74
God Nunda Natofo Darakena Saghimbe Bu Darigari Da Banungariri!
1 Arie God, namane mo, ninda natofo bekári. Susu redae namane doyari beká usesi?
Namanekena redae evovodae janje ekoko eraesi?
2 Ninda natofo anakora gategusesa ava sekago kotaso dae resena.
Namane sabua use irero, ninda natofo beká aoro dae sedo, namane nange saghimbe bu darigusesa,
a kotugo ututu Saion*Afige, geka eni Saion dae gefusera, tuturo 2:6 duruda tege, garesa! irá ghedo ghusesa, aindae barago sekago kotedo, joka aso dae resena.
3 Reighié sosighi e de bebejegusera, ainda jokáda deinghuse fuge garesa, titigho beká useri.
Gitofuimi ninda tafaroro kambo jokáda roera isambu titigho beká useri.
4 Gitofu ninda tafaroro kambo sosighi use javono gatise, koko fumbu aruguseri.
A kotugo ninda vasa sosighi e rurusera aindae, nenda sobeya dadarigetero fefetuseri.
5 Ne kau faragho sarari embo karivako aimi ika mane je dive gafeoro vose fafaseraira.
Aminguse roera reju irei ava, dive gafetero vovosusira.
6 A kotugo nenda karivako nengae koroba (crowbar) ghae aimi ika faiyaghae botou dae tendi birurughusera,
ava isasambu de bunununguseri.
7 Ne ninda tafaroro kambo jighi bununghetero vosetiri, avarakaimi dungutuseri.
Ne vasa nimo tumonde baingheraera ava bebeta etero, ninda bino sembae usira.
8 Nenda uju mo, namane ava fati bebetegaeteri.
Enda eminda God da Tafaroro vasa isasambu nene dungetero aviseri.
9 Ninda fakinaimi tano eni aso gaetera ava gigitusera. Avata tefori. Feroveta eni jo fetaeri.
A kotugo, ari amo sifo nanjigo tano arira ava, mave eni jo kasama aeri.
10 Arie God, namanenda gitofuimi nimoa ghousa mavega dere jirareri?
Ne sifo ghousa nindae jijivu sise irá gheraera.
11 Susu redae namane sonembari imboe eraesi? Ni redae tumbe taunghe irá gheraesi?
Ne daso sirivo aoro dae uju eraera!
12 Arie God, bebede beká ni namanenda kini (king) edo, umbu nanjogo namane sonembudo fusesi.
13 Ninda fakina tomanakogo aimi nine eva jighi sarigusesi.
A kotugo, evada gambauva mane irera, ainda jiro fati mumunjegusesi.
14 Nine eva gambauva da giti jighari ainda gifua fati mumunjegedo,
reighi evetu genembo a uvu irae vasada nunda tamo soro vesa eteso, sino fuka aimi riseri.
15 Uvu veveyako karevada a kotugo ghamana tokáda kirikara gheraera ava nine eteso siroredo sumburaira.
Kotugo nine eteso uvu babai amo gasumbedo irira.
16 Nine seteso, sifo nengae tumbaghae siroruseri.
Nine seteso, iji nengae tambunoghae nenda vasada fefeteguseri.
17 Enda da tano nine fifitigusesi. Baimara sifo nengae ghaeko sifo ghae nine usesi.
18 Avata, Bajari, ninda gitofu nindae gegha jiraera, a kotugo gogovara embo nimoa ighagha urureoro ninda javo eko eraira, ava kotaso dae resena.
19 Arie Bajari erá, ninda natofo da asisi ribogo rojari beká ava, gitofu ekoko eikena fuge doyeose!
Ninda natofo nindae sedo mema eretafera ava, erá kotae eose!
20 Beka gajari nine namanekena usesa ava kotedo ghe!
Enda eminda vasa tumba aminda isambu titigho ari vanembori.
21 Arie Bajari, evetu genembo mendeni gitofuimi kateyavara ero, mema tafuse irera ava, erá doyeoso,
meka geore! Sonembururaso, bate foivo nindae sakai sise, ninda javo jighoro erarira.
22 Arie God, javi e fu, ninda gitofu ava koto use ijujase!
Evetu genembo ni ighagha baghagha use, sifo ghousa gegha jiraera ava, kotaso dae resena.
23 Ninda gitofu janje ekoghae fumbu aruguse irera ava, erá kotae eose!
Ninda gitofu gogore use, koko se doyae tambuno erera ava, erá kotae eose!