2
Kru indarɨmit avi naŋga haŋɨnɨŋ Jisasɨŋ ŋgɨrɨm payɨmu
1-2 Nam 24.17Herot aru miku mɨŋga kɨyɨmi hɨrɨvɨyɨ, Maria Jisasɨŋ pɨrɨvɨsa Judia pɨhu Betlehem kavumi.*Aru miku Herot pɨrɨvɨsa Judia naŋga pɨrɨvɨsa muvɨra, Judia arɨñɨ kɨndu haŋɨnɨŋ naŋga karatamarasɨmi. Herot aru miku mɨŋga kɨyɨmi. Hara Herot Romɨndu aru miku mɨŋgandu tɨwɨyɨ kɨyɨmi. Romɨndu aru mikurɨm Sisar varasɨmu. Kamatɨhi indarɨmit avi naŋga muvɨra ina yahayahavundu haŋɨnɨŋ pata Jerusalem yɨvurahata nɨmavamba kitɨhumu, Ñɨŋi kɨhi Judandu aru miku yahami kandɨha pambu kɨyɨ. Nuŋandɨ kinɨkɨ ina yahayaha nɨmbu kɨta ŋgata nuŋandɨ ñɨmbi tɨhuyahɨrɨm parɨŋ, vamu. 3 Kamavahu aru miku Herot kuyu kandɨha indarɨhira nuŋandɨ mavɨ hambu avi mandɨmi. Jerusalemɨndu krunavundi ndahara sɨhanaŋga nurɨŋandɨ mavɨ hambu avi mandɨmi. 4 Kamata Herot yahata Gotɨŋ kɨrañɨŋguhundu aru miku haŋɨnɨŋ naŋga Israelɨndu tɨkatɨka kuyundu mirɨmba naŋga haŋɨnɨŋ ambahi pata tɨhɨruhu nurɨŋ nɨmavamba kitɨhumi, Got krunavundiŋ aŋga mɨŋɨmandɨ vata yɨhɨramami kru kandɨhama pɨhu pañɨ nzɨkwɨ yɨvurahɨmandɨ, vami. 5 Kamavahi nɨmavamu, Pɨhu Betlehem, pɨrɨvɨsa Judia nduyɨ yɨvurahɨmandɨ. Kru Gotɨndu kuyu mɨŋata ambavaravara mɨŋga kuyu nɨmata yɨhimbɨvɨrami. 6 Mai 5.2 naŋga, Jo 7.42Pɨhu Betlehem, krunzapa Judandu pɨrɨvɨsayɨ kɨndana. Krunzapa Judandu pɨrɨvɨsayɨ pɨhu aruru muvɨra haŋɨnɨŋ ñɨmbi naŋga. Nandahara ñɨmbi naŋga. Nandɨ kru mumɨŋga aru miku mɨŋga yɨvurahata Gotɨndu krunavundi Israel hatiŋ karatamɨrɨmandɨ vamba yɨhimbɨvɨrami, vamu.
7 Kamavahu Herot kuyu kandɨha indarɨta kru mumɨŋgaŋ aviñam ambahi, uta kru indarɨmit avi ina yahayahavundu haŋɨnɨŋ ambahi payɨmu. Payɨhu nurɨŋ nɨmavamba kitɨhumi, Pamata hɨrɨvɨyɨ kinɨkɨ kandɨha yɨvurahahi ŋgamara, vami. 8 Kamavata nurɨŋ ambami. Uta ñɨŋi kandɨha avindamata puhɨramaŋgarata ŋgata, pata yaŋ ambɨtɨra yindahara uta nuŋandɨ ñɨmbi tɨhuyahɨtɨn, vami. Kamavata sɨmbɨhi Betlehem umu. 9-10 Aru miku Herot ambavarahi indarɨta mɨtuta umu.*Betlehem, Jerusalem arɨñɨŋgɨndi, 8 kilomita taya. Uta kinɨkɨ ina yahayahavu kɨta ŋgamu sɨwɨ haŋandɨhin ŋgata kɨnzɨhɨnzɨtɨmu. Kinɨkɨ kandɨha kasiramata uhihi nurɨ sɨhɨndɨ umu. Uta tavɨ ñɨŋi kɨyɨmi hañɨ kɨmba hambu kɨyɨmi. 11 Sng 72.10 naŋga, Ais 60.6Kamata indɨhuta ñɨŋi ha naŋga nɨŋum Mariaŋ ŋgata tanda mɨkwɨmɨkwɨnɨta kɨpumɨka nurɨŋandɨ ha pɨrɨyɨ tamahu mɨŋguhi ñɨŋi hamandu ñɨmbi tɨhuyahamu. Kamata paŋaŋgara ha mɨŋavɨhɨrɨta muhɨmɨmuhɨm mɨŋata payɨmu haŋɨnɨŋ, gol, naŋga sambaŋgihɨvɨ maña hɨm kɨrahu kɨnza avi yahandi hɨm, naŋga paura uvɨŋgɨnza avi yahandi haŋandɨhin asɨhuramata Jisasɨŋ ŋgumu. 12 Kamatɨhu Got akwɨsɨhuyɨ nurɨŋ nɨmavami, Uta sɨhinda Herot kɨyɨ hañɨ mayɨvurahamara, vami. Kamavahi mu hɨndɨñɨ nurɨŋandɨ pɨhuyɨ aŋga umu.
Josep tama Isip umu
13 Kru indarɨmit avi naŋga haŋɨnɨŋ uhuhu, Aru nɨmandu kutɨkara pata akwɨsɨhuyɨ Josepɨŋ nɨmavami, Herot ñɨŋi nɨmaŋ puhɨravuhɨraramata ŋgata yɨvutatamɨrɨman vata andɨtɨhi yahamɨrata ñɨŋi naŋga nɨŋumɨŋ tɨmbuta tɨvata Isip umara. Uta kɨta yandɨ kuyurɨm tavɨra, vami. 14 Kutɨkara hama kamavahi Josep yahata nɨŋumɨŋ naŋga ñɨŋi hamaŋ tɨmbuta Isip kɨvɨyɨ umu. 15 Hos 11.1Kamata Isip kɨyɨhuhu Herot kɨmumi. Kandɨ vana nɨŋandɨhinɨrɨm Aru nɨma, kru nuŋandɨ kuyu mɨŋata ambavaravara mɨŋgaŋ ambahi, nɨmavami, Yandɨ kru ñɨŋi Isip kɨyɨhi ambahin Isip mitata payɨ, vami. Kamataharɨm Aru nɨma ambami vana nɨŋandɨhin kandɨsɨkwɨsɨkwɨ yɨvurahami.
Aru miku Herot ambahi ñɨŋi muvɨra yɨvuhɨmumbɨramu
16 Kru indarɨmit avi ina yahayahavundu haŋɨnɨŋ uhuhu, Herot yaŋ kuyusɨhɨrata mu hɨndɨyɨ umu vata kɨtɨrɨ kɨyɨmi. Kuha Herot kru indarɨmit avi ina yahayahavundu haŋɨnɨŋ kitɨhuhi ambamu, Kinɨkɨ ŋgamarɨŋ ha arɨkinzimbi umiha, vamu. Kamataharɨm kru muvɨraŋ sɨmbɨhi pɨhu Betlehem naŋga pɨhu makamaka arɨñɨarɨñɨ kɨyɨmuyɨ umu. Uta kru ñɨŋi taya arɨkinzimbi naŋga mɨŋgata haŋɨnɨŋ yɨvuhɨmumbɨramu. 17-18 Stt 35.19 naŋga, Jer 31.15Muhɨmɨmuhɨm vana kanɨŋɨnɨŋɨrɨm Got ambahi, kru Gotɨndu kuyu mɨŋata ambavaravara Jeremaia ambami, Pɨhu Rama, Resel nɨŋuñɨŋgiñandu ñɨŋisɨm kɨmumbɨramu. Kamatɨhu ñɨŋi nɨŋumɨnava haŋɨnɨŋ irɨhɨnzɨhi tamamu. Kamatɨhu krunavundi muŋɨnɨŋ pata nurɨŋ mɨŋañɨŋarɨtɨrɨŋ mavɨñam hañɨ kɨyɨmu vata andɨhura kambu maŋindarɨmu, vamba ambami haŋandɨhin, kandɨsɨkwɨsɨkwɨ yɨvurahami.
Josep tama aŋga payɨmu
19 Josep Isipɨndu pɨrɨvɨsayɨ kɨyɨhihi, Herot kɨmutatɨhi Aru nɨmandu kutɨkara hama Josepɨŋ akwɨsɨhuyɨ yɨvurahami. 20 Kis 4.19Kamata Josepɨŋ nɨmavami, Ñɨŋi nɨmaŋ yɨvutatamɨndaŋ vata andɨsɨmu haŋɨnɨŋ kɨmusɨmu. Harɨm yahamɨrata ñɨŋi ha naŋga nɨŋumɨŋ tɨmbuta pɨrɨvɨsa Israel aŋga umara, vami. 21 Kamavahi Josep yahata ñɨŋi ha naŋga nɨŋumɨŋ urata pɨrɨvɨsa Israelɨrɨm aŋga umu. 22 Ais 11.1 naŋga, 53.2 naŋga, Mk 1.24 naŋga, Lu 2.39 naŋga, Jo 1.45Hara, Arkelaus nɨŋuva Herotɨndu upɨ mɨŋata pɨrɨvɨsa Judiandu aru miku mɨŋga kɨyɨ vahu Josep indarɨta kandɨhambu uhuhurɨm pɨŋitumi.*Aru miku Herot kɨmutatɨhi, Rom hati nuŋandɨ pɨrɨvɨsa haŋɨnɨŋ nuŋandɨ ñɨŋisɨmɨŋ tɨŋgɨrumu. Kamatɨhu Arkelaus pɨrɨvɨsa Samaria naŋga Judiandu aru miku yɨvurahami. Kamata aru miku 10 simbi kɨyɨmi. Hara Aru nɨma akwɨsɨhuyɨ Josepɨŋ nandɨ indarɨmit ha kandɨ vamba ambami. Kamavahi yahata pɨrɨvɨsa Galili umu. 23 Uta pɨhu Nasaret mɨnzɨmu. Harɨm kuha kru Gotɨndu kuyu mɨŋata ambavaravara haŋɨnɨŋ ambamu, Kru nɨma pɨhu Nasaretɨndu mɨŋga vamba ambɨrɨmandɨyu, vamu haŋandɨhin, kandɨsɨkwɨsɨkwɨ yɨvurahami.
2:1-2 Nam 24.17
*2:1-2 Aru miku Herot pɨrɨvɨsa Judia naŋga pɨrɨvɨsa muvɨra, Judia arɨñɨ kɨndu haŋɨnɨŋ naŋga karatamarasɨmi. Herot aru miku mɨŋga kɨyɨmi. Hara Herot Romɨndu aru miku mɨŋgandu tɨwɨyɨ kɨyɨmi. Romɨndu aru mikurɨm Sisar varasɨmu.
2:6 Mai 5.2 naŋga, Jo 7.42
*2:9-10 Betlehem, Jerusalem arɨñɨŋgɨndi, 8 kilomita taya.
2:11 Sng 72.10 naŋga, Ais 60.6
2:15 Hos 11.1
2:17-18 Stt 35.19 naŋga, Jer 31.15
2:20 Kis 4.19
2:22 Ais 11.1 naŋga, 53.2 naŋga, Mk 1.24 naŋga, Lu 2.39 naŋga, Jo 1.45
*2:22 Aru miku Herot kɨmutatɨhi, Rom hati nuŋandɨ pɨrɨvɨsa haŋɨnɨŋ nuŋandɨ ñɨŋisɨmɨŋ tɨŋgɨrumu. Kamatɨhu Arkelaus pɨrɨvɨsa Samaria naŋga Judiandu aru miku yɨvurahami. Kamata aru miku 10 simbi kɨyɨmi.