamo hido ka:ka: ba:gala helo dikaa:mena ba:be Kodawala, iyo, ebete a hiliyonomoeno modoboha: komokomo ba emalagidolena ebeno malemale ipuwalo hiliyonomo hidohido komo atamo dito ikaa:mena. Huiyatiya numa:la:, ale ebe owalubima: ebetamo bada ilina na:kikamehoma:? Puliyala, kitanaha:, mabu ebe ha:kiya modobonomolo emedena!

26 “Ba:gala eta komo. Ba:moe Kodawate kapiya dubu ododiti, ebe ipuwane hiya:hiya: tawakalubi kapiyuimipi hiliyonomate ikuliya:. Ba:bene ebete ibi ba:moe hopo konomamo hiya:hiya: oelameholete ibino hiya:hiya: emede teteno kuititi ba:gala ibino hopoeno kuititi iba:tamo a:miya:telamiya:, ebete dopo dubu ododihino nopo dopamo keba ka:na kihatiya: ba:ba ka:na. 27 Numa:la:, Godote ba:be ododi komodo ebeno ubi bihatiya:, tawakalubi hiliyonomate ibino hiya:hiya: hopolo ba emedehona, iba:te ibi Ododilidawoeno komo emalagidololo ibino mulu ukuia:mo ebe dohowadimina: ebeno hibi komo ba:bo kumima:na:, baidi tamihodawate ebeno kokotamo gabo keba ka:na kohowadinako ba:ba ka:na. Huiyatiya kalakala konomola, ale ebe umima: eta kodakoda komote hibilo kitanaha:, iyo, ebete muhululu kemedenaha:, a tamenomolo bemedena. 28 Ba:be mabuma: eta muludawate tabo dopamo ba:ma ka:na goiya:,

29 Ba:bema: Polote tabo moga:melo gala na:kagoiya:, “La: hidamo nulia:la:. Hibila, ba:moe Kodawa Godote a hiliyonomo ebeno gugudima: ododiya: ba:bema: a ba:ma ka:na a:kemalagidolama:, aeno kokotamo o aeno mulu ukui komamo eta ilinamo aeno Nabiwino holoholo kododima:nema:. Ao! Tawakaluba:te golodo o siliba o hido nakolamo dododilinaka, hibi Godo ba:bi hiya:hiya: ida:da:li ilina huiyaha:. 30 Ba: hibila, dopamo tawakaluba:te ebeno hibi komo iya:tawahaheno kuba komokomo dododilinakui, Godote iba:tamo kuba huiya hibilo kikalamenakuiha:, huiyatiya ba:ma tetelo ebete hiliyonomo hiya:hiya: hopo tawakalubi begoelamena iba:te ibino kuba ododili ipuwane ebetamo kohobila:ma:, 31 mabu ebete ibi hiliyonomoeno komokomo kanagilamelelamema: ebeno Ko Hegela ya:lo ihatiya:. Iyo, ebete helo kebe dawatamo kikamiya:, ba:be Tuputupu Dubuino anagiya:mida ipuwalo tawakalubi hiliyonomate ibino kuba huiya ba:gala hido huiya modobonomolo kuwatema:na:. Ba:bema: mabu keka: tawakaluba:te ba:moe taboeno komo hibima: da:midimina:? Mabu bitana Godote tawakalubino holoholo hapulu ba:be Tuputupu Dubu Ya:suku hoe ipuwane adipatiya:!”

32 Ba:bene ba:bi A:tenese mulupi dubate Ya:sukunu hoene mahiga komo duliya: iba:te Poloko ba:bo walitiya:, huiyatiya komopa:te ebetamo na:ga:luya:, “Wadiyala ama: gala kapete atamo tabo na:kapolamagiya:.” 33 Ba:bene Polote tabo ga:la habane ba uluhuku, 34 komo dubate ebeno tabo hibima: miditi eba:go ba: dito nekapiyuya:, ibi ipuwalo Dayonisiyasiko ba: Aleyopagase mulupino kapiyuimi dubu etala, ba:gala ba:be atu tetelo eta kamena Damalisiko ba:gala komo kamenakamena iba:te atumu Ya:suku hibima: ba:bo midiya:.