Paul di ouresi bura
Corinth vene
rofu
Ago di ini adina
Paul di ouresi bura Corinth vene rofu bi Corinth ekalesia vene di vegu ma mokena vari gira aena di vegu no fafau bura reyo. Paul yaku mina Corinth dubu kora reyo. Mirona ituari, Corinth bi Greek gagani di taoni tora, Rome vene di gagani yokoi roka Achaia di ourefeidena taoni. Ina bi kono tora noibanu di taoni kana. Ina bi voi resi sero rei mona rena, toutou vegu di matagini, koa rena vegu tau tora ma ofa sei nivakena vegu bouna bouna di roka nufa.
Paul di mokena tora bi amiye okuna ma koa rena ekalesia vene di fogori di vegu no fafau. Ka bi rema rumana varena, mena, uka di mokena di vegu, ekalesia vene ourefeidena ma gabireri raga rena, Vima kikifa di beika mado ma dadi rae rena di nikaitena nikabai reyo mina fafau. Mokena vabara dudu, gokai Ago buni mina nikaitena nikabai redo oteimaro.
Amiye tau gade gade yaku mina koro 13 di ago diba nidedi; bi Sei di beika mado buni buni—mina bi uka mana.
Beika sina ideri
Ago di ini adina 1.1–9
Ekalesia vene di fogori amiye okuna 1.10—4.21
Rema rumana varena vegu ma yava vene di vegu 5.1—7.40
Ekalesia vene ma ofa sei nivakena vene 8.1—11.1
Ekalesia vene di vegu ma Sei nivakena vegu 11.2—14.40
Keriso ma mokena vari gira aededi vene di dadi rae rena 15.1–58
Judea ameyadi ekalesia vene rofu fore mana 16.1–4
Asiyaka rofu ago ma metona ago 16.5–24
1
1 Mina bura bi na Paul, kaere bi Sei di ura dada Iesu Keriso dudu, nifeidena amiye kana raka niyo, ma uni dubuini Sosthenes sa, una gutuna—
2 Sei di ekalesia vene Corinth ri amededi rofu, kaere Iesu Keriso dudu moi akeke risi sana tauri ini ma uni Varika amiye Iesu Keriso di roka vo nidedi, ina vene vakoisa Sei di vene kana nigedi raka niyo:✡Acts 18.1
3 Uni Baba Sei ma Varika amiye Iesu Keriso di buni tora gade ma uka amuta ya maragane.
Iesu Keriso dudu buni tora gade mana
4 Nai Sei rofu ya vene dada, toga toga buni tora gade maida, Sei di buni tora gade Iesu Keriso dudu ya maro dada, 5 ye beika tau noibanuri, ina dudu gugura tau nufa kana niyadi—ago nina ma mokena yora tau gade dudu. 6 Adina ya yaku niokuna ago Keriso dada bi moi gira riyadi, 7 ye uni Varika amiye Iesu Keriso di ogau nina meda uka dadina dudu, tua regasa buni tora gade di beika baika buni tau noibanu moiyadi dada. 8 Ina ka ya egira rego bogo ari metonari, ye uni Varika amiye Iesu Keriso di dena medari bi amiye yokoi ya ga ikimaraine. 9 Sei yaku ini nitore reyo ago kana redo, kaere bi ini Mida, uni Varika amiye Iesu Keriso sa auta rena bi sena ya raka niyo.
Amiye okuna duburi
10 Kamini uni Varika amiye Iesu Keriso di roka dudu, usika ourena ya egira reida, ya vene tau noibanu ya kaya ya kaya ago moi yokoi maka risi yi utari okuna ga reyaganedi, idu mokena ma ura yokoi makari gobuno reyaganedi. 11 Adina usika ourena ya dada, Chloe di yava vene yaku yi utari kayamo reyadi sina na nioteimaradi. 12 Beika ya nigika reida bi yomakai: ya vene bedakai yaku nidedi, “Na bi Paul usi dida;” ma bedakai nidedi, “Na bi Apollos usi dida;” ma bedakai nidedi, “Na bi Peter usi dida;” ma bedakai nidedi, “Na bi Iesu Keriso usi dida.”✡Acts 18.24 13 Makai vonisi bi Keriso bi moi berou berouri aeyadi! Ya vene dada bi Paul satauro ikoko reyadi ba? O ya bi Paul di roka dudu babatiso reyadi ba?
14 Na yaku Sei rofu buni tora gade maida ya yokoi bi babatiso de reyaka, idu Gaius ma Crispus maka.✡Acts 18.8; 19.29; Rom 16.23 15 Ye yokoi nai roka dudu babatiso reyo bi makai de nigo. 16 Na ka Stephanas di yava vene babatiso reyaka, idu de mokeida amiye yokoi babatiso reyaka o de bi.✡1 Cor 16.15 17 Adina Keriso yaku babatiso regi de na nifeideyo, idu bi Sei di ago buni nirausi regika, diya amiye di mokena vabara di ago dudu, makai dudu bi Keriso di satauro odorori muyena bi vava de kana nigo baebu.
Keriso bi Sei di vava ma ini mokena vabara
18 Adina Sei rofu boiyo rededi vene bi satauro odoro muyeyo sina bi forovai reyo, idu una moi vegu rido vene rofu bi Sei di vava mini. 19 Adina yomakai bura reyo:✡Is 29.14
“Mokena vabara nufa vene di mokena tora moi no risi
diba nidedi vene di ada yora di mokena moi forovai regida.”
20 Mina ye, mokena vabara nufa amiye bi goini? Ago gira oteimana amiye bi goini? Gua medari ago nirorotari redo amiye bi goini? Sei bi mina kono tora noibanu di mokena vabara moi forovai reyo ba ide?✡Job 12.17; Is 19.12; 33.18; 44.25
21 Adina kono tora noibanu amededi vene bi Sei di mokena vabara dudu bi Sei toto, ye amiye di mokenari bi forovai rena ago kana nirausi reyafa, mina dudu Sei di mokenari, bi buni mokena vari gira aededi vene moi vegu rigo. 22 Jew vene bi rebe usa usa nidedi ma tutubena idana vene*tutubena idana vene: Greek agori mina bi Greek vene. yaku mokena vabara maina rededi. 23 Idu una yaku Keriso bi satauro ikoko reyadi mina sina nirausi resifa. Jew vene rofu bi ini ida futu rena ago ma tutubena idana vene rofu bi forovai rena ago; 24 idu raka niyadi vene, Jew vene ma tutubena idana vene gogo, mina ago bi Keriso, kaere bi Sei di vava ma ini mokena vabara. 25 Adina Sei di forovai rena mokena yaku amiye di mokena vabara ebu redo, ma Sei di yau nina bi amiye di isivaga ebu redo.
26 Kamini nai usika ourena, Sei yaku ya raka niyori, ya bi gokai kana vene mina mokefa. Mina kono tora noibanu vene di mokena dada, ya tau de bi mokena vabara nufa, ya tau de bi vava nufa, ya tau de bi yava vene di roka tora nufa vata niyadi vene. 27 Idu Sei yaku beika baika bi mina kono tora noibanu vene di mokenari bi forovai rena mokena vabara nufa vene moi maena regika auba reyo; ina yaku beika baika mina kono tora noibanuri bi yau niyadi yeiva vene moi maena regika auba reyo. 28 Ina yaku beika baika mina kono tora noibanu vene di mokenari bi egona ma mokei itu rededi, mina auba reyo. Ye makai dada, Sei yaku beika baika konori amededi vene yaku vei mama rededi bi moi uroro rego, 29 ye amiye yokoi Sei di nemokori ni-ika de rebigo. 30 Idu Sei dada, Iesu Keriso sa, vegu amededi, ina kaere bi Sei yaku uni mokena vabara, mokena rorobo, moi akeke rina ma vegu no di voi rena kana riyo. 31 Mina dada, bura reyo kana: “Amiye kaere yaku ni-ika redo, bi Varika amiye ina yaku beika reyo mina dudu ni-ika rebiyaine.”✡Jer 9.24