1 Kamini Sei di vene rofu aedegika moni butu butu rena dada: Galatia ekalesia vene tau noibanu ago gira maraka kana, ye ya ka makai reyaganedi.✡Rom 15.25–26 2 Fura neinei di ourena medari, ya neinei bi moni be moi etagae risi ae torekai reyagane, yi moimai di yeiva dada, ye na baegidari, bi moni butu butu ga reyaganedi. 3 Ye na okigasa, kaere ya bura rena dudu nimaradi nifeidegida, yi beika baika magedi, mina Jerusalem rofu moi boyagane. 4 Bi buni na ka bogida vonisi, bi mina venesa bogida.

5 Macedonia bi ura reida kana ebu rei yavoi resi ya vene rofu egoru bae negida.✡Acts 19.21 6 Ye meda be ya venesa amegida baeko, o ava di meda noibanuri ka amegida, ye na goidu bogida ya na aedegedi. 7 Adina gua ebu rei yavoi rena maka dudu ya vegika, bi ura de reida. Yasa meda be amegida uka mokena moiyaka, Varika amiye eyounego vonisi bi.

8 Ye Pentecost di irakuna di meda okigo bogo Ephesus ri amegida mamo.✡Lev 23.15–21; Deut 16.9–11✡Acts 19.8–10 9 Adina moimai tora ini rama nufa regika ida vena rafo di biri bi na rofu ekeyo, ma tourage rededi vene bi tau.

10 Ye Timothy baego vonisi, nari rei mona refo, yi fogori ori ga reyaine, adina bi Varika amiye di moimai redo, na yaku reida kana.✡1 Cor 4.17 11 Mina resi amiye yokoi yaku ina rofu mokei itu ga reyaine. Ini ida digori, bi uka amuta dudu nifeidefa, ye na rofu baeyaine, adina usika ourenasa baegedi bi toro reida.

12 Kamini uni dubuini Apollos dada, guyaguya niyaka bi usika ourena bedakaisa ya egoru reyaganedi, idu gua bae negi ura bi rei mona de reyo. Idu ari rama okigori, bi ya vene rofu baego.

13 Nari rei mona resi mokena vari gira aena dudu are rei gira resi ori de dudu amesi yeiva refa. 14 Ya beika baika tau noibanu renari bi uka mana dudu refa.

15 Ye nai usika ourena, ya ya diba Stephanas di yava vene bi Achaia gaganiri ourena ekalesia vene nisi Sei di vene naivo regi gabireri, ina kaya raga reyadi. Ye ya egira reida,✡1 Cor 1.16 16 mina kana amiye, ma yasa moimai rededi vene ma reremama rei gira rededi vene tau noibanu rofu ini gabireri raga reyaganedi.

17 Kamini Stephanas, Fortunatus ma Achaicus di baena dada ada reida, ya minari amena de reyo bi gaubo reyadi dada. 18 Adina nai vima ma yi vima ka egira reyadi. Ye mina kana vene bi kikifa refa.

19 Asia di ekalesia vene ya yuata nifeideyadi. Aquila ma Priscilla ma ekalesia vene ini yavari egogo rededi vene, Varika amiye dudu ya yuata tora nifeideyadi.✡Acts 18.2 20 Usika ourena tau noibanu ya yuata nifeideyadi.

Ya kaya ya kaya ekalesia vene di fuka refa.

21 Nai vana dudu yomina bura reida: Na Paul ya yuata nifeideyaka.

22 Amiye yokoi yaku Varika amiye uka de mago vonisi—bi nikiraini reyaine!

Marana tha*Marana tha: Mina bi Aramaic agori; ini adina bi Varika amiye, bae.—Varika amiye, bae!

23 Varika amiye Iesu di buni tora gade bi ya venesa ameyaine.

24 Nai uka mana bi Iesu Keriso dudu ya tau noibanusa ameyaine.†Bura bedakai ka Rama nufa.