1 Mina dada, una bi makai toga de amegasa nari regamafari, uni mokena buni moiyafa bi unike maka Athens ri amegifa.✡Acts 17.15 2 Timothy bi nifeidesifa, kaere bi uni dubuini ma Keriso di ago buniri, Sei di vakoi moimai resifa amiye, yi mokena vari gira aena moi gira ma ya egira reyainedi, 3 ye mina esika esika yaku ga ya moi no riyainedi. Ya ya diba mina deda vegu bi Sei di mokenari baegedi. 4 Adina, una yasa amegamafari, sena ya toga toga nigamafa bi una rofu esika esika magedi. Ye niyafa kana bi vata niyo, bi ya ya diba. 5 Mina dada, toga de amegasa nari regidari, Timothy nifeideyaka yi mokena vari gira aena bi gokai mina. Na bi ori reyaka be bi Satani yaku ya yi uka maina regi nivegori, uni moimai reyafa bi tavoi tavoi rego baebu!

6 Idu Timothy bi ruika mamo una rofu bae okiyori, ago buni moi baeyo, yi gokai mokena vari gira aesi uka madedi. Ina niyo bi ya yaku mokena buni dudu una mokededi, ma yi ura una vegi rededi, una ka gokai ya vegifa kana.✡Acts 18.5 7 Ye, usika ourena, uni toe ma esika esika tauri una egira reyadi ya fafau, adina yi mokena vari gira aena dada. 8 Ya vene bi Varika amiye ideri are rei gira rededi vonisi, ye rama una gua mamo veguri ameinu regifa. 9 Una bi gokai Sei buni tora gade ya fafau magifa; uni Sei di nemokori ya dada ada reyafa, mina rofu buni tora gade masifa. 10 Urusa ariu una bi usa usa ni yeiva resifa, ye dudusa ya vegifa, goinari yi mokena vari gira aena yau nido sana ya egira regika.

11 Ma gua bi uni Baba Sei iniye ma Varika amiye Iesu yaku uni ida ya vene rofu bae negifa, ina vene bi riyagadu! 12 Varika amiye ya kaya ya kaya ma amiye tau vakoi rofu uka madedi tora nisi rausi reyaine, una yaku ka ya rofu resifa kana. 13 Ye ina yaku yi uka ideri yeiva ya mago, ye uni Baba Sei di nemokori, uni Varika amiye Iesu ini akeke vene tausa degori, ya bi vegu no yokoi de nufa ma akeke amebigedi.