107
God Evevagori, Aindae Sakai Saore!
1 Bajari da dubo bari gombu tefo, nu eveva vanembo eraira aindae, numokena aiyakoe sevu!
2-3 Mave Bajari sonembetiri jebuguseva, ne isambu geka setena ava sise, nundae sakai sevu!
Ne teana embo da reighida irevo, ne nune gitofu kena saghimbe budo,
utu gambari, utu gambaridaghe jovereghe fusira.
4 Mendeni reighi uvu a evetu genembo irae vasada baghimbedo yabayaba ghuse,
reighi bogu begaya aminda ya anumbari emboro bunedo iritiriari.
5 Ne uvu bayaudae baimarai sirivo use, ambari dae ghosuguseri.
6 Aminguse, ne dara jokáda irise, Bajari nemo sonembare dae sorara etero, nenda bouvu nune itimbetiri jebuguseri.
7 Nune giti biri, reighi bogu begayada ningia aminda dighi anumbaetera, ava kasama edo,
emboro dambu aminda iseri.
8 Arie, ne nunda dubo bari a kavevera teriago a tano gi dudukugharigo nendae ututusira aindae,
aiyakoe saovo dae resena!
9 Ai resira amo, mave uvu bayaudae baimara itatameraera aikena, uvu bayau nune muturaira.
10 Mendeni seni (chains) auri arimi bundetero dibura use vasa tumba jinjanghari beká aminda iritiriari.
11 Ainda susu mo, ne God Iká bekáda irira, ainda Agho Dari ava ighagha use,
nu rea aoro dae sisira ava, gungubo sariá sise, jo ae edo ghuseri.
12 Susu aindae, nemokena saramana teria futo futiri, janjagu use janje gajedo ghusira.
Ne du fafasedo ghusera, mave jo sonembae edo ghuseri.
13 Sifo aminda, ne dara jokáda irise, Bajari nemo sonembare dae sorara etero,
nenda bouvu nune itimbetiri jebuguseri.
14 Ne vasa tumba jinjanghari jokáda irero, ne nune unumbe bu buvudo,
seni auri aimi bundisera ava, nune detiri bunununghe vovosusira.
15 Arie ne, Bajari da dubo bari a kavevera teriago a tano gi dudukugharigo nendae ututusira,
aindae aiyakoe saoro dae resena!
16 Ainda susu mo, gitofoda furu da guro babai auri bronsi (bronze) ari ava nune de bununugheari voseraira.
A kotugo, kamboda boraga auri ari barago, nune dive gafeari voseraira.
17 Evetu genembo mendeni geka ningi ningaego use ari ekoko edo ghusera aimi daghari gogovara edo,
ne rea edo ghusera aindae, mema bouvu itatama use iria ghuseri.
18 Ne oka, uvu bayau gari beghagha use, ambari dae ghosuguseri.
19 Aminguse, ne dara jokáda irise, Bajari nemo sonembare dae sorara etero, nenda bouvu nune itimbetiri jebuguseri.
20 Ne ambaetera, avata geka nune sisira aimi sonembetiri jo ambae useri.
21 Arie ne, nunda dubo bari a kavevera teriago a tano gi dudukugharigo nendae ututusira,
aindae aiyakoe saoro dae resena!
22 Ne nundae aiyakoe sise, joba futuse, yaru sise, nu rea usira aindae, divu fusedo ghaovo dae resena.
23 Mendeni ghasemoda vovosegedo evada, ghamana bari dae use,
ya foa ghuse gugua oriro use eva teriada deinghedo ghuseri.
24 Ne Bajari evada rea edo ghusira, a nunda tano gi dudukugharigo edo ghusira, isambu gi tefo useri.
25 Nune seari yaura vovoga fakinago usumbeari, karaje dereari eva babai eredo ghusira.
26 Ghasemo babai bu fugeari ikáda viti ya, evada tifughe vosedo, viti foa kounghedo ghusira.
Amingiri, bouti da saramana kakato oju use beka dadabuseri.
27 Ne uvu sembae mindi jiro birurughari kavakava ariguse teteteghe ya foa ghuseri.
Nenda kasama kau mavega isambu beká irae usira.
28 Aminguse, ne dara jokáda irise, Bajari nemo sonembare dae sorara etero, nenda bouvu nune itimbetiri jebuguseri.
29 Eva yaura vovoga nune setiri, songhedo binono gafugusira.
30 Binono etiri, ne dubo jama ero, fafo reda ya terari dae uju usera aminda, ne nune unumbetiri jebuga era,
aminda tere dadoruseri.
31 Arie ne, nunda dubo bari a kavevera teriago a tano gi dudukugharigo nendae ututusira,
aindae aiyakoe saoro dae resena!
32 Natofo tafaroro ari totorugarera ainda jokáda fetedo, nunda javo jighoro eredo ghaetira.
Kotugo babojegari totorugarera ainda jokáda barago, nundae sakai saoro dae resena.
33 Bajari etiri, uvu mane gasumbedo, kareva da uvu kainghedo, kainghari beká usira.
34 Evetu genembo aminda iritirise, ari ekoko edo ghusera aindae, nune etiri,
enda karevaghae ava jovereghe enda karajemi bebeta usira avaga edo irei.
35 Nune etiri, reighi uvu a evetu genembo irae vasada uvu gaunghuse,
enda kainghari aminda uvu kirikara ghuse tuturo edo sufusira.
36 Nune evetu genembo baimarai sirivo ari dae usera ava, bu vasa aminda dighi anumbaoro dae sedo, bu fitiri, nene bogu begaya dighido anumbuseri.
37 Nene je govedo ghuse, bayau goveoro beká digarigo jigheari bu mindido ghuseri.
Nene enda je govedo vaini (wine) da asi govetero vuji digarigo jighi vosetiri bariseri.
38 Nunda natofo nune esimbugetiri, ne ghagurugo sirorero, nune setiri, fuka borumakava mane digituseri.
39 God da natofo nenda gitofuimi fera ne de atai fati fefetuse, sino fuka dae ari guse katiyavara ero,
mema tambudo jarutusera da sifoda,
40 God katiyavara ari kakato yarata aikena nunda janje ekoko ava averegetiri,
savavara uvu bayau irae vasada yabayaba ghuseri.
41 O makasi embo dae kavenu sise, nenda bouvu nune itimbetiri jebuguseri.
Ainghae dabade, nune setiri nenda mandi sasingu digarigo siroruseri.
42 Avavaga sirorusira amo, evetu genembo eveva irá gheraera ava gosuse ivuga useri,
o ari ekoko embo ava gido ne beka dadabuseri.
43 Mave dubo kotaride irá gheraera amo, na geka setena emo kotise irarera.
Bajari da dubo bari a kavevera teriago ava kotise iroro dae resena.