106
Bajari Nunda Natofoda Veka Eveva Eraera Aindae, Sakai Saore!
1 Bajari da javo jighoro erare! Erorurari, nunda dubo bari gombu tefo,
nu eveva vanembo eraira aindae numokena aiyakoe sevu!
2 Mave eni jo Bajari roera babaigo eraira isasambu tege tefo use, osa sari da kaugo iraeri.
Mave nundae sakai sari saetira amo, jo nunda ari eveva eraira, ainghae inono ae aetira.
3 Evetu genembo mave nunda uju ava use, evovodae ari eveva gaveva use irá gheraera amo, ivugaghae irarera.
4 Arie Bajari, ni sifo reda ninda natofo sonembaresa amo, nábarago kotaetesi!
Sifo reda sonembururaso jebuga tambarera, nábarago kotaso dae resena!
5 Ninda natofo gategusesa ava, nanjigo saso ati ghayafade arera amo, saso, ne redae ivuga arera, na ainda jokáda irarena.
Aminguse, ninda natofode dabade tatedo, nindae sakai sise irarera.
6 Afa, abua mane ari ekoko usera aminga ava, namane barago kotari ekoko kotise, ari ekoko edo ghuseri.
7 Namanenda avia abua Egypt aminda ninda tano gi dudukugharigo ututusesa ava, ne jo kote simbugae useri.
Umbu nanjogo nemokena kavevera edo ghusesa, ava ne kotae edo ghuseri.
Arie God, Fakina Tofo, ne amingedo, eva kokoigo aminda osogo nimokena bu fuseri.
8 Avata, nunda fakina tomanakogo ava ijugari gaoro dae sise,
nu rea ari dae sedo, beka gagojusira ava use setiri, ne jejebuguseri.
9 Nune dombuda sise setiri, Eva Kokoigo saghedo kainghusira.
Etiri, nunda natofo unumbedo bu enda kaingharida sefuseri.
10 Nune, evetu genembo ne gari imboe edo ghusera aikena sonembetiri, ne jebuguseri.
Nenda gitofukena ne sainghimbe bu darigusira.
11 O nenda gitofu mo, uvuimi fatiri mindi sirivuseri, eniko jo fetaeri.
12 Amingetiri, nunda beka gajari isambu ava nunda natofo tumonduseri. Edo, yaru didivuse, nundae sakai siseri.
13 Avata, nu nendae sedo rea usira ava ne totoi nembo kotae useri.
Amingedo nenda uju use, God da kotari ningari dae sedo jo kaifa aeri.
14 Reighi uvu a evetu genembo irae da vasa aminda ne masaru useri. Aminguse, ne God ava bu derarikena fifituseri.
15 Amingusera aindae, ne rejodae uju usera ava nune futusira.
Avata, ainghae dabade tauno eko ava setiri nenda jokáda itatama useri.
16 Aminda evetu genembo uvu bayau irae vasada ne Moses dae mendó mendó useri,
kotugo genembo God gategusira, Aaron dae barago, mendó mendó useri.
17 Amingero, enda beka fangedo, osogo ari kakato da giti jighari, Dathan dukughedo,
a kotugo, nenda giti jighari eni, javo Abiram, nunda ambo jimbide dabade dukughusira.*Ni Dathan Abiram ghae da kiki bunaresa, Afige Numbers 16:1-35 aminda yasi, gase!
18 Amingiri, avarakai vosefira, evetu genembo mendeni nengae da geka ningido ari ekoá usera ainda etoda,
vose dungetiri aviseri.
19 Nene doriri Sainai aminda goldi (gold) budo, ove kevuse, borumakava mandi da kaugo ava edo,
tumonde bainghedo ghuseri.
20 Ne God duro usasaghae ava ighagha use, borumakava kikisa mindiraira ainda dangio ava budo
tumonde bainghedo ghuseri.
21-22 Aminguse, God Noah da mandi Ham da imemesiri jokáda Egypt aminda,
nunda tano fakinagoimi sonembetiri jejebugusera ava, ne kotae useri.
Amo roera gi dudukugharigo Egypt aminda a kotugo eva kokoigo aminda usira, aindae resena.
23 God ava gido, janje eko edo nunda natofo sosighi ari dae sisira amo, beká siroraetira.
Avata God nunda saramana kato, javo Moses, gategusira aimi eredo, erá natofo ambeure dae sise,
nu God buregusira.
24 Ainda amboda, ne reighi uvu bayau da vasa nemokena mutaetira ava, imboe useri.
Ainda susu mo, ne God da beka gajari ava jo tumondaeri.
25 Aminguse, nenda dobo jokáda iritirise, Bajari dae isi basi sise, ningi ningaego useri.
26 Aindae sedo, nu koveonoghae eminge sisira, “Ne na uvu a evetu genembo irae vasa eminda saono,
sirivu ututareva.
27 Nenda imendi gamendi barago, na nenda gitofu, na jo tumonde bainghae eraera,
ainda jokáda goroghaono ya, oro mendenida reighi aminda sirivu ututarera.”
28 Amboda, reighi Peor aminda God nunda natofo Israel embo god eni Baal seraera,
ainda tumodari embode tatedo, Baal tumonde bainghuse, ove kevari jebuga tefo,
ainda dombuda bayau joba dungutusera, ava bu riseri.†Ove kevari Baal da tafaroro jokáda aito fugari etoto naká God imboe beká usira amo eviri: eni mo tafaroro jokáda ne komana da evetu o genembo sandi yagera edo ghuseri. O eni mo, nenda sasingu vide seka sirorari ava jebuga iroro muteoro Baal da fristimane dungioro avido ghuseri.
29 Amingetero, Bajari da janje ekoko ava nenda aito fugutusera aimi etiri,
tauno eko beká nenda jokáda bejetiri sirivo useri.
30 Avata, Aaron da mandi Phinehas ere fetedo, ari eko gagara mandighae amo gaetiri ambududurusera aindae, tauno eko amo tukughusira.
31 Avori, nune amingetiri gido, God nundae “ni eveva” sisira. Aminge sisira ainda binó ava, ai tano ghedo refira, kotugo evovodae ivigedo yarira.
32 Uvu ghoghoro Meriba aminda evetu genembo isi basi setero Bajari janje ekoko usira aindae, Moses barago dara tafusira.
33 Ne rea usera aindae, Moses janje eko beká etiri, ghoghora sisira amo, jo itako durumugedo kotise saeri.
34 Ainda amboda, Bajari oro mendeni daoro amboro dae sisira, ava ne jo ae irise,
35 oro resena ainde dabade minode minode fifituse teana embo da tumondari eko, kotugo kiki eko
ainda amboda amboda edo ghuseri.
36 Aminguse, God da natofo ove kevari dombu eni dombu eni ava tumonde bainghedo ghusera aindae,
ne God da bouvu ava itatama e sirivo useri.
37 Ne totofo nenda sasingu veveyako ade vide ava jebuga irioro,
Keinani embo da ove kevari da dombuda joba dungoro dae mutudo ghuseri.
38 Nenda sasingu dara iritiraede ava Keinani da ove kevusera aindae joba futuseri.
Amingero, enda bebeta usira.‡Yasi gase! Sasingu dungari avari da geka tuturo 38 da duruda itako se disugedo irira.
39 Ne aminguse totofo bebeta useri. Ne aminguse God nusuka numoa tumonde bainghoro dae sisira ava,
gukai futuseri.
40 Amingetero, Bajari nunda natofo Israel embokena janje ekoko use, nemoa gari beghagha beká usira.
41 Nu do darigetiri, oro mendeni ove kevari dombu eini dombu eni tumonde bainghedo ghusera,
aimi sero nenda sari ningari use iritiriari a kotugo, nenda gitofu mendeniimi ne katiyavara use kaifa edo ghuseri.
42 Gitofuimi nemoa kateyavara urureoro, nendae bouvu mema tambudo ghuseri.
Gitofuda sarida nembo iritirise, nenda sari ava use iriá ghuseri.
43 Sifo nanjogo Bajari nune sonembeari, dara darigedo ghuseri.
Avata nene geredo osogo numokena bu fuse ari ekoda tofo edo iriari.
44 Avata sifo reda numokena koko fuge sorara usera amo, Bajari niningusira.
A kotugo, ne nanjigo mema bouvu fufuse, kori sisera, nu kasama usira.
45 Nemoa kotise nu beka gagojuse rea ari sisira ava kotisira.
Ne dubo bu gogoghomberaira aindae, nu joka usira.
46 Nune setiri, teana embo nunda natofo Israel embo sandido katiyavara edo ghusera,
aimi tuturo edo nendae joka useri.
47 Arie Bajari God, namane sonembe jebugaore!
Ninda javo kakara jighoro erare dae sise, namane ningiaminda gorogheteso oro mendenida jokáda irera,
amindaghe namane ava bu jovereghe fu!
48 Namonde Israel embo da Bajari God dae sakai saore!
Sakai saore nundae oroko a kotugo evovodae. Evetu genembo isambu sevu,
“Ai bekári”. Sakai saore, Bajari dae!
*106:17: Ni Dathan Abiram ghae da kiki bunaresa, Afige Numbers 16:1-35 aminda yasi, gase!
†106:28: Ove kevari Baal da tafaroro jokáda aito fugari etoto naká God imboe beká usira amo eviri: eni mo tafaroro jokáda ne komana da evetu o genembo sandi yagera edo ghuseri. O eni mo, nenda sasingu vide seka sirorari ava jebuga iroro muteoro Baal da fristimane dungioro avido ghuseri.
‡106:38: Yasi gase! Sasingu dungari avari da geka tuturo 38 da duruda itako se disugedo irira.