49
Tumondari Ati Ghayafa Kena Fitarera, Jebuga Kosasagharera.
1-2 Gekaé ninguvu! Sabua kotofu, makasi embo, evetu genembo iti fafode isambu, nemokena resena,
dengoro jave ningivu!
3 Ghuna basetiri, na oroko geka isagha sari dae erena, ningivu!
4 Na gita*Afige, geka eni gita o uka dae gefusera, tuturo 33:2 duruda tege, garesa! doruse geka jungarida ava saono vosarira.
Amingedo, geka da tuka se disugaono ningareva.
5-6 Evetu genembo ekoko, nenda gugua ghayafadae sakai sise,
sonemba aminda tambari dae kotise irera aimi, nanda gitofu edo irera.
Gitofu resena, aimi na jimbe birurugharera, o mema dombu eni dombu eni nanjigo sirorarira amo,
na jo oju ae eraena.
7 Genembo eni jebuga irari dae sise, God kena ghamanai ombu bari da kaugo iraeri.
Jebuga irari da mino tambudo, God kena mutari jo genembo eni ae arira.
8 Ainda tuka mo, evetu genembo da jebuga ainda mino mo, teria bekári.
Jo itako tambudo, mutari da kaugo iraeri.
9 Mino rea mutaetira, aimi jo itako sonembari, nu ofofo darige jebuga evovodae irari tambae arira.
10 Namonde isambu kasama erera,
genembo eni jo ambudo nunda gugua bu yae arira.
Evetu genembo isasambu, eveva a ekoko, dubo kotari kakato a jiro fafakara embo isambu ambudo,
nenda gugua gayafa nenda imemesiridae do darigeraera.
11 Ne jebuga iriara da sifo aminda mo, ne enda nenda tofodae bu jighiriari.
Avata oroko mo, ofofo nemo evovodae irari da vasari. Aminda evovodae irarera.
12 Genembo binóde aikena kau daba avori. Nu binonde irira aimi jo sonembari jebugae arira. Nu sino fukai ambarigo arira.
13 Evetu genembo mave totofo nemoa tumonderaera ava kote givu.
Mave nesuka nenda gugua tumonderaera, aikena eminge sirorarira.
14 Ambari mo, evetu genembo setena, ainda giti jighari use, nune unumbe bu ya dari, sifi ambari garera.
Evetu genembo kosasa tefo aimi ne de atai fatoro, ambudo totoi masa arera.
Nenda reighi dodo ofofo vasada irarera.
15 Avata, God namoa nune ambari da fakina aminda ava saghimbe bari jebugarena.
16 Erá, genembo eni guguade arira aindae, dubo mema eove!
Komana ati ghayafade ururarira ainda sifoda, erá mema eove!
17 Ai resira amo, nu ambarira, nunda gugua jo bu yae arira. Jo nunda gugua dabade ya ofofoda vosae arira.
18 Genembo mave endada irise, nunda irari aindae ivuga ururari natofo nundae sakai sarera,
19 numoa barago nombua mane ambudo, ningaminda isera, daba aminda vosarira.
Vosedo, usasa jo gae irise, evovodae tumbada irarira.
20 Genembo binode aikena kau daba avori. Nu binonde irira aimi jo sonembari jebugae arira.
Nu sino fukai ambarigo arira.