Paul di bura remanu ere
Thessalonica vene
rofu
Ago di ini adina
Amiye be yaku Keriso dairi dena di mokena ekalesia vene rofu Thessalonica taoniri moi no regamadi. Paul di ouresi bura Thessalonica vene rofu ri bi mokena Varika amiye bi sena deyo vo niyadi, mina fafau bura reyo. Ina yaku mina mokena moi rorobo resi ina vene rofu niyo Keriso dairi dena koderi, “amiye no iniye” (2.3) di ourefeidena gabireri vegu no moi tora iniye nigedi. Mina amiye no iniye yaku Keriso rofu uka gira dudu moi no regika.
Nifeidena amiye Paul yaku ekalesia vene rofu niyo bi esika esika ma toe bi ina vene fafau ogau nibigo, idu ini mokena vari gira bi aebiyaganedi. Ina vene yaku moimai regasa Paul ini moimai rededi venesa moimai regamo kana, toga toga vegu buni regika, ameyaganedi.
Beika sina ideri
Ago di ini adina 1.1–2
Keriso dairi degori, bi Sei yaku amiye kota aego 1.3–12
Keriso dairi dena di ago 2.1–17
Sei di mokena vari gira aena vene di vegu 3.1–15
Metona ago 3.16–18
1
1 Mina bi Paul, Silas, ma Timothy yaku bura reyafa —✡Acts 17.1
Thessalonica ri ekalesia vene rofu, kaere bi uni Baba Sei ma Varika amiye Iesu Keriso di:
2 Baba Sei ma Varika amiye Iesu Keriso di buni tora gade ma uka amuta bi ya venesa ameyaine.
Kota rena Keriso di denari
3 Usika ourena, una toga toga ya dada Sei rofu buni tora gade manadi. Makai resifa bi buni, ini adina yi mokena vari gira aena bi tora nido ma ya kaya ya kaya rofu uka mana ka bi tora nido. 4 Mina dada, una yaku Sei di ekalesia vene di nemokori ka ya rofu ni-ika resifa. Ya ni-ika resifa sana bi yomakai: esika tora ma toe tora moisi amededi, idu are rei gira resi yi mokena vari gira Sei rofu aesi amededi.
5 Mina vegu rededi yaku nido Sei di kota rena bi mokena rorobo redo, ye makai esika moi amededi dada, ini ourefeidena amena sana ideri amegedi. 6 Sei yaku vegu rama rego dada: Esika ya madedi vene rofu bi ina yaku esika mago. 7 Resi bi Sei yaku ya rofu, kaere bi gua esika moisa, bi ini vegu buni masi una rofu ka makai rego. Varika amiye Iesu ini naivo naivo vima yeiva tau ma ita fairo dudu, oma gutuna ogau nigedi di meda bi makai vata nigo. 8 Sei rofu gedu madedi vene ma uni Varika amiye Iesu di ago buni de neidededi vene rofu, ini obini toe tora iniye mago. 9 Ini obini bi yomakai: ina vene bi toga toga ameibobina di esika esika di kaunava mina masi Varika amiye ma ini vava di vabara gutuna resi ini nemokori nugai feidego.✡Is 2.10 10 Ini mina dego medari, ini vene tau yaku ini vabara magedi ma ini mokena vari gira aeyadi vene yaku ini roka niodoro regedi. Mina ya vene ka ina vene fogori are regedi, adina ya niyafa ago bi mina mokena vari gira aeyadi.
11 Mina dada, toga toga ya vene rofu usa usa nisifa. Uni Sei rofu usa usa nisifa, ina yaku ya vene di vegu moi buni reyainedi, vegu buni ya raka niyo amegedi dada. Ina yaku yi vegu buni di ura tau ma mokena vari gira aena di moimai vava dudu moi rama aego. 12 Makai ida dudu, bi ya vene dada, uni Varika amiye Iesu di roka niodoro regedi, ma uni Sei ma Varika amiye*uni Sei ma Varika amiye; o uni Sei Varika amiye. Iesu Keriso di buni tora gade dudu, ina dada yi roka bi niodoro rego.