1 Ba:bene 14 gogo da:kapetohui, ya:lo gogolo na Taitasiko lawete Banabasiko bana Yelusalemamo gala na:katuimo, 2 mabu Godote ebeno ubi natamo a:hawakalimi nale ba:be komo kododima:. Ba:bene nale sose koko watowatopi kapiyago ba nekapiyuimi, na Hido Tabo mabuma: kebe tabo komokomo Yuha:pa:tamo kolamaginakomo, ba:bi komo iba:tamo ba:bo hawakalilamimo. Ba: hibila, nale ba:be komo benododimo, mabu na ubihinola kebe gaote naeno kodakoda oko ipuwalo Yuha:pa:godone da:pikuli, iba:te ba:bi gao kubadopoma: ga:la. 3 Ba:bene iba:te naeno tabo ulihote, na owalubinidawa Taitasikono komoma: iba:te nago ukui kapiyama: ba:bo eda:huya:, ba:ma ka:na ebe Yuha:dawama: ba eda:na, talona puliyala ebete Yunapi dubuino tama itamida kukala laweha:ma: eda:lo Godokono oko nago kapimilo kowatinama:. 4 Huiyatiya aeno kapiyuimi habamo puya:te ha:da amiho gabodo da:pelami, ibi ha:kiya ibi hibima: midipi ekakima: ba ka:lami ba:bo ga:luya:, ebete tama itamida kukala na:lawa:mene. A:iye! Ba:bi dubate kuba ukui gabodo ago pekapiyuya:, a puya:te Yuha:pi ipuwalo oko dowatihonama: aeno ododi komo kubama: koga:lama:, ba:bema: a Ya:su Kelisoko ipuwalo Mosesekono Tutumu Taboeno menemene ipuwane dikulima:, iba:te ba:be tabo ulihote ubi ba:bo ihatiya: Tutumu Taboeno hala:mo a gala kakamatuhua:mehoema:. 5 Huiyatiya iba:te Taitasitamo ododima: da:ga:lui, ale ibino ubi komamo papamila:haheno aeno ukuilo tete nanekelenomolo ukui gagagagama: keda:haha:, iyo, ale la: Yuha:pi hibima: midipi mabuma: ibi ba:bo duhilamima:, iba:te Hido Taboeno hibi komo kubahimikapoma:.

6-8 Ba:ba tetelo aeno kapiyuimi ipuwalo puya:te watowatopima: deda:hui, ba:ba:te huiyatiya naeno okoeno ododili komo hiliyonomo ulihote modoboma: ga:luya:. Iba:te ba:moe komo iya:tawahuya:, Godote ya:lo tetelo natamo Hido Tabo Yuha:pa:tamo olamagi oko dikanamiya:, dopamo ebete Pitatamo Hido Tabo Yunapa:tamo olamagi oko keba ka:na kikamiya: ba:ba ka:na. Ba: hibila, Godote kebe heloamo Pitako Yunapa:tamo oemedawama: da:midiya:, ebete ba:be atu heloamo na Yuha:pa:tamo oenamedawama: a:kamidiniya:, ba:bema: ba:bi watowatopa:te naeno oko komoma: modoboma: ga:late eta hiya: gabodo kododima: na kakiyanameha:. Huiyatiya numa:la:, iba:te naeno oko kubama: na:ga:latale nale ba:be komoma: ukui bilibilima: ba:ka:eda:na:, mabu hopo habanapa:te pui kokopima: da:ga:lana, Godote ba:bi dubu hunu nikapa:mo kulamenaha: huiyatiya ebete tepo ipuwamo ulamena.

9 Ba:bene Ya:imesiko, Pitako, ba:gala Yoneko iba:te ba:be kapiyuimipino umi ipuwalo koko watowatopima: ba eda:hana, iba:te naeno hidonomo oko Godogodone pe komo diya:tawahui, ba:ba tetelo iba:te na ba:gala Banabasiko aeno kokoto uwatehuilo ale kapimilo tabo ba:ma ka:na ga:luima:, na Banabasikoba: oko Yuha:pino hiya:hiya: hopolo ba owatina, ibi huiyatiya oko Yunapino hopolo bowatihonamena:. 10 Ba:bene ale eta kapiya komo ododima: iba:te a ba:bo kiyaa:miya:, ba:ma ka:na Yunapi ipuwalo puya:te awaepima: deda:hana, ale Yuha:pi hibima: midipi kokiyalamema: iba:te ba:bi tawakalubi malemale mani miya:te komamo kemalagidolenakoma:, huiyatiya numa:la:, ibino tabo ulihino nale ba:be komo ododima: na ha:kiya naeno ubi dopamo ihatimo.

11 Ba:bene komo hegela hiliyonomo da:petohui, eta tetelo Pitate A:ntiyoka ko habamo puluhukuti eta kuba komo Yuha:pi hibima: midipi ekaka:tamo da:pododi, na ba:bema: sose tawakalubino holoholo hapulu ebe koamo kiyahamimo. 12 Iyo, ebete ago da:pemeda:tepui, komo hegelalo ebete Yuha:pi ekaka:go baa: kapimilo kalakalago a:nahanakui. Huiyatiya Ya:imesiti komo Yunapi dubu Yelusalemane da:poelami, Pitate ba:bo iya:tawui ibi ba: puya:te tama itamida kukala laweha:pa:go pola:na talonama: da:ga:lana ba:bi dubula, ba:bema: ibino ubiha: tabo komoma: ba toletole ebete Yuha:pa:go baa: na ba:bo ekelami. 13 Ba:bene A:ntiyoka habalo demedehona, komo ba:bi Yunapi ekaki Banabasiko bana, iba:te Pitakono ododi komo umiti tola:go ba: atu kuba komo ba:bo kaododiya:, iyo, iba:te Yelusalemanapi dubuino ubiha: tabo komoma: toletolehote baa: naha ipuwalo ibino Yuha:pi hibima: midipi ekaki dito miya:paliya:.

14 Ba:bema: Hido Tabote ale ododima: keba ka:na ka:kiyaa:mena, iba:te ba:be hibi tuputupu gabo da:miya:pui, nale ba:be komo ba umi ibi hiliyonomoeno holoholo hapulu Pitako ba:ma ka:na kiyahamimo, “Ama: Yu lumagima: ba eda:na, huiyatiya Yelusalemanapi pelameheno ama: Yuha:pino komokomo iba:go kalakalago ododinakuya:ta. A:iye, ba:moe ba: hido ododi komola! Ba:bema: mabu keka: ama: ba:ma tetelo ba:be hido ododi komo miya:pate temeteme Yuha:pa:tamo dikalamena, ba:ma ka:na iba:te a Yunapino iniwalino ododili komo ta:mataleheno ama: iba:go a:kalutamena:ta?”

15 Ba:bema: a puya:te Yunapi ipuwane da:hawakalahaliya:ma:, a ba:moe komo hibilo iya:tawahala, a la: Yuha:pi keba ka:nala:ka: eba ka:naha:, mabu la:eno komo tawakalubi hiliyonomate Godokono hibi gabo iya:tawaha:ma: ba eda:hana koko kuba ba:bo ododilinaka. 16 Huiyatiya a hibima: midipi hiliyonomate iya:tawahala, lumagiti Ya:su Kelisoko hibima: da:midimini, Godote ba:be komo kapiyado ebe tuputupudawama: koka:mima:ne, ebete Moseseko ipuwado tawakaluba:tamo dikalamiya: ba:bi Tutumu Tabamo papamiwata komodoha:. Iyo, ba:moe ba:be mabuma: a Yunapi ba:gala la: Yuha:pi, a hiliyonomate Kelisoko hibima: midi gabodo tuputupupima: ba eda:hana ba:bo ga:lanama:, eta gabo kitanaha: lumagiti Godokono Tutumu Tabamo papamiwata komodo ebeno tuputupudawama: keda:ma:.

17 Ba:bema: diyala, daedae ukuidawate ba:ma ka:na da: goemene, “La: hibima: midipa:te Kelisoko ipuwalo Godokono tuputupupima: eda:hama: ba ga:la, huiyatiya la:le Mosesekono komo Tutumu Tabamo kapapamila:hanaha:. Ba:bema: numa:la:, Kelisote la: na:heluilamenata la:le la:eno papamila:haha: komodo hibo gabo kududima:, koko kuba ododilipa:te keba ka:na kududinaka ba:ba ka:na!”

Na huiyatiya ebetamo tabo ba:ma ka:na kogoema:nemo, “Ao, ama: daedae ukuilo gaa:ta! 18 Godote Moseseko ipuwado atamo dikaa:miya:, nale ba:bi hiya:hiya: Tutumu Tabo kodakodanomolo gala a:kuwata:mo. Ama: numa:, ebete naeno hibima: midi komodo na kebe komo kodakodalo lawema: kubama: goelo diya:tunamiya:, nale ba:be komone ohobigate ba:bene ukui hiya:ma: miditi ba:be atu komo gala da:kalawemo, Godokono umi ipuwalo na ba: eta kuba komo ebetamo kododima:nemo.”

19 Ba: hibila, Godokono Tutumu Tabo komate na biya:tunamena, na ha:kiya naeno heloamo ebeno ubi komamo papamiwata modoboha:. Ba:bema: na ba:bi Tutumu komoeno helo ipuwane uluhukuti naeno heloamo ododi komoma: ba: dito hoiya:mo, nale ba:ba tetene tupuimiti Godokono heloamo ebe mabuma: kemedenama:. 20 Iyo, ba:moe ba:be gabodo nale Kelisokoba: keha pihigalo ba: dito hoiya:mo, ba:bema: ba:ma tetelo Kelisote na ipuwalo ba emedena na ha:kiya naeno heloamo gala a:kemedenamo. Ba: hibila, Godokono Guduti na malemalelo ba emalagidolonena ebeno ka:ka: na mabuma: gobogobamo dihatiya:, ba:bema: na ba:ma tetelo ebe hibima: midi komodo bemedenamo. 21 A:iye! Lumagiti Tutumu Tabamo papamiwata komodo tuputupudawama: eda: gabote hibilo nitanatale, a biya:tawahana: Kelisokono hoe komo ba: ko komoha:. Huiyatiya numa:la:, Tutumu Tabamo papamiwata komodo gabote kitanaha:, ba:bema: Godote ebeno eta malemale gabo na diya:tunamiya:, nale ba:be hidonomo gabo ubiha:ma: a:keda:namo.