6
1 Una bi vakoi Sei di moimai resifa vene, ye una yaku ya niguba resifa Sei di buni tora gade una maro, bi ga tovo ni tavoi reyaine. 2 Adina ina yaku yomakai niyo:✡Is 49.8
“Nai meda ramari
yi ago neideyaka
ma moi vegu rina vegu meda okiyori
ya aedeyaka.”
Vefa, nai ura reyaka meda bi gua mini; ma moi vegu rina meda bi gua mini.
3 Una yaku amiye yokoi di ida gana de risifa, ye makai dudu,uni naivo renari no yokoi veitao rego baebu. 4 Idu ida tau noibanuri, Sei di naivo resifa vene kana uniye nimarafa: are rei gira rei mona rena dudu, esika moina dudu, toe moina dudu, vorivori rena dudu, 5 ubobo rena dudu, dibura yavari aena dudu, siboroka rena dudu, moimai rena dudu, urusari varei mona de dudu, iruku irina de;*iruku irina de; o oyo rena. ✡Acts 16.23 6 vegu no yokoi de dudu, mokena vabara dudu, toro rena dudu, uka buni dudu, Vima kikifa dudu, uka mana rama dudu; 7 ago rama dudu, Sei di vava dudu, vana rama ma vana enana di mokena rorobo di iya rena gugura dudu; 8 ni akeke rena dudu, ni akeke de rena dudu, nifafana rena dudu, ma roka moi odoro rina dudu. Ofa ofa vegu rededi vene kana una rofu mokededi, idu bi vegu rama maka resifa vene; 9 toto kana, idu diba ni mona regamadi; muyena tumusa kana, idu rama vegu amesifa; toe una magamo kana, idu una umuyena de regamadi; 10 iriyeduka resifa kana, idu toga ada resifa; baku baku resifa vene kana, idu amiye tau moi gugura nufa rigamafa; beika yokoi nufa kana, idu una bi beika baika tau noibanu nufa.
11 Ya Corinth ekalesia vene, uni mokena kana ya rofu ago niyafa; uni uka ya vene rofu bi ya mai buaru regamafa. 12 Uni uka mana di amutena ya rofu bi kebi de rigamafa, idu ya vene yaku bi yi uka mana di amutena una rofu bi kebi rigamadi. 13 Kamini mina makai, na gua ya vene rofu mida mida kana ago nida: Yi uka ka mai buaru refa!
Ago gira kono di vegu fafau
14 Mokena vari gira de aededi vene vakoisa moi kake ga ribifa. Ini adina mokena rorobo vene bi gokai ago gira de neidededi venesa auta regedi? O vabara vene bi gokai mukuna venesa auta regedi? 15 Ye gokai dudu Keriso bi Belial†Belial: Mina bi Bodaka. sa mokena moi yokoi maka rigo? O mokena vari gira aedo amiye bi mokena vari gira de aedo amiyesa beika rau rego? 16 Ye gokai dudu Sei nivakena yava ma ofa sei bi mokena moi yokoi maka rigedi? Ini adina una‡una; bura bedakai ya nufa. bi Sei vegu amedo nivakena yava kana, ye Sei yaku yomakai niyo:✡Lev 26.12; Ezek 37.27; 1 Cor 3.16; 6.19
“Na yaku ina venesa nai ameida yava risi
inasa diga boga rebigida;
Na ina vene di Sei nigida
ma ina bi nai vene nigedi.”
17 Varika amiye ka niyo,✡Is 52.11
“Mina dada ina vene feresi
ina rofu ya kaya moi gaima rifa.
Beika baika bi kino avaka moina ga refa,
ye na yaku ya afei dui regida, vo niyo.
18 Yeiva iniye Varika amiye yaku niyo,✡2 Sam 7.14; 1 Chr 17.13; Is 43.6; Jer 31.9
Yi baba nigida
ma ya bi nai rumana mida ma nai rema mida nigedi.”