75
Ijujari Kato Beká, God Numori.
1 Arie God, namane nimokena aiyakoe—aiyakoe beká resera.
Namane ninda binó teria aindae osa resera. Nine tano nanjogo urureoso gi dudukugheraera,
aindae vironu seraera.
2 God resira, “Na evetu genembo ijujari da sifo seteno fetirira,
a kotugo na evetu genembo nenda ari rea eraera aminda bekáda bekáda ategi arena.
3 Endada evetu genembo a roera nanjogo jebuga iritirera, ojuimi ungo ata dadadaghururoro,
enda barago dara dara gharira, avata nunda susu nane anakora fiteno fefetusira ava,
aono gambu kinghari beká edo irarira.
4 Ari ekoko ari kakato, erá gogore eoro dae sise, irá gheraena!
5 Totofo sakai sise, nenda binodae bengoso futo eraera, doyoro dae sise irá gheraena.”
6 Evetu genembo ijujari da fakina mo, jo iji vitarikena o iji vosarikena, jo ningaminda tambari da kaugo iraeri.
7 Tefo, God nusukako ijujari inonori. Evetu genembo mendeni seari darige buvuraera,
a mendeni nune seari, vose mema itatama eraera.
8 Ai resira amo, Bajari nunda ungoda agha eni bu jighirira.
Agha amo nunda janje ekoko da vaini (wine) fakinaghae aimi bedo edo irira.
Nune averegeari vovosurureari ari ekoko embo ai rise, ghaghonoko ainghae mindi tefo eraera.
9 O namo, God Jacob tumonde bainghedo ghusira, ainda bino ava evovodae osa sise nundae sakai sido yarena.
10 Ari ekoko embo da fakina ava nune dari bejarira, o ari eveva gaveva embo da fakina ava,
nune ambisegari baji tomanako arira.