Paul di bura remanu ere
Corinth vene
rofu
Ago di ini adina
Paul di bura remanu ere Corinth vene rofu bi Corinth ekalesia vene rofu auta reyo meda girari bura reyo. Mina ekalesia vene bedakai yaku Paul rofu ruda regamadi, idu uka yokoi maka nigika ura rei mona reyo. Mina vata niyori, ini uka ada tora niyo.
Bura renari siko bi mina Corinth ekalesia venesa auta reyadi ago nidodi reyo. Ekalesia vene fogori nifafana resi ruda regamadi vegu rofu gokai ago gira gira niyo, mina nirorotari reyo; ye ini ago gira gira ninari, ini vegu no feresi moi etagae risi uka yokoi maka niyadi, ye mina rofu ada reyo. Mina resi, ekalesia vene rofu usa usa niyo bi Judea gaganiri gugura beika de ekalesia vene aedegi fore tau gade maraganedi. Ago di metona korori, Paul yaku ini nifeidena amiye kana raka nina Corinth ekalesia vene bedakai fafau nigira reyo; adina mina vene bi ina kaya bi nifeidena vene rama nigasa Paul ofa nifeidena amiye nitourage reyadi.
Beika sina ideri
Ago di ini adina 1.1–11
Paul ma Corinth ekalesia vene 1.12—7.16
Judea gagani ekalesia vene aedegi fore mana 8.1—9.15
Paul ini nifeidena amiye raka nina vava rofu nigira reyo 10.1—13.10
Metona ago 13.11–13
1
1 Sei di ura dada, na Paul bi Iesu Keriso di nifeidena amiye niyaka, ma uni dubuini Timothy ka nasa mini —✡Acts 18.1
Ya Corinth taoniri Sei di ekalesia vene ma Sei di vene tau noibanu Achaia gaganiri amededi ya tau vakoi rofu bura reida:
2 Uni Baba Sei ma Varika amiye Iesu Keriso di buni tora gade ma uka amuta ya maragane.
Paul yaku buni tora gade Sei maro
3 Uni esika esika tauri moi aededo Sei, ma una iriyeduka redo Baba, ina bi uni Varika amiye Iesu Keriso di Baba ma Sei, ye ini roka moi odoro ribinadi! 4 Ma ina yaku uni esika esika tau noibanuri una moi aededo, mina ye una yaku esika esika moiyadi vene moi aedegifa, Sei yaku uni esika esikari una moi aedeyo kana. 5 Adina Keriso di esika esika uni vegu ideri vata baesi rausi redo kana, ye Keriso dudu ini moi aedena moisifa ka uni vegu ideri vata baesi rausi redo. 6 Esika esika moigifari, mina bi ya moi aedesi ya moi vegu rigo; ye Sei yaku una moi aedegori, mina bi yi vegu moi aedego, ye uni esika moina ida yokoi maka ka ya kaya esika moigedi kana, amuta dudu are rei gira regedi. 7 Uni uka mokena ya vene rofu bi gira iniye, adina una una diba uni esika esika moisifari, ya ka esika esika moidedi, ye Sei yaku una aededo kana, ya vene ka aedego.
8 Usika ourena, Asia gaganiri esika esika moiyafa, mina diba niyagane ura resifa. Ini adina mina toe una fafau aeyo bi tora iniye, ye una yaku duku rena ka yeiva de reyafa, ma uni uka ka yau niyo, ye una bi gua muyegifa mokeyafa.✡1 Cor 15.32 9 Rama, una umuyegedi di meda baeyo kana amuteyafa. Idu mina bi uni yeiva rofu mokena vari gira de aegifa, idu Sei di yeiva rofu mokena vari gira aegifa, kaere bi muyena vene moi dadi rae redo amiye. 10 Resi no tora iniye iniye una umuyegika reyo, mina una moi vegu riyo, ma una moi vegu rigo;*rigo; bura bedakai rido nufa. ye dudusa una moi vegu ribigo, mina rofu uka mokena aesifa. 11 Ye ya vene ka usa usa dudu una aedebifa, ye makai dudu amiye tau una†una; bura bedakai ya nufa. dada buni tora gade vo nigedi, Sei yaku ina vene di usa usa nina, dada ini buni tora gade una maro.
Paul di nirorotari reyo mokena moi idana reyo
12 Adina uniye ni-ika resifa bi yomakai: uni uka di mokena yaku niokudo gokai mina konori uni vegu regamafa bi, Sei yaku vegu rama resi ago rama nido kana regamafa; ye besa besa ya vene rofu rei mona regamafa. Una bi diya mina kono di mokena tora dada de regamafa, idu Sei di buni tora gade dada regamafa. 13 Adina ya vene yaku beika bura vesi diba niyadi, mina maka ya rofu ida rorobori bura resifa, ye nai uka mokena bi ya mina diba ni vau regedi, 14 adina ya bi ruika mamo una diba niyadi. Ye uni Varika amiye Iesu di dego medari una ya ni-ika regifa kana, ya ka una ni-ika regedi.
15 Ya rofu siko bae negi ura reyaka, ye uru remanu buni tora gade moiyaganedi, nai senagi reyaka vegu rofu ada reyadi, mina gua diba ni mona reyaka dada. 16 Macedonia bae nesi ya vegida vonisi, makai dudu nirorotari reyaka, ma ya vene dada Macedonia gutuna dai ribigidari, ya yaku Judea idari na nifeidegedi.✡Acts 19.21 17 Nai dibo regida di ura regasa nai mokena moi idana de riyaka. Mina kono vene yaku rededi kana, nirorotari resi “Rama regida” ma “Rama de regida” bi uru yokoi makari makai de nida. 18 Rama iniye Sei bi vegu rama redo kana, “Yo” nigida bi regida, idu de regida bi “Yo” de nigida. 19 Adina Timothy, Silas ma na yaku Sei di mida Iesu Keriso di ago yi fogori nirausi regamafari, bi diya “Rego” ma “De rego,” idu ini ago makai kana toga redo.✡Acts 18.5 20 Adina Sei di nitore reyo ago tau noibanu ina dudu bi “Yo” maka. Mina resi ina dudu Sei di vabara rofu “Rama yo” nisifa. 21 Mina bi Sei, kaere Keriso dudu ya venesa, una moi are rei gira resi ini vima una fafau rausi reyo. 22 Ma ini bera bi una fafau aesi ini Vima nitore rena ago bi rama niyaine uni ukari aeyo.
23 Idu Sei bi nai vegu fafau ninegau reyainedi raka nida—yi no rededi fafau emagida baebu dada, dudusa Corinth rofu di nena de reyaka. 24 Bi rama de yi mokena vari gira aena dudu, mina ya ourefeidegika resifa, idu yasa moimai resifa bi ya ada reyaganedi, ini adina, yi mokena vari gira aenari, bi are rei gira rededi.