12
Nɨbi u abe re ubɨƚ kub u abe
1 Pen naböŋ nɨŋ damem nɨŋnö, nan ke hain nɨbö kub ap kumi kabö aŋ aulɨk ga. Nɨbi ap sɨdö waƚɨj rö löm, ma nɨpe rakɨn adö au löm, gapɨ unbö mɨgan laŋ u, kwin rol gɨpal rö usajɨl bad nɨpe nabɨc adö laŋ lö mɨdeia. 2 Pen nɨpe ñɨ paiŋaŋ rɨknɨg, ñɨ paiŋaŋ ñɨŋö nɨŋöl gɨ, wög paköm gaia. *Mai 4:10
3 Nan ke hain nɨbö ap halö, kumi kabö aŋ aulɨk waiö la nɨŋnö. Re ubɨƚ hagape halö kub yabɨƚ unbö ke ap mɨdeia. Nabɨc cög nɨpe unbö mudun jɨŋ löm, kom nɨpe unbö sɨduŋ laŋ löm, kiŋ rol gɨpal usajɨl bad gau, nabɨc cög adö nɨpe ke ke löm mɨdeia. *Dan 7:7 4 Re ubɨƚ kub anɨbu, amɨn nɨpe u gapɨ kumi kabö adö laŋ gau pakö, iru nöp bɨg ju mɨnöŋ naböŋ iƚ i ju luga. Anɨb u, gapɨ magöŋhalö mɨdeila gau naböŋ mɨhau nɨgaŋ rö hagöm, naböŋ mɨhöp mɨdailö, naböŋ añɨ ap bɨg ju yua. Pen nɨpe nɨbi ñɨ paiŋaŋ yag daunɨg geia u, yag dauö ñɨŋɨn, a göm, apöm abad mɨdeia. *Dan 8:10 5 Pen nɨbi anɨbu ñɨ ap yag daua. Ñɨ anɨbu nɨpe ain ur mɨlö udöm, nɨbi bɨ ram mɨnöŋ gau magöŋhalö abad mɨdeinab. Pen nɨbi u ñɨ anɨbu nɨp yag dauö, ejol ap ñɨ anɨbu pɨƚɨ gɨ udöm, dam God nɨpe sea kiŋ nɨpe kumi kabö adö laŋ mɨdöp au ud ara. *Ais 7:14; 66:7; Sam 2:9; Rep 19:15 6 God nɨbi anɨbu nɨp ka ap gɨ lö, pɨñɨŋ gɨ anɨb gau amöm, anɨb gau nöp mɨdö nɨŋöl gɨ, God nɨp nan magö ñöl gɨ abad mɨdeinab ñɨn wan dausan du hadred sikisdi (1260) arnab.
7 Pen kumi kabö adö laŋ au, ejol kub Maikel ejol nɨpe gau udöm amöm, re ubɨƚ kub anɨbu yam nɨpe gau aip pen pen göm gɨ damöm me, *Jud 9 8-9 re ubɨƚ kub u yam nɨpe gau halö, kumi kabö adö laŋ nɨbö al rɨdɨk yuöm böŋ nöp mɨnöŋ naböŋ iƚ i yula. Re hadame dagol gau mɨdeia, re anɨbu kɨjaki aka Seden a gɨpal u, nɨpe nöp nɨbi bɨ ram mɨnöŋ gau gau magöŋhalö kalɨp manö pir alö, manö piral nɨpe u nɨŋla. *Jen 3:1,14; Luk 10:18; 22:31; Rep 20:2
10 Pen manö kub ap kumi kabö adö laŋ au nɨbö hagöm haga,
“Mɨñi God nɨpe nɨbi bɨ gau ud kamɨŋ yunab.
Mɨñi God nɨpe kƚö nɨpe udöm, nɨbi bɨ ram mɨnöŋ gau gau magöŋhalö
Kiŋ kub ke yabɨƚ mɨdeinab.
Mɨñi God Krais nɨpe u nöp,
Bɨ Kub kƚö ke yabɨƚ mɨdöm,
nɨbi bɨ ram mɨnöŋ gau gau magöŋhalö abad mɨdeinab.
Nɨhön gɨnɨg: Seden nɨpe God amgö ilö nɨpe au mɨdöm,
sɨdö aŋ, sɨbön yaŋ,
añ mam hon gau nan si nan naij nɨhön nɨhön geila gau hagmɨdöp u,
nɨp mɨnöŋ naböŋ iƚ yaŋ ud yula. *Job 1:11; Sek 3:1
11 Pen añ mam hon gau,
Sipsip Pi hagape nɨpe u abe,
Krais manö nɨŋö hag ñɨmɨdal u abe gö,
Seden nɨp mo kale gau lɨla.
Nɨbi bɨ nɨpe nöp mɨdpun, a göm, pɨñɨŋ gagöm,
hanɨp al pak lɨnɨg al pak löl, a gɨ gasɨ nɨŋla.
12 Anɨb u, kale kumi kabö adö laŋ au mɨdpim gau,
mɨñ mɨñ göl gɨ mɨdaimim.
Pen kale mɨnöŋ naböŋ abe, ñɨg solwara u abe mɨdpim gau,
kalöp mög nɨŋbin.
Nɨhön gɨnɨg: Seden nɨp kale mɨdpim anɨb yaŋ ud yulö,
ñɨn nɨpe iru mɨdagöp rö, kal yabɨƚ juöp,” a ga. *Ais 44:23; 49:13
13 Pen re ubɨƚ kub anɨbu, yɨp mɨnöŋ naböŋ adö iƚ i ud yubal, a göm, gasɨ u nɨŋöm, nɨbi ñɨ yag daua anɨbu nɨp rɨdɨk gɨ yuaia pen, 14 God nɨbi anɨbu nɨp yaur du kub auan kub mɨhau lɨ ñö, nɨpe u göm ram mɨnöŋ kabö nöp mɨdöp aŋ au God ka nɨpe gɨ la anɨbu ara. Am anɨb gau mɨdö nɨŋöl gɨ, God nɨpe nɨp nan magö ñöl gɨ abad mɨdö, mɨ mɨhau nɨgaŋ rakɨn unbö kagoƚ jɨŋ arnab. Re ubɨƚ u nɨbi u nɨp nan naij ap gɨnɨm rö lagnab. *Dan 7:25; 12:7
15 Pen re ubɨƚ u, ñɨg uƚ rö ɫɨhak yunö nɨbi anɨbu nɨp ugal araŋ, a göm, ɫɨhaka u, 16 pen mɨnöŋ u nɨbi anɨbu nɨp gɨ ñö, ñɨg re ubɨƚ uƚ rö ɫɨhak yua anɨbu mɨnöŋ naböŋ mɨgan gau pa jö gɨ amöm, ur ur gö ara. 17 Anɨg gö, re ubɨƚ u nɨbi anɨbu mulu kal yabɨƚ lugö, nɨbi u ñɨ paiŋaŋ nɨpe gau, God Manö hagöp rö göm, Jisas manö nɨŋö nɨpe nɨŋ udöm hain göm nɨbi bɨ rɨmnap kalɨp hag ñɨbal gau aip pen pen gɨnɨg ara. *Rep 11:7 18 Pen re ubɨƚ u amöm ñɨg solwara goƚ au urak mɨdeia.