2
2:1-13 God Setiri Nunda Asisi Kakara Vovosusira.
Fura eni dadabetiri, Jusi embo da kirumo javo ‘Pentecost’ seraera, ainda sifo ava fira buvurutusira. Buviri, Iesu da dorevare kambo eninda totoruguseri. Totorugedo irise, utuda ghe yaura tomanako da dukago ava javi iri nininguseri. Anumbedo ava niningero, duka teria beká etiri, kambo ainda jokáda anumbusera amo, jo se ningari da kaugo irae usira. Iri, roera eni avaraka bubura da kaugo ava vose fira, kau aviva da kaugo ava isagha edo, sasarige evetu genembo daba daba ainda jiroda, vose jaraghiri gosuseri. Gosero, Asisi Kakara aimi vosetiri dubo kotero, Asisi Kakara sonembetiri aviva jovereghetiri, ne geka dombu eni dombu eni ava siseri.
5-6 Jusi embo mendeni God tumondedo ghusera aimi eredo, nenda reighi dodoyegedo fera Jerusalem aminda buvudo iriari. Evetu genembo natofogo aimi ne duka ava ningido fera totoruguseri. Totorugedo niningero, nenda geka nunda nunda ava, Iesu da dorevare aimi sero ningido, ne dudukughuseri. 7-8 Ningi dudukughuse eminge siseri, “Gegenembo geka resera omo, Galilee embori. Ava ne namondeda geka nange kasama edo reseri? 9-11 Namonde Partia embo, Midia embo, Ilam embo, Mesopotemia embo, Judia embo, Kapadosia embo, Pontus embo, Asia embo, Frijia embo, Pamfilia embo, Krit embo, Arabia embo, a Egypt embori. Namondeda mendeni Libya dodo fuseri. (Libya resera emo, reighi Sairin dengesida irira.) Mendeni mo, Rome ghedo fuseri. Mendeni mo, Jusi embo bekári, a mendeni ne, Jusi embo da gitofuri. (Gitofu resena emo, nenda kiki dodo, Jusi embokena sembudo Jusi embo da ambo jimbi useri.) Avata namonde isambu, nunda oro oro ainda geka ava Galilee emboimi sero niningerera. Emo, God rea etiri mindafugo sirorusira ava, Galilee embo nange kasama edo sero niningereri?” aminge siseri. 12-13 Dudukughe bune jaredo, tofo tofo se nininguseri, “Emo rejori?” mendeni aminge siseri. Avata mendeni ne dere jise siseri, “Iesu da dorevare ne uvu fakara mindido aito sembae fugutuse, beka soesa resera,” aminge siseri.
2:14-42 Peter Vironu Sisira.
14 Se niningero, Peter eredo ambo jimbi 11 ainde dabade isambu 12 ava fefetuseri. Fetedo, Peter nu, evetu genembo totorugusera aikena, beka teriago vironu sisira, “Jerusalem embo a nanda natofo Jusi embo, ne isambu ategi beká ava erena. Nemokena geka evia sari dae erena, ningivu! 15 Nanda geka evia ningi gogoghombevu! Oroko 9 koroko etira. Sifoghae, 9 koroko avavaga mo, jo uvu fakara mindari da sifo iraeri. Ava sedo, namane jo uvu fakara mindido, aito sembae fugaeri. Ne ava jo kotae areva! 16 Ne rea niningereva emo, God da feroveta javo Joel, nu anakora isagha osa sedo gembiri irira. Nu eminge sisira,
17 ‘God eminge resira, namokena,
“Na, nanda Asisi mutono evetu genembo isambukena vose asugarira.
Asugedo irari, na nenda sasingukena nanda geka afigaono, nene isagha sarera.
Nenda vide jamena mo, diti mokoi garera, a nenda embabako mo, aturu arera.
18 Nanda saramana kakato, evevetu a gegenembokena, nanda Asisi mutono vose asugari, nanda geka afigaono, sifo aminda nene isagha sarera.
19 Aminguse, nane aono tano utuda a endada sirorari gido, evetu genembo isambu dudukugharera.
Aono, ororo, avaraka buburaghae, a imbosi gumba teriago siroredo, 20 iji ambarira,
a inua kau ororo da kaugo ava sirorari, ainda amboda, nanda Sifo mindafu usasaghae furarira.
21 Mave sifo aminda, nandae javono gatise kori sarira amo, nu jebuga tambarira,” ’
God aminge setiri Joel gefusira. 22 Ava sedo, nanda geka evia ningivu! God setiri Nasareth embo, mandi javo Iesu, God da saramana ari dae sedo, fira sirorusira. Genembo amo, God sonembeari ari mendeni mendeni eari gido, evetu genembo dudukughedo ghuseri, ‘Eraira emo, God da fakinaimi eraira,’ aminge kotedo ghuseri. Amo, jo reighi eninda siroraeri, nu eminda sirorusira. Ava sedo, ne ava gido kasama aetevu. 23 Avori, God nu Iesu, ambare dae sedo, dirigetiri endada fusira. Ava sedo, ne Iesu ava sandi budo, gegenembo ekoko aikena mutovo arafa daoro ambarira amo, God nu anakora kasama edo, ‘Avori,’ sisira. 24 ‘Avori,’ sise, nu setiri ne amingusevu. Avata ainda amboda, God nune setiri Iesu ambarida ghe jebugedo erorusira. God setiri ambari da mema dadabusira. Iesu nu fakina kato ava sedo, ambari da fakina aimi nu jo buregae usira, nu jebugedo erorusira. 25 David barago Iesu dae sedo, eminge gefusira:
‘Na Bajari sifo ghousa giraena. Nu, namo sonembari dae sedo, nanda ungo gimandukena, fetirá gheraira.
26 Ava sedo, na ivuga beká ava erena. Nanda bekaimi nundae sakai seraena.
Na genembo ava sedo, na ambarena. Avata Bajari tumonduse, ambari dae oju jo ae eraena.
27 Ainda susu mo: Bajari, ni nanda asisi kotise, na ambari da vasa aminda jo doyae aresa.
Erama nanda tamo beteure dae sedo, ni saso na jebugarena. Na nimoá kakara eraena aindae sedo, ni amingaresa.
28 Na nange nangedo jebugarena ava, ijugeteso geni. A na ninda dombuda evovodae ivuga use irarena,’
ava David Iesu dae sisira.
29 “Avori, nanda nano namendi, ningivu! Namondeda abua David da kiki isagha sarena. Nu ambiri bu furugetero, nunda ofofo eminda irira. 30 Avata nu jo ambae iriri, God ira numokena beka gagojuse sisira, ‘Ninda imemesiri da mandi eni saono, kotofuko nimongo ava arira,’ aminge sisira. 31 David nu God da feroveta eniri. Ava sedo, God rejo sisira amo, tumondusira. God rea amboda arira ava kasama usira. Ágido God nange nange sari, Keriso ambarida ghe jebuge erarira, aindae geka evia sisira:
‘God nunda asisi jo ambari vasa aminda doyari irae arira. Nunda tamo jo betae arira,’
aminge sisira. 32 Geka emo Iesu dae sisira. Amo, God nune setiri, Iesu ambarida ghe jebuge eretiri, namane gosuseri. 33 Gero ainda amboda, Numamo God numoá budo, nunda ungo gimandukena fitido, Asisi Kakara anakora mutari sisira ava sedo, numokena futusira. Mutiri, Iesu nu Asisi Kakara ava budo, namanekena mutiri oroko eminda vosedo irira. Ne nunda fakina ava gido a ningido dudukughetevu.
34-35 Geka eni mo: ne kasama ereva, David nu jo utuda viti yaeri. Ava sedo, nu mavedae geka emo sisi?
‘Bajari God nanda Bajarikena sisira,
“Fu, eminda! Nanda ungo gimandukena anumbiraso, ninda fakina gaoro dae sedo,
ninda gitofu de bundedo budo foama, ninda ata duruda fitono fafasaore!” ’
Geka amo, David nu Iesu dae sisira. 36 Ava sedo, ningi gogoghombevu! Ne Israel embo ava sedo, kasama aovo dae resena. Iesu setena emo, nene budo arafa dorusevu. Genembo daba ava, God setiri nu kotofuko edo, namondeda sonembadae sedo irira. Numo Keriso ri!” 37 Peter aminge setiri, evetu genembo ningido, oju e bune jaredo, ne Peter kotugo Iesu da ambo jimbi mendeni aikena ategi useri, “Namanenda nano namendi, ne erekoteva, namane nange aeteri?” 38-39 Aminge setero Peter sisira, “God nemo sonembari dae sedo, beka gagojusira. Avata jo nesuka nemova nembo sonembae arira. Nenda imemesiri a oro mendeni mendeni ava, God aghi edo sonembarira. Ava sedo, ne isasambu nenda ari ekoko dodo, furovo namane ne Iesu da javoda bafataito arera. Amingareva amo, God nenda ari ekoko kote dodo, Asisi Kakara mutari vose nemokena asugarira” 40 Aminge setiri dadabetiri, geka mendeni mendeni sise, eminge sisira, “God ari ekoko embo amo dari ambarera. Ava sedo, ari ekoko dodo fuvu!”
41 Aminge setiri, evetu genembo mendeni mendeni ivugaghae ningido, fera buvero bafataito etero, ne Iesu da natofo useri. Amo, evetu genembo 3,000 ava useri. 42 Edo, ne Iesu da ambo jimbi rea ijugusera ava ningido, nunda ambo jimbide dabade dombu dabako use, dabade bayau rise,42Namonde erekotera, Iesu da dorevare ne bayau mindido ghusera ainda amboda, Iesu da ambari kotise, tamo a ororo kakara ava budo ghuseri tano. banungedo ghuseri.
2:43-47 Iesu Da Dorevare, Nenda Irari Kau Eminguse Irá Ghedo Ghuseri.
43 Aminguse, Iesu da ambo jimbi seoro, kae evetu genembo jejebugedo ghuseri, sukaru evetu genembo da jokáda ghe foa buvudo ghuseri, a ari mendeni mendeni edo ghuseri. Urureoro, evetu genembo gido beka dadabeari oju ghamo edo ghuseri. 44 Aminguse, Iesu da natofo dombu dabako use, nenda roera nano namendikena soro edo ghuseri. 45 Amo, nenda enda a nenda gugua budo oriro edo ainda moniá budo, nenda mendeni da irari a nenda mema ava gosuse, aminda soro edo ghuseri. 46 Ne sifo ava inono God da Kambo+ aminda dombu dabako edo banungeoro dadabeari, taraghe kamboda yama, dabade anumbedo bayau mindido ghuseri. Dabade anumbirise, ivugaghae nenda bayau soro vesa edo ghuseri. 47 Aminguse, ne God dae sakai seoro, evetu genembo isambu, Iesu da natofo dubo budo ghuseri. Amingurureoro, Bajari seari evetu genembo mendeni foama, Iesu tumonduse nunda natofo edo ghuseri.

422:42: Namonde erekotera, Iesu da dorevare ne bayau mindido ghusera ainda amboda, Iesu da ambari kotise, tamo a ororo kakara ava budo ghuseri tano.