40
Sakai Sari Da Yaruri.
1 Na durumugedo, Bajari da sonemba dae kaifa use ireno, nu nanda sorara jave ninigusira.
2 Na bako eko beká tauya aminda ghe jumbiri vivituseni. Eteno, na budo enda fakarada fitiri fetedo jebuguseni.
3 God dae sakai sari da yaru seka eni ava divono dae sedo, namokena ijugusira.
Natofo digari evia gosuse, ne dudukughedo, nenda tumondari Bajari kena fitarera.
4 Mave, natofo ove keveraera, a god gungubo tumonde bainghari kakatode dabade jo tatae irise,
God beká ava tumonduse irarera amo, ne ivuga ghae irarera.
5 Arie Bajari, namaneda God, ni namanendae roera digari ambari usesi.
Mave eni jo ninda tega iraeri. Namane ninda eveva ava tamboro dae sise, manaka gayeraesa.
Ni rea eraesa da digari ava, jo nane tege sari da kaugo iraeri.
6 Ni fuyo a joba mutari ava jo uju ae eraesa. Sino fuka olta (altar) da dungoro dae ni jo uju ae,
a ari ekoko kote doyaso dae sedo, sino fuka dungoro dae barago, ni jo uju aeri.
Ninda uju mo, na ninda geka ningaeteni. Ava sedo, ninda geka ningono dae sise, namokena dengoro futusesi.
7 Eteso, “Na evirere,” siseni. “Ninda Agho Dari jokáda, rea aono dae sisesa, ava irira.”
8 Ava ari dae sedo refena. Ninda uju ava ivugaghae arena. Nanda God, ninda ijuga nanda janje jokáda fiteno irira.
9 Arie Bajari, namane sonemberaesa ainda
bino eveva ava, ninda natofo isambu totorugusera da dombuda osa siseni,
kotugo sise irarena. Jo itako doyae, sise irarena, ava ni kasama eresa.
10 Na jebuga da bino ava jo kivo edo, nasuka bu jighiraeri. Na sifo ghousa ninda sonemba aindae sise, irá gheraena.
Ni rea ari sisesa, ava eraesa aindae barago, osa sise irá gheraena.
Ninda natofo totorugeraera ainda jokáda na eredo ninda sari nange eraesa ava, a evovodae namane dubo buraesa,
ava osa sise, itako jo beka gotae eraena.
11 Arie Bajari, na kasama erena, ni nandae joka eraesa.
Ni rea ari sisesa ava use, na dubo buraesa aimi, na gagara ururaso irarena.
Sonemba Da Benunuri.
12 Na dara digari futo, jo tegari da kaugo irae aimi jimbe birurughetira.
Nanda ari ekoko jo daba etoto irae aimi nanda irari kosasaghetiri, na emboro erebunena.
Nanda kosasa da digari nanda beo amingori. Aimi etiri, nanda fakina dadabetiri, dubo bunise irena.
13 Arie Bajari, oroko nembo tavaraghe fu, na sonembase jebugaone!
14 Mave na daoro ambono dae eraera ovia, sosighi urururaso dubo bunore!
Mave nanda dara aindae ivuga eraera amo, buregaso ne meka gosuse jovereghe darigaore!
15 Mave namoa dere jiraera amo, aso oju edo ungu ata dadadaghururari, meka garera.
16 Nimokena mave furarera isambu, ivuga use riria aore!
Mave ninda sonembadae ivuga eraera, ne aiyakoe sise eminge sise irarera, “Bajari teriago beká nimori!”
17 Na makasi edo jarutuse irena, avata Bajari, ni na kotise irá gheraesa.
Arie nanda God, nanda sonemba kato nimori, tavaraghe fu, na sonembase jebugaone!