145
Sakai Sari Yaruri.
1 God nane tumonde baingheraena, a kotugo, nanda kini mo nimori.
Nindae sakai sise, ninda javo teria ava jighono iká bekáda erarira.
Na nindae sifo ghousa a kotugo, evovodae aiyakoe sise, irá gharena
2 Sifo ghousa na nindae aiyakoe sedo gharena. Nindae sifo ghousa a kotugo evovodae sakai sise irarena.
3 Bajari mo, nu teriagori. Sakai numoa sari evevari. Numo teriago bekári jo kasama arida kaugo iraeri.
4 Nine rea usesa aindae, namane oroko jebuga irera, nindae sakai sido iruroro,
namaneda sasingu ningido, némbarago eredo, nenda sasingukena saoro ningido osa sarera.
5 Ninda duró usasaghae ava osa siruroro ningido, ninda ari gae gitida ututeraesa ava,
nanda janje jokai kotedo gharena.
6 Ninda ari gae gitida ututeraesa setena, ava natofoi osa siruroro, ninda bino teria aindae nane barago vironu sedo gharena.
7 Evetu genembo isasambu ninda aito eveva aindae osa sise, ninda kavevera teriago ava yaruimi isimbarera.
8 Bajari mo, dubo bari a kotugo, joka ari katori.
Nunda dubo bari mo, evovodae irira, a kotugo gaimboghae janje ekoko eraira.
9 Nu evetu genembo isasambudae kavevera eraira,
a kotugo roera isasambu nune usira aindae joka eraira.
10 Arie Bajari, endada utuda a kotugo, evada roera nine usesa isasambu nindae sakai sarera.
A kotugo, ninda natofo isasambu nindae aiyakoe sarera.
11 Ni kini (king) edo iresa da duró ainda binó ava osa sarera.
Aminguse, ninda fakina teriago aindae isagha sarera.
12 Evetu genembo isasambu ninda tano babaigo gae gitida ututusesa ava kasama aoro dae sise,
a kotugo, ni kini edo iresa ainda duró fakinaghae kasama aoro dae sise, amingarera.
13 Nimo utu enda a kotugo, eva da kini edo evovodae iresa.
Bajari, rea beka gagojuse, ari dae sisira ava, nune eraira. Nu rea eraira amo, joka use eraira.
14 Bajari mave mema use goferaira ava, nune sonembeari jebugeraira.
Gogofegedo irera, ava jijighurureari ere feteraera.
15 Endada evetu genembo, sino fuka, sivoro kororo, eva da oka mane gindovi gandovi isasambu diti nimoa gosuse gigiturureoro, nenda baimara sifoda nenda bayau inononda muturaesa.
16 Ni ungo isambukena javoregheoso nenda uvu bayau inonoda buraera.
17 Bajari da aito fugari isambu dambugo bekári. Nu rea eraira amo, joka use eraira.
18 Evetu genembo mave bekáda bekáda janje isambuimi Bajari dae kori sarera, nu anakora utua edo irira.
19 Evetu genembo mave Bajari kakara eraera aikena reju ava daiva eraira, nune nemokena muturaira.
Ne nanjigo numokena kori seraera, nune ningido sonembeari jebugeraera.
20 Evetu genembo mave Bajari dubo buraera ava gagara eraira.
Avata, ari ekoko use irá gheraera ava deari sirivo eraera.
21 Namo sifo ghousa Bajari dae sakai sise irá gharena.
Utuda endada evada reju ava jebuga irira, aikena resena, evovodae nunda javo kakara aindae sakai sise,
nunda javo jighovo erare.