POLOTE LETA
GALESIYA HOPOENO SOSE TAWAKALUBA:TAMO
ODODIYA:
1
Na ba: Polotela, Ya:su Kelisote ebeno sose tupuimima: hiya:hiya: hopamo doelamiya:, ba:bi okopi ipuwalo na ba: etala, iyo, pote ebe hoe ipuwane dadipatiya:, ba:be Nabiwi Godote eba:go na ba:be oko kowatinama: a:ka:namiya:, eta lumagino ubi komodoha:. Na ba:gala nago demedena ba:bi hibima: midipi ekaki, ale la: puya:te Galesiya hopoeno hiya:hiya: sose tawakalubima: deda:hanama, ale ba:moe leta la: hiliyonomatamo poemema:.
Wadiyala aeno Nabiwi Godoko ba:gala Kodawa Ya:su Kelisoko iba:te ibino malemale komo ba:gala hete komo la:tamo nikalama:mena:ta. Ba: hibila, Kelisote aeno Nabiwi Godokono ubi komamo papamiwatalo aeno kuba ododili mabuma: ebeno ka:ka: gobogobamo ihatiya:, ebete a ba:moe hopoeno koko kuboeno helo ipuwane kuluhukua:tema:. Ba:bema: wadiyala Godogodolo awagaha komote emedena emedena tetelo nitanamene. Ba:moe tabo ba: hibinomola, ba:ba:la!
Godokono Hido Tabote Ka:ka: Mula: Gabo Kapiyanomo Behawakalimina
Ba:ma tetelo nale la: mabuma: konomamo na:la:wa:namo, mabu la:le eta ka:ka: mula: gaboeno ha:da amiho tabo dulihuima, ba:bema: la:le Hido Tabone ohobila:hate pote Kelisokono malemale komodo la: da:ka:lami, ba:be Kodawa tiyonomolo miya:pama: ewagelenamata. La: hidamo nulia:la:, eta ka:ka: mula: gabote hibilo kitanaha:! Huiyatiya komopa:te Kelisokono Hido Tabo kubahimima: ba ewagelena, iba:te eta hiya: gaboma: tabo olamagimiti ukui bilibili komo la:tamo ba:bema: ikalamenata. A:iye! Nale dopamo tetelo kebe Hido Tabo la:tamo da:polamagimo, pote ba:be tabo hiya:ma: miditi eta ka:ka: mula: gabo da:hawakalimimini, wadiyala Godote ebe Saitanakono Koe Habamo dito noema:mene! Ba:bene Hunu Haboeno nopopi ipuwalo etate ba:be atu konomo kuba komo dododimini, iyo, na ba: atumu, wadiyala aeno kuba huiyate ba: ba:ba ka:na atamo atumu na:kapa:mene. Ba:bema: ale dopamo la: kebe komo ka:kiyalamiti, nale ba:be atu komo la: gala ba:ma ka:na kakiyalamemata, la:le dopamo kebe Hido Tabo da:lawima, pote ba:be tabo hiya:ma: miditi eta hiya: ka:ka: mula: gabo da:hawakalimimini, wadiyala Godote ebe Saitanakono Koe Habamo dito noema:mene!
10 Numa:la:, ba:moe tabo olamagi ipuwalo nale eta hopo haba lumagi kalakaluimima: kewagelenaha:, ba:gala nale eta lumagigodolo na milinamehone tabo ulima: ubi kihatenaha:. Ao, eba ka:naha:, Godote naeno komoma: da:kalakalana, nale ba:be ubi kapiyamo ihatenamo! Ba: hibila, dopamo nale komo hopo habanapi hiliyonomo kalakaluilamema: ewagelenamimo, huiyatiya ba:ma tetelo na modoboha: ba:ba ka:na ewagelena mabu nale oko Kelisoko kapiyatamo owatinamo, eta lumagitamoha:.
Polote Hiya:hiya: Hopolo Sose Tupuimi Oko Owatima: Godote Ebe Keba Ka:na Ka:ka:miya:
11 Naeno hibima: midipi ekaka:la:, na ubila la: ba:moe eta komo hidamo niya:tawahala:, nale kebe Hido Tabo kolamaginakomo, ba:be Tabote eta hopo lumagino ukui komone kuluhukuya:ha:. 12 Iyo, nale ba:be Tabo hopo habanapi ipuwalo eta iya:tulamedawagodone kalawiya:ha:, huiyatiya hibila, Ya:su Kelisote ha:kiya ba:be Tabo natamo ikanamete ebeno ipuwa ba:bo hawakalimiya:.
13 La: dopamo ba:moe komo ulihuimata, naeno pakala emede ipuwalo nale Godoko adikumima: Yunapino ododili komo hiliyonomo keba ka:na ka:ta:matalenakuimo. Numa:la:, ba:ba tetelo nale komo Yu watowatopa:go Godokono hibi sose tawakalubi kubanomamo kubahilamema: koko temeteme iba:tamo hibinomolo ikalamenakuima:. 14 Ba:gala naeno komo Yunapa:te Godoko adikumima: nale ibino ododili ipuwalo ibi ba iya:tulamena ibi ipuwalo eta kodawama: ba:bo ediya:mo, mabu hibila, a Yunapino iniwala:te atamo kebe hiya:hiya: kukala dikaa:mehuiya:, nale ba:bi hiliyonomo kukalamo papamiwatalo helonomoma: ba eda:na, naeno helo komote naeno apegabo dubu hiliyonomoeno helo dito negogoliya:.
15 Huiyatiya kalakala konomola, nale naeno menokoeno tepone hawakalaheno, dopamo Godote ebeno malemale komodo na ka:namiti ba:bo laweniya:, nale galane tetelo Yunapino ododili komo ipuwane uluhukuti ebeno hibi oko kowatinama:. Ba:gala nale ibino ododili ipuwalo ba emedena, ebete atu ubi komo gala ba:ma ka:na kihatiya:, 16 ebeno Guduino komo natamo hawakalimiti, ba:bene nale tote Yuha:pa:tamo Hido Tabo ba nolamagi iba:te ebeno komo atumu hidamo kiya:tawahama:. Ba:bene ba:be komote natamo duluhukuya:, nale naeno mabulubi ipuwalo eta lumagitamo katuya:ha:, nale keba ka:na da:nododimo ba:be ukui ebegodone konelawema:. 17 Ba:gala Yelusalema ko habalo demedehonama:, nale ba:bi Ya:sukunu komo oelamepino ukui lawema: iba:tamo atumu katuya:ha:. Iyo, na iya:tawuya:mo Ya:suti na ka:namihino ebete ba:bi dubu dopamo a:ka:lamiya:, huiyatiya nale iba:tamo nuluhukuhino Ala:biya dito hopamo tote, na ha:kiya ba:bolo nemeda:tepate ba:bene Dama:sakase ko habamo gala dito kawiluya:mo.
18 Ba:bene netewa-kapiya gogote da:petohuya:, ba:ba tetelo nale Pitakoba: tabo ga:lama: Yelusalemamo tote eba:go netewa wuikilo ba nemeda:tepa, 19 huiyatiya komo oelamepi dubu ipuwalo nale eta kapiyanomo ba:bo numiya:mo, ba:be dubu ba: Kodawa Ya:sukunu ekawi Ya:imesitila. 20 La: nulia:la:, nale ba:moe leta ipuwalo da:hawakalimimo ba:be tabo ba: hibinomola, iyo, Godoko iya:tawala na ha:da amiho tabo kolamagitaha:.
21 Ba:bene nale Yelusalemane tiyolo gala kapete, Siliya hopo ba:gala Silisiya hopamo dito nuluhukuya:mo. 22 Ba:moe ba:be mabuma: kebe sose tawakaluba:te Yudiya hopoeno hiya:hiya: habalo demedehonama:, ba:bi Kelisoko hibima: midipa:te na ibino baida:mo unameheno naeno komo ba:be mabuma: hidamo kiya:tawahuya:ha:. 23 Huiyatiya iba:te komopino tabo ga:la kapiya ba:ma ka:na ulihuya:, “Dopamo kebe dubuti a hibima: midipi kubahia:mema: koko temeteme atamo dikaa:menakui, ebete ba:ma tetelo tabo olamaginako tawakalubi hiliyonomate Ya:suku hibima: komidima:!” 24 Ba: hibila, iba:te ba:be tabo uliti na mabuma: Godoko ba:bo milimihuya:.