39
Namonde Endada Jo Ghousa Irae Arera!
1 Na siseni, “Na rea arena, kaifa e gogoghombuse arena.
Kotugo nanda beka kaifa use, geka eko eni jo saono buvae arira.
Ava sedo, na evetu genembo ekoko da dombuda irise, geka itako eni jo sae arena.”
2 Na beka gotedo, geka eni itako jo saeri.
Eveva geka barago jo saeri.
Avata, nanda mema ava baji tomanako usira.
3 Amo nanda mema aindae oju useni.
Na kotari futo usena, avata eko beká useni.
Na ghousa mavega irari bunise ategi useni:
4 “Bajari, na ghousa mavega ava irareni? Na nanjigo ambareni?
Nanda ambari da sifo saso ningaeteni.
5 Nange eteso, na jo ghousa irae areni?
Na ninda dombuda jo ghousa irae arena.
Geka bekári, namane evetu genembo jebuga irá gheraera amo, inono ghamo asegeraera amingori.
6 Namanenda irari mo, dangio da kaugori, beká tefori.
Namane tefo janjagu eraera.
Namane gugua bambu dabade eraera, avata mave rete bambarira amo, namane berefori.
7 Bajari, nanda gigita ari mo, jo soesa ae eraena.
Nanda kaifa gigita ari mo, nimokenari.
8 Nanda ari ekoko bu fugaso, jebugaone!
Kotugo erá eoso, evetu genembo gogovara use God imboe eraera aimi, na dere jiriore!
9 Na beka gotedo, geka eni itako jo sae arena. Ainda susu mo, nine eteso na mema tafuse irena.
10 Erá, nanda ari ekoko da mino futuse, na sekago deose! Na deteso ambari dae itako erena.
11 Ni evetu genembo da ari ekoko ainda mino futuse, ghoghora sise dombuda seraesa.
Aminguse, ne rea dubo buraera ava, kau jiriko aimi mindeari bakomba eraira, aminga ava sosighi eraesa.
Geka bekári, namane evetu genembo jebuga irá gheraera amo, inono ghamo asegeraera amingori.
12 Arie, Bajari, nanda banungari ningi! Namo sonembaso dae sorara erena, ningi!
Na sorara ururono ningaresa, fu, na sonembase!
Ai resira amo, nanda afamane abuamane usera avavaga,
namo ninda esa embori, sifo tufako ava nembo irarena.
13 Ninda ungu sokinembaso dae resena. Doyaso, na jo ambae irise, ivuga itako edo, na ambono dadabare!”