John
di bura remanu ere
Ago di ini adina
John bi kaere yaku John di bura remanu ere “dubu di ourefeidena amiye” iniye kana “ini uka mado rema ini midasa” rofu bura reyo. Mina bi mirona taoni di dubu di ekalesia vene. Bura rena di sina bi egira rena ago, ye amiye be uka masi ofa ofa nidedi vene ini oteimadedi rofu vei feidegasa amebiyaganedi.
Beika sina ideri
Ago di ini adina 1–3
Uka mana bi vava iniye 4–6
Ofa ofa oteimana ago vei feide mona reyagane 7–11
Metona ago 12–13
1
1 Mina bura bi dubu di ourefeidena amiye rofu.
Auba reida rema, ini midasa,*rema ini midasa: Mina bi dubu ini venesa (ka bi nanaka 4-5 ri). kaere rama iniye uka maida. Na maka de, idu amiye tau vakoi, kaere bi mina sina rama ina diba, ka uka ya madedi, 2 adina mina sina rama bi unasa amedo, ye toga toga unasa amebigo.
3 Baba Sei ma Iesu Keriso ini Mida di buni tora gade, iriyeduka ma uka amuta unasa†unasa; bura bedakai yasa nufa. sina rama ma uka mana dudu amebiyaine.
Sina rama ma uka mana
4 Na bi neidesi ada tora gade reyaka, adina sina rama dudu yi mida be bi Baba yaku ini ago gira una maro kana amededi. 5 Ye gua ya uka maida rema, ago gira ruaka yokoi de bura reida, idu ini adinari gutuna mina sina bi sena moiyafa. Nai usa usa bi uniye uniye uka manadi.✡Jn 13.34; 15.12, 17 6 Uka mana bi yomakai: Sei di ago gira yaku niyo kana amebinadi. Ini adinari gutuna neideyadi kana, ye makai kana amebiyaganedi.
7 Adina eru rededi vene tau bi kono tora noibanuri diyadi, kaere Iesu Keriso bi amiye roaita kana nisi soka reyo, mina niogau de rededi. Mina kana amiye bi eru redo amiye ma Keriso di tuma amiye. 8 Mina resi vei feidegasa dibo refa, de bi yi‡yi; bura bedakai uni nufa. beika mofa resi moiyadi bi youfeidegedi baebu. Idu yi obini bi tora noibanu gabi mironi moigedi.
9 Kaere amiye Keriso di beika oteimaro moi gira de rigo, idu fafa resi bogo, bi Sei inasa de. Kaere amiye Keriso di beika oteimaro mina moi gira rigo, bi Baba ma ini Mida bi inasa amego. 10 Kaere amiye ya rofu baesi mina oteimana de moi baego vonisi, bi yi yavari moi afe dui ga resi yuata ka ga mafa. 11 Adina kaere yuata mago, bi ini reremama no kefe rigo.
Metona ago
12 Ye nai bura regida ago ya rofu bi tora gade, idu fefari bura rena bi ura de reida. Mina resi nai uka mokena bi bae nesi ago niyagadu, ye una ada rei vau regifa.
13 Yi auba reisa rasini di mida mida§yi auba reisa rasini di mida mida: Mina bi bura rena amiye di dubu di ekalesia vene. yaku ini yuata ya rofu nifeidededi.